Gilbert Perdez

Umarangkada na ang produksiyon ng 500,000 reusable face masks para sa mga nangunguna sa laban kontra COVID-19 pandemic.

Ayon kay Department of Science and Technology (DOST) Secretary Fortunato Dela Peña, mapupunta sa mga health workers at mga awtoridad na nagbabantay sa mga checkpoints ang kahalati ng mga face masks.

Katuwang ng DOST sa proyekto ang Philippine Textile Research Institute at iba pang kompanya na gumagawa ng tela.

Samantala, kukuha pa ng maraming mananahi ang ahensya lalo pa’t plano nitong gawing 50,000 per week ang kanilang produksiyon mula sa dating 10,000 per week.

Tinanggal na ang pinaiiral na liquor ban sa Muntinlupa City.

Dahil dito, ayon kay Mayor Jaime Fresnedi, maaari nang magbenta at uminom ng nakakalasing na inumin sa lungsod epektibo nitong Hunyo 1, 2020.

Gayunman, batay sa Ordinance 2020-100 na nilagdaan ni Fresnedi, mayroon pa ring restrictions at guidelines na dapat sundin habang umiiral ang General Community Quarantine (GCQ) at Modified General Community Quarantine (MGCQ).

Ayon sa ordinansa, bawal pa rin ang tinatawag na “social drinking” o pag-iinuman ng mga indibidwal na hindi nakatira sa iisang bahay.

Bawal ding bumili ng alak at iba pang uri ng mga nakalalasing na inumin ang mga nakatanggap ng tulong pinansiyal o ayuda mula sa local at national government upang matiyak na hindi lamang sa alak o bisyo napupunta ang nakuha nilang tulong.

Maliban dito, dapat ding ilista ng mga nagtitinda ang pangalan ng mga bumibili ng alak, address, contact details, gayundin ang eksaktong oras at petsa ng pagbili.

Kasabay nito, nanawagan ang local government Unit (LGU) sa mga residente na isumbong sa barangay o sa mga awtoridad ang mga nakikitang paglabag sa naturang ordinansa.

Inihayag ni Department of Agriculture (DA) Secretary William Dar na pinaghahandaan na ng kanyang tanggapan ang pagsapit ng wet season.

Sa isinagawang Laging Handa public briefing, tiniyak ni Dar na makikipag-ugnayan sila sa local government units (LGUs) sa bansa para sa paghahanda at pagtulong sa mga magsasaka.

Nasa 2.5 milyong ektaryang sakahan ang sinasabing iko-cover ng DA para sa wet season planting.

Patuloy aniyang isusulong ng gobyerno ang “Plant, Plant, Plant” Program o ang “Ahon Lahat, Pagkaing Sapat (ALPAS) Laban sa Covid-19” para sa kapakanan ng mga magsasaka, mangingisda at konsyumer.