Gilbert Perdez

Gumaling na ang 92% ng mga nagpositibo sa coronavirus disease 2019 (COVID-19) sa Pilipinas.

Ito ang inihayag ng Department of Health (DOH) makaraang makapagtala ang ahensya ng 10,957 na bagong recoveries.

Dahil dito, sumampa na sa 386,486 ang kabuuang bilang ng mga nakarekober mula sa sakit.

Pumalo naman sa 418,818 ang confirmed cases sa bansa dahil sa 1,968 na bagong kaso habang sumirit naman sa 8,123 ang death toll kasunod ng pagpanaw ng 43 pang pasyente.

Nanguna ang Cavite sa may pinakamaraming kaso na nakapagtala ng 107 infections na sinundan ng Quezon City na 97, Davao City na 86, Laguna na 84, at Quezon province na 77.

JUST IN: Kaso ng COVID-19 sa bansa, nadagdagan pa ng 1,968 ngayong Linggo, Nobyembre 22.

Pumalo na sa kabuuang 418,818 ang bilang ng kumpirmadong kaso ng COVID-19 sa bansa. Mayroon namang 24,209 naitalang active cases. | https://t.co/HHOy7zrLDW pic.twitter.com/uvaiB4zBCO

— DWIZ Newscenter (@dwiz882) November 22, 2020

Walang naitalang bagong kaso ng coronavirus disease 2019 (COVID-19) ang Department of Foreign Affairs (DFA) sa mga Pilipinong nasa ibang bansa.

Maliban dito, batay sa pinakahuling case bulletin ng DFA, wala ring nadagdag sa bilang ng mga gumaling at nasawi.

Bunga nito, nananatili sa 11,559 ang kumpirmadong kaso sa hanay ng mga Pinoy sa ibayong dagat habang nananatili sa 834 ang death toll at 7,478 naman ang total recoveries.

Sa nabanggit na bilang, binanggit ng DFA na sa kasalukuyan ay nasa 3,247 na lamang ang mga nagpapagaling o ‘yung mga itinuturing na active cases.

Nabunyag na nagpositibo sa COVID-19 ang director general ng Technical Education and Skills Development Authority (TESDA) na si Isidro Lapeña.

Sa isang pahayag, binanggit ni TESDA information chief Gerty Pagaran na ngayonlamang lumabas ang PCR result ni Lapeña.

Sinasabing nagpasailalim sa test si Lapeña bilang requirement para sa kanyang biyahe patungong Mindanao.

Nilinaw naman ng kampo ni Lapeña na wala itong nararamdamang kahit anong sintomas ng sakit pero kasalukuyan na itong naka-quarantine.

Tiniyak ng Department of Health (DOH) na may pondo ito sakaling maging available na ang bakuna laban sa coronavirus disease 2019  (COVID-19).

Ang pahayag ay ginawa ni DOH Undersecretary Maria Rosario Vergeire sa isinagawang Laging Handa public briefing.

Paliwanag ni Vergeire, siniguro din sa kanila ng Kongreso na bibigyan sila nito ng karagdagang pondo para sa COVID-19 vaccine.

Sa pagtaya ng opisyal, nasa P3 billion ang makukuha nilang pondo na pambili ng 22 million doses na sinasabing sapat naman para sa 22 million population.