Malapit nang buksan ang coronavirus disease 2019 (COVID-19) molecular laboratory sa Governor Celestino Gallares Hospital sa Tagbilaran City sa Bohol.
Ayon kay Dr. Mary Jean Loreche, chief pathologist ng DOH-Central Visayas, makatutulong ito sa testing capacity ng lalawigan.
Samantala, sinabi naman ni Governor Arthur Yap na sa oras na umarangkada na ang operasyon ng pasilidad ay luluwagan na nila ang ipinatutupad na curfew sa kanilang probinsya.
Nakapagtala ng 34 na bagong recoveries at 19 na bagong kaso ng coronavirus disease 2019 (COVID-19) ang Western Visayas.
Ayon kay Dr. Marie Jocelyn Te, tagapagsalita ng Department of Health Western Visayas Center for Health Development, ito’y ibinatay sa halos 7600 laboratory results mula sa tatlong testing centers sa rehiyon.
Kabilang sa mga gumaling ay ang 24 na locally stranded individuals, walong repatriated Overseas Filipino Workers at isang Authorized Person Outside of Residence o APOR.
Samantala, muling nanawagan sa publiko si Te na huwag lalabas ng bahay nang walang suot na facemask, dumistansya ng isang metro sa isa’t isa at alamin ang totoong impormasyon tungkol sa pandemya.
Inihayag ng Department of Labor and Employment (DOLE) na nakasunod sa mga alituntunin ukol sa pag-iwas at pagkontrol sa COVID-19 ang karamihan sa mga kompanya sa Metro Manila.
Ayon kay DOLE-National Capital Region (NCR) Director Sarah Buena Mirasol, 80 porsiyento o 4,062 sa kabuuang 5,049 na mga establisimyento ang tumalima sa guidelines ng DOLE at Department of Trade and Industry (DTI).
Sinabi ni Mirasol na isinagawa ang monitorying mula ika-8 ng Hunyo hanggang Hulyo 1.
Tinamaan ng coronavirus disease 2019 (COVID-19) si Department of Public Works and Highways (DPWH) Secretary Mark Villar.
Ito ang kinumpirma ni Villar sa kanyang post sa Facebook.
Ayon kay Villar, ngayon lamang niya natanggap ang test result na nagsasabing positibo siya sa COVID-19.
Hindi naman binanggit na kalihim kung may nararamdaman siyang sintomas o kung siya ay asymptomatic.
Sasagutin ng kani-kanilang koponan ang gastusin sa pagpapaospital sakaling dapuan ng coronavirus disease 2019 (COVID-19) ang mga manlalaro ng Philippine Basketball Association (PBA).
Ito ang tiniyak ni PBA Commissioner Willie Marcial matapos makipagpulong sa Board of Governors, mga coaches at team managers.
Ayon kay Marcial, isa umano sa mga ikinababahala ng mga manlalaro ay kung sino ang babalikat sa kanilang medical expenses kapag nagpositibo sila sa coronavirus.
Maliban dito, sagot din ng PBA teams ang gagawing COVID-19 testing sa kanilang hanay.
Umakyat na sa halos 850,000 ang bilang ng mga nagpositibo sa coronavirus disease 2019 (COVID-19) sa India.
Ito’y makaraang makapagtala ang health ministry ng mahigit 28,637 sa loob lamang ng isang araw.
Dahil dito, nagkasa agad ng isang linggong lockdown lalo na sa lugar ng Bangalore na sentro ng komersiyo.
Nakapagtala ng 6,094 bagong kaso ng COVID-19 ang health ministry ng Mexico.
Bunga nito, sumampa na sa 295,268 ang mga confirmed cases sa nasabing bansa.
Nasa 34,730 na rin ang mga nasawi kasunod ng pagpanaw ng mahigit 500 pang pasyente.
Muling nagpatupad ng liquor ban at curfew sa Cabanatuan City, Nueva Ecija bunsod ng patuloy na pagtaas ng bilang ng kaso ng coronavirus disease 2019 (COVID-19) sa lungsod.
Sinasabing nagpalabas ng Executive Order si City Mayor Myca Elizabeth Vergara upang madaling maipatupad ang pagbabawal sa mass gathering na hinihinalang sanhi ng pagdami ng mga nagpositibo sa coronavirus sa kanyang nasasakupan.
Batay sa tala ng local health office, 10 kaso na ng COVID-19 ang naitala sa nasabing lungsod.
Pumalo na sa 8,854 ang mga Pilipino na nagpositibo sa coronavirus disease 2019 (COVID-19) sa ibayong dagat.
Ito’y makaraang makapagtala ang Department of Foreign Affairs (DFA) ng 50 bagong kaso sa hanay ng mga Pinoy abroad.
Umakyat naman sa 611 ang bilang ng mga nasawi sa sakit sa labas ng bansa kasunod ng pagpanaw ng 17 pang pasyente.
12 July 2020
Weekend reports from PH Embassies and Consulates confirm 50 new COVID-19 cases among Filipinos, 8 new recoveries, and 17 new fatalities in the Middle East. This brings the total number of fatalities among our nationals abroad to 611. (1/3) pic.twitter.com/tNd2Bv33ca
— DFA Philippines (@DFAPHL) July 12, 2020
Samantala, mahigit 5,274 ang mga nakarekober na Pinoy mula sa COVID-19 sa ibang bansa.
Naitala sa Mountain Province ang ikalawang kaso ng coronavirus disease 2019 (COVID-19).
Ayon sa sangay ng Department of Health (DOH) sa Cordillera Administrative Region (CAR), isang 29-anyos na babae ang pinakahuling tinamaan ng COVID-19.
Dahil dito, umakyat na sa 137 ang kaso ng COVID-19 sa rehiyon kung saan naka-quarantine na at nasa ospital ang 27 sa mga ito.