Gilbert Perdez

Hindi pa rin nakatatanggap ng kanilang special risk allowances ang mga health workers na nangunguna sa laban ng bansa kontra COVID-19.

Ito ang nabunyag makaraang magsagawa ng protesta ang mga kasapi ng All UP Workers Union sa University of the Philippines-Philippine General Hospital  sa Maynila dahil sa hindi pa nababayaran ang kanilang COVID-19 hazard pay at risk allowance.

Anila, anim na buwan matapos ang alisin ang enhanced community quarantine dulot ng pandemya ay hindi pa rin nila nakukuha ang kanilang allowances.

Dinagdagan ng Inter-Agency Task Force for the Management of Emerging Infectious Diseases (IATF) ang passenger capacity ng mga shuttle services.

Bunga nito, ayon kay Presidential Spokesperson Harry Roque, maaari nang magpatupad ang mga shuttle vehicles ng “one-seat apart” arrangement o kaya’y full seating capacity pero dapat mayroon pa ring dividers habang mahigpit ding paiiralin ang health at safety measures.

Kasabay nito, inatasan naman ng IATF ang Department of Labor and Employment (DOLE) at Department of Trade and Industry (DTI) na magpalabas ng karampatang supplemental advisories na may kaugnayan dito.

Hinikayat ng Department of Transportation (DOTr) ang mga driver ng public utility vehicles (PUV) na sumali sa “Service Contracting Program (SCP)” ng Land Transportation Franchising and Regulatory Board (LTFRB) upang makakuha ng dagdag na income.

Ayon kay DOTr Secretary Arthur Tugade, magandang pagkakataon ito para sa mga tsuper upang makabawi makaraang mawalaan ng kita dahil sa pandemya.

Ang SCP registration at orientation ay nagsimula noon pang Miyerkules at matatapos hanggang Linggo, mula alas-8:00 ng umaga hanggang alas-5:00 ng hapon.

Sa ilalim ng programa, ang mga driver o operators ng traditional at modernong PUJs ay makakatanggap ng P11 kada kilometro habang ang mga bus operators o drivers naman ay makakakuha ng P23.10 kada kilometro.

Ibibigay sa mga benepisyaryo ang subsidy bawat linggo sa pamamagitan ng Landbank of the Philippines.

Binigyang-diin ng Department of Education (DepEd) na hindi dapat isisi ang lahat sa kanila sa mga palpak na learning modules na viral online.

Ayon kay Education Undersecretary Diosdado San Antonio, humingi na sila ng tulong sa Department of Justice (DOJ) upang matukoy kung sino-sino ang mga posibleng nasa likod nito.

Nagtalaga na rin ng mas maraming tao at kumuha ng third-party evaluators ang DepEd upang maiwasan ang mga katulad na pagkakamali.

Kabilang sa mga nasilip na sablay sa modules ay ang letrang “O” na tumutukoy umano sa isang “ostrich” pero “owl” naman ang nasa larawan.

Walang basbas mula sa Department of Health (DOH) ang text advisory na may kaugnayan sa outdoor Christmas parties.

Ayon kay Health Undersecretary Maria Rosario Vergeire, nakatanggap din siya ng text mula sa isang telecommunications network ukol dito.

Batay sa advisory na sinasabing galing sa National Telecommunications Commission (NTC), binanggit na ang outdoor parties ay inirerekomenda umano ng DOH, Department of Information and Communications Technology, at Healthcare Professionals Alliance for COVID-19 (HPAAC).

Sa ngayon, iniimbestigahan na ng DOH ang insidente habang pinag-aaralan din ng ahensya ang pagkakaroon ng opisiyal na anunsyo para hindi magdulot ng kalituhan sa publiko.

Hihimayin na ng Department of Justice (DOJ) ang mga reklamong natanggap ng ‘task force on corruption’ sa susunod na linggo.

Ayon kay Justice Secretary Menardo Guevarra, magpapatawag siya ng meeting ng main task force at dito tutukuyin kung alin ang mga reklamong dapat tutukan ng special investigating teams.

Pagkatapos aniya nito ay saka sila magbibigay ng update sa publiko ukol sa mga naturang kaso.

Matatandaang ipinag-utos ni Pangulong Duterte ang pagbuo ng task force para imbestigahan ang korapsiyon sa mga ahensya ng pamahalaan na kinabibilangan din ng Department of Public Works and Highways (DPWH).