Planong payagan ng NBA ang pagkakaroon ng hanggang 17 players per team sa oras na magbalik na ang season sa susunod na buwan.
Ayon sa NBA, inaasahang sasabak muli sa hard court ang 22 koponan sa Walt Disney World Resort sa Orlando, Florida.
Matatandaang sinuspinde ng liga ang mga laro nito mula noong ika-11 ng Marsodahil pa rin sa coronavirus pandemic.
Halatang sabik nang makabalik sa PBA si Phoenix Pulse star forward Calvin Abueva.
Ito’y makaraang aminin ni Abueva na sumalang siya sa drug test at psychological therapy na ilan sa mga kondisyon ni PBA commissioner Willie Marcial bago siya makalaro muli sa liga.
Matatandaang pinatawan ng indefinite suspension ng PBA si Abueva makaraang komprontahin ang girlfriend ni Ray Parks Jr. at makipag-away pa kay TNT import Terrence Jones.
Sinasabing may apat pang therapy session si Abueva pero naantala ito dahil sa coronavirus disease 2019 (COVID-19) pandemic.
Binuksan na muli ang Himig Handog 2020 para sa iba’t ibang tema.
Ayon kay ABS-CBN Music creative director Jonathan Manalo, bida sa pinakamalaking songwriting competition ang Original Pilipino Music (OPM) kaya’t tampok dito ang mga awiting mula sa ibang genre tulad ng ballad, pop, rock, hip-hop, rap, reggae, at iba pa.
Sinabi ni Manalo na ang hinahanap nila ay magagandang kanta na pwedeng mag-uplift at magdala ng good vibes para sa mga tagapakinig.
Dagdag ni Manalo, bukas ang Himig Handog 2020 para sa Filipino songwriters mula sa Pilipinas at sa iba pang bahagi ng mundo.
Tuloy na ang bakbakan sa ibabaw ng ring nina British world heavyweight champions Anthony Joshua at Tyson Fury.
Ito’y makaraang isiwalat ni promoter Eddie Hearn na nagkasundo na ang magkabilang panig sa financial terms para sa isang two-fight deal.
Hawak ni Joshua ang WBA, IBF, WBO at IBO belts habang si Fury naman ang kasalukuyang WBC champion.
Sinasabing may kanya-kanya pang misyon ang dalawang boksingero bago haharapin ang isa’t-isa.
Naglabas ng quarterly publication ang isang Member of Parliament (MP) ng Bangsamoro Transition Authority (BTA) upang labanan ang pagkalat ng fake news sa social media.
Ayon sa tanggapan ni Maisara Damdamun-Latiph, layon ng newsletter na ‘Empowering Voices’ na maihatid sa kanilang nasasakupan ang tamang impormasyon, lalo na sa mga mamamayan ng Bangsamoro Autonomous Region in Muslim Mindanao (BARMM).
Mahalaga rin aniya na tutukan ang pinanggagalingan ng fake news, ano man ang pulitika ng mga taong nasa likod nito.
Tampok naman sa first publication ang kuwento ng mga internally displaced persons sa Marawi City, gayundin ang problema sa basura, edukasyon, at iba pang adbokasiya.
Babaguhin ng Merriam-Webster dictionary ang kahulugan ng “racism” o pagtatangi ng lahi matapos kuwestiyunin ng isang Missouri black woman ang depinisyon nito dahil hindi umano isinama ang sistematikong pang-aapi base sa kulay ng tao.
Sa isang Facebook post, binanggit ni Kennedy Mitchum ng Drake University na inihahanda na ang revision, gayundin ang kahulugan ng iba pang salitang may kaugnayan sa racism o mayroong racial connotations.
Nabatid na nag-email ang 22-anyos na si Mitchum sa pamunuan ng diksiyonaryo noong nakaraang buwan makaraang pumanaw si African-American George Floyd nang luhuran sa leeg ng isang Minneapolis police officer.
Isasalang sa rapid tests ang 250 miyembro ng Cotabato City Police Office (CCPO).
Ayon kay city police director Lt. Colonel Richard Fiesta, ito’y makaraang magpositibo sa coronavirus disease 2019 (COVID-19) ang dalawang pulis sa lungsod.
Nabatid na ang dalawa ay nakatalaga sa isang police outpost sa Tamontaka bridge na kumokonekta sa bayan ng Datu Odin Sinsuat sa Maguindanao province.
Sa kasalukuyan, mayroon nang 13 COVID-19 positive cases sa lungsod, tatlo rito ay nananali sa Cotabato Regional and Medical Center habang gumaling na ang 10 iba pa.
Minamadali na ng Department of Environment and Natural Resources (DENR) ang pagproseso ng mga permits at documentations para sa mga crematoriums sa bansa.
Ayon kay DENR Undersecretary Benny Antiporda, ginagawa nila ito upang maiwasan ang pagkalat ng coronavirus disease (COVID-19).
Batay aniya sa datos ng DENR-EMB, mayroon lamang 89 crematoriums sa bansa kung saan 69 lamang ang operational.
Sa bilang na ito, ayon kay Antiporda, 26 ang nasa National Capital Region (NCR) pero 16 lamang ang gumagana at may kakayahang mag-cremate ng 66 labi kada araw.
Nanawagan ng suporta sa publiko ang mga local officials sa mga probinsya para sa agarang pagpasa ng anti-terrorism bill.
Ang pahayag ay ginawa ni Davao Oriental Governor Nelson Dayanghirang matapos malaman na pirma na lamang ni Pangulong Rodrigo Duterte ang kulang upang maging ganap na batas ang nasabing panukala.
Bukod aniya sa mapapalakas ang kampanya laban sa terorismo, makatutulong din ito upang matamo ang kapayapaan at kaunlaran ng bansa.
Samantala, nagpahayag din ng suporta sa anti-terrorism bill sina Tuguegarao City Mayor Jefferson Soriano, San Mateo, Isabela Mayor Gregorio Alipio Pua, Romblon Rep. Eleandro Jesus Madrona, at iba pang lokal na opisyal sa mga lalawigan.
Naglaan ng P45-M ang Canada bilang dagdag-ayuda sa laban ng Pilipinas kontra coronavirus disease 2019 (COVID-19).
Ayon sa Canadian Embassy, kabilang sa mga ipinaabot nilang tulong ay ang mga personal protective equipment (PPE) tulad ng 120,000 N95 masks.
Bukod dito, magbibigay din ang Canada ng karagdagang 400,000 Canadian dollars o katumbas ng P15 milyon para sa proyekto nitong Sexual Health and Empowerment Philippines (SHE) project katuwang ang Oxfam.