Gilbert Perdez

Natigil ang proseso ng pagbili ng Philippine Navy ng dalawa pang strategic sealift vessels dahil sa coronavirus disease 2019 (COVID-19) pandemic.

Ito ang inihayag ni Navy public affairs office chief, Lt. Commander Maria Christina Roxas matapos hingan ng update hinggil sa bidding process ng proyekto.

Batay aniya sa proseso, kapag may napili nang bidder ay padadalhan ito ng Notice of Award (NOA) at maglalabas sila ng Notice to Proceed (NTP).

Ang dalawang bibilhing barko ay magsisilbing reinforcements ng BRP Tarlac (LD-601) at BRP Davao del Sur (LD-602).

Masisira lamang ang layunin ng quarantine measures laban sa coronavirus disease 2019 (COVID-19) kung papayagan ang pagbiyahe ng mga locally stranded individuals (LSI’s) nang walang travel authority.

Ito ang naging tugon ni Joint Task Force COVID-19 Shield Commander Lt. Gen. Guillermo Eleazar sa mga panawagan na huwag nang hingan ng travel authority ang mga LSI’s  sa pag-uwi nila sa kani-kanilang mga lalawigan.

Giit ni Eleazar, mahalaga ito upang madaling ma-monitor ng mga lokal na pamahalaan ang mga LSI’s bilang bahagi ng mga hakbang ng gobyerno laban sa pagkalat ng COVID-19.

Nagbabala si Albay Rep. Joey Salceda sa mga magiging consequences o posibleng kahihinatnan kapag patuloy na naaantala ang comprehensive tax reform program (CTRP), partikular ang corporate recovery and tax incentives for enterprises act o Create Bill.

Sa isang pahayag, tinukoy ni Salceda ang assessment ng Fitch Solutions na nagsasaad na ang mabagal na pag-usad ng mga reporma sa pagbubuwis ay nagtataboy sa mga foreign investors at nagpapababa sa pagpasok ng foreign direct investments (FDIS) sa bansa.

Katunayan, ayon kay Salceda, sumadsad ng 23.1% ang net inflows mula sa 7.647 billion dollars ngayong 2020 kumpara sa kaparehong panahon noong nakaraang taon.

Kasalukuyan namang nasa ‘period of interpellations’ ang create bill o ang second package ng CTRP.

Binalaan ng Department of Agrarian Reform (DAR) ang mga magsasaka na huwag ibenta ang kanilang lupang sakahan.

Ginawa ni DA Secretary John Castriciones ang pahayag kasabay ng pamamahagi ng certificates of land ownership award (CLOAS) sa mga agrarian reform beneficiaries (ARBS).

Ayon kay Castriciones, tatanggalan ng karapatan sa lupang sakahan ang mga magsasakang magbebenta ng kanilang lote habang kukumpiskahin din ito at igagawad sa mga karapat-dapat na benepisyaryo.

Sa isang simpleng awarding ceremonies sa Calapan City, tinatayang 93 ektarya ng agricultural lands ang ipinamahagi nang libre sa 55 magsasaka sa naturang lugar.

Tutulong ang National Bureau of Investigation (NBI) sa imbestigasyon laban sa mga nagpakalat ng bogus reports ukol sa umano’y panis na pagkain na donasyon ng tanggapan ni Vice President Leni Robredo sa isang ospital sa Quezon City.

Ayon kay Justice Secretary Menardo Guevarra, handang umaksiyon ang BI upang matukoy ang pagkakakilanlan ng mga nagpakalat ng maling impormasyon sa Twitter.

Sa isang pahayag, itinanggi ng Diliman Doctors Hospital na nakatanggap sila ng panis na food donation mula sa tanggapan ni Robredo.