Patay ang higit 40 magsasaka matapos umanong ginilitan ng ‘di nakikilalang mga salarin sa Borno state, Nigeria.
Ayon sa ulat, nakarekober ng 43 bangkay ang mga awtoridad sa Koshobe village.
Sinasabing karamihan sa mga biktima ay pawang mga kasapi ng isang local armed group sa rehiyon.
Hinihinalang kagagawan ng Boko Haram at Islamic State ang nasabing malagim na krimen.
Nananatiling COVID-19 free ang bayan ng Sadanga sa lalawigan ng Mountain Province.
Ayon kay Ignacio Pangket, executive assistant ni Sadanga Mayor Gabino Ganggangan, umaasa silang mapapanatili nila ang ganitong status hanggang sa matapos ang pandemya.
Naniniwala si Pangket na ang pagsunod sa minimum health standards ng mga residente ang dahilan kung bakit walang kaso ng COVID-19 sa kanilang bayan.
Kabilang sa mga ipinatutupad nilang hakbang laban sa pagkalat ng coronavirus ay ang paglimita sa mga pumapasok na ‘travelers’ sa kanilang mga nasasakupan.
Makakaharap ng defending champion Los Angeles Lakers ang Los Angeles Clippers sa pagbubukas ng NBA pre-season schedule bilang bahagi ng 49-game exhibition slate ng liga.
Ayon sa NBA, ang tuneup games ay aarangkada mula Disyembre 11 hanggang Disyembre 19 bago ang pagbubukas ng 2020-21 season sa Disyembre 22.
Bawat koponan ay sasalang sa tig-dalawang pre-season games, isa sa home court nila at isa sa bakuran ng kanilang kalaban.
Mas marami namang exhibition games ang sasabakan ng Lakers kung saan bukod sa Clippers sa Disyembre 11 at 13 ay magkakaroon din ito ng road games sa court ng Phoenix sa Disyembre 16 at 18.
Samantala, makakasagupa naman ng Toronto Raptors sa hiwalay na pre-season game ang Miami Heat sa Tampa, Florida.
Sinasabing hindi magkakaroon ng laro sa home court ng Raptors bunsod ng mahigpit na restrictions sa Canada dulot ng COVID-19 pandemic.
Umakyat na sa higit 400,000 ang bilang ng mga nasawi sa COVID-19 sa Europa.
Sinasabing nangyari ang pagsirit ng coronavirus cases at death toll kasabay ng pagbubukas muli ng mga shops bunsod ng holiday season.
Ipinag-utos naman ng ilang lokal na pamahalaan ang pagbabawal sa mga malalaking pagtitipon at maging ang pagkukumpol-kumpol sa loob at labas ng mga kabahayan o households.
Pinakamarami ang mga pumanaw sa Britanya na nasa 57,551 na sinundan ng Italya na 53,677, France na 51,914 at Espanya na 44,668.
Isasalang sa libreng COVID-19 testing ang mga kauuwi pa lamang na seafarers.
Ayon sa Department of Transportation (DOTr), isasagawa ang test sa pamamagitan ng Philippine Ports Authority (PPA) simula Disyembre 1.
Maliban dito, binanggit ng DOTr na hindi muna sisingilin ng port fees ang mga shipping companies at operators bilang bahagi ng mga inisyatibo sa ilalim ng “Bayanihan to Recover as One Act” (Bayanihan 2).
Sinasabing maglalaan ang DOTr ng P270 milyon para sa COVID-19 testing ng mga ‘returning Filipino seafarers’.
Mahigit 400 pang pasyente ang gumaling mula sa coronavirus disease (COVID-19).
Ayon sa Department of Health (DOH), dahil dito’y pumalo na sa 388,062 ang total recoveries o katumbas ng 90.7%.
Nakapagtala naman ang DOH ng 1,893 na bagong kaso dahilan upang umakyat na sa 427,797 ang mga kumpirmadong kaso sa bansa.
Sa nabanggit na bilang, nasa 31,402 ang active cases.
Sinasabing naitala ang pinakamaraming kaso sa Davao City na 200 na bagong kaso na sinundan ng Negros Occidental na 123, Western Samar na 84, Pampanga na 60 at Quezon City na 57.
JUST IN: Kaso ng COVID-19 sa bansa, nadagdagan pa ng 1,893 ngayong Sabado, Nobyembre 28.
Pumalo na sa kabuuang 427,797 ang bilang ng kumpirmadong kaso ng COVID-19 sa bansa. Mayroon namang 31,402 naitalang active cases. | https://t.co/HHOy7zaafm pic.twitter.com/8TrjVJEKir
— DWIZ Newscenter (@dwiz882) November 28, 2020
Itinalaga bilang secretary general ng Catholic Bishops’ Conference of the Philippines (CBCP) ang isang 59-anyos na pari mula sa lalawigan ng Leyte.
Ayon sa CBCP, iniluklok si Monsignor Bernardo Pantin ng Archdiocese of Palo bilang bagong pangkalahatang-kalihim sa isinagawang Permanent Councils meeting nitong Miyerkules.
Papalitan ni Pantin si Fr. Marvin Mejia ng Archdiocese of Cebu na nagsilbi sa konseho mula pa noong 2013 pero nagtapos na ang termino noon pang ika-31 ng Oktubre ng taong kasalukuyan.
Sinasabing magtatalaga rin ng bagong assistant secretary-general ang CBCP dahil ito ang dating posisyon na hawak ni Pantin.
Hinikayat ng Department of Health (DOH) ang mga bagong licensed physicians na manatili sa bansa at magsilbi sa bayan.
Ginawa ni DOH Undersecretary Maria Rosario Vergeire ang panawagan sa Laging Handa public briefing matapos pumasa sa licensure exams ang mahigit 3,000 bagong doktor.
Ayon kay Vergeire, mahalaga ang serbisyo ng mga medical doctors at iba pang healthcare workers lalo na ngayong panahon ng coronavirus disease (COVID-19 pandemic.
Matatandaang tinanggal na ni Pangulong Rodrigo Duterte ang deployment ban para sa mga medical professionals na nais umalis at magtrabaho sa ibayong dagat.
Labing-siyam (19) pang Pilipino sa labas ng bansa ang gumaling mula sa coronavirus disease (COVID-19).
Dahil dito, ayon sa Department of Foreign Affairs (DFA), pumalo na sa 7,497 ang total recoveries sa hanay ng mga Pinoy abroad.
Nagkaroon naman ng 103 na bagong impeksiyon dahilan upang umakyat na sa 11,665 ang mga kumpirmadong kaso doon habang nasa 836 ang death toll.
Patay ang anim katao habang sugatan ang walong iba pa matapos sumalakay ang isang suicide bomber sa isang ice-cream parlor sa Mogadishu, Somalia.
Nabatid na pumasok ang hindi pa nakikilalang suspek sa Gelato Divino parlor malapit sa airport at bigla na lamang nitong pinasabog ang sarili.
Wala pang umaako sa pag-atake pero hinihinalang kagagawan ito ng Islamist insurgent group al Shabaab na sinasabing kaalyado ng Al-Qaeda.