Gilbert Perdez

Napagkasunduan ng lahat ng mga alkalde sa Kalakhang Maynila na panatilihin sa General Community Quarantine (GCQ) ang rehiyon hanggang sa katapusan ng taon.

Pahayag ni Parañaque Mayor at Metro Manila Council (MMC) Chair Edwin Olivarez, pabor ang mayorya ng kanilang mga miyembro sa rekomendasyon na panatilihin hanggang Disyembre 31 ang pinaiiral na GCQ na siyang ikalawa sa pinakamababang antas ng quarantine protocols sa gitna ng COVID-19 pandemic.

Sa ilalim ng GCQ, pinapayagan na ang pagbubukas ng mga negosyo at sumakay sa mga pampublikong sasakyan pero limitado lamang ang kapasidad ng mga ito.

Maliban dito, nagkasundo rin ang Metro Manila mayors na suspendihin ang Christmas parties sa mga tanggapan ng gobyerno.

Matatandaang ipinag-utos din ng gobyerno ang pagbabawal sa pangangaroling at iba pang pagtitipon ngayong Kapaskuhan para maiwasan ang pagkalat ng COVID-19.

Samantala, kumpiyansa ang mga alkalde na papaboran ng Inter-Agency Task Force (IATF) ang kanilang rekomendasyon.

Nadagdagan pa ng 370 ang bilang ng mga gumaling mula sa COVID-19 dahilan upang pumalo na sa 387,617 ang total recoveries sa bansa.

Batay sa pinakahuling COVID-19 bulletin ng Department of Health (DOH), nagkaroon ng 1,631 na bagong kumpirmadong kaso.

Sa 425,918 na kabuuang bilang ng COVID-19 cases sa bansa ay 30,047 na lamang ang mga itinuturing na actives cases.

Nakapagtala naman ng pinakamaraming bagong kaso ang Quezon City na 116 na sinundan ng Rizal na 101, Davao City na 95, Laguna na 89, at Maynila na may 65 na bagong kaso.

Samantala, sumirit naman sa 8,255 ang death toll sa bansa kasunod ng pagpanaw ng 46 na pasyente.

Ihihirit ng liderato ng kongreso ang P5-B dagdag sa calamity fund sa 2021 national budget.

Ayon kay House Speaker Lord Allan Velasco, isusulong niya ang nabanggit na proposal sa bicameral conference.

Giit ni Velasco, mahalagang dagdagan ang P20-B calamity fund para sa susunod na taon bilang paghahanda sa mga tatamang kalamidad sa bansa.

Patuloy na dumarami ang mga overseas Filipino workers (OFWs) na napapauwi ng Department of Labor and Employment (DOLE) sa kani-kanilang mga probinsya sa gitna ng COVID-19 pandemic.

Ayon kay Labor Secretary Silvestre Bello III, aabot na sa 320,000 ang kabuuang bilang ng mga returning OFWs na inalalayan ng Overseas Workers Welfare Administration (OWWA) matapos magnegatibo sa coronavirus test.

Sinagot din ng OWWA ang hotel accommodation at food ng mga OFWs hanggang sa makauwi ang mga ito sa kani-kanilang lalawigan.

Dapat tukuyin na ng gobyerno ang mga partikular na sektor na makikinabang o bibigyan ng COVID-19 vaccine.

Ito ang inihayag ni Vice President Leni Robredo matapos mapaulat na malapit na itong mapasakamay ng gobyerno.

Ayon kay Robredo, mahalagang magkaroon na ng listahan ng mga health care workers o mga recipients ng bakuna na bibilhin ng pamahalaan.

Matatandaang ipinagmalaki ni Presidential Spokesperson Harry Roque na magkakaroon ng access ang Pilipinas sa coronavirus vaccine ng Estados Unidos makaraang inanunsiyo ng Moderna at Pfizer na epektibo ang kanilang mga produkto.