Gilbert Perdez

Mahalagang magpakonsulta sa doktor ang sinuman sakaling makaranas ng mga sintomas na may kinalaman sa mga karamdamang nakukuha tuwing tag-ulan.

Halimbawa sa mga sakit na ito ay ang dengue o kaya’y ubo at sipon.

Ayon kay Health Undersecretary Maria Rosario Vergeire, upang makasiguro, mahalagang magpatingin sa mga eksperto lalo’t may mga sintomas ang COVID-19 na kapareho ng mga naturang sakit.

Kung magpapakonsulta, ipinapayo na dapat ding alalahanin kung may mga nakasalamuha na hinihinala o kumpirmadong kaso ng COVID-19.

Bubungad sa mga motorista sa susunod na linggo ang taas-presyo sa produktong petrolyo.

Ayon sa mga source ng DWIZ sa industriya, maglalaro sa P0.55 hanggang P0.65 per liter ang dagdag-presyo sa gasolina habang P0.30 naman hanggang P0.40 ang dagdag-presyo sa diesel at kerosene.

Sinasabing tumaas ang demand ng langis sa buong mundo at bumabalik na sa normal ang mga industriyang nagsara dulot ng krisis dahilan upang gumalaw ang presyo ng petrolyo.

Balik operasyon na ang MRT-3 bukas, Hulyo 13 pero limitado ang kapasidad nito.

Ito ang inihayag ng management ilang araw matapos magpositibo sa COVID-19 ang halos tatlong daan nitong personnel.

Ayon pa sa pamunuan ng MRT, mayroon na itong sapat na bilang ng mga empleyado na “virus free” at kaya nitong ikasa ang partial operations sa susunod na linggo.

Nagpatupad ng temporary moratorium ang Pilipinas laban sa paglahok ng mga Filipino nationals sa United States Exchange Visitor Program (EVP) dahil pa rin sa coronavirus disease 2019 (COVID-19) pandemic.

Sa ilalim ng programa, nakakapunta ang mga dayuhan sa Amerika para mag-aral, mag-research, magpakita ng kanilang special skills o kaya’y tumanggap ng job training sa loob ng ilang taon.

Ayon naman sa advisory ng Philippine Exchange Visitor Program (EVP) Committee, binanggit na tatagal ng anim hanggang isang taon moratorium at apektibo noong May 25, 2020.

Dahil dito, bilang EVP Committee Secretariat, pansamantalang ititigil muna ng Commission on Filipinos Overseas ang registration ng mga Pinoy na nais sumali sa EVP.

Pumalo na sa 942 ang bilang ng mga miyembro ng Philippine National Police (PNP) na nagpositibo sa coronavirus disease 2019 (COVID-19) matapos dapuan ng impeksiyon ang 37 iba pa.

Ayon sa PNP Health Service, ang 19 na bagong kaso ay mula sa Police Regional Office sa Central Visayas (PRO-7); 12 sa National Capital Region Police Office; dalawa sa PRO-4A (Calabarzon) at isa naman sa PRO-3 (Central Luzon), PRO-6 (Western Visayas), National Headquarters at PNP Finance Service.

Samantala, 419 na ang bilang ng mga PNP personnel na gumaling mula sa sakit habang nananatili sa siyam ang mga nasawi.

Patuloy namang mino-monitor ng PNP Health Service ang 657 probable cases at 1,258 suspected cases.