Gilbert Perdez

Mariing inatasan ni Interior Secretary Eduardo Año ang Joint Task Force (JTF) Covid Shield na maghigpit sa pagpapatupad ng health protocols ngayong holiday season.

Ayon kay Año, ito’y upang mapigilan ang posibleng pagkalat ng coronavirus disease 2019  (COVID-19) bunsod ng inaasahang pagdagsa ng mga mamimili sa mga pamilihan at mga commercial areas.

Sinasabing rin magtatalaga ang pulisya ng police focal persons sa bawat barangay na siyang magmo-monitor sa implementasyon ng quarantine measures.

Nagbabala naman si Año na ipasasara nila ang mga malls na makikitaan ng maraming paglabag sa harap na rin ng pagsirit ng bilang ng mga tinamataan ng COVID-19 sa bansa.

Muling binuhay ni retired Chief Justice Reynato Puno ang panawagang isulong ang federal system of government sa Pilipinas.

Sa isang webinar na pinangunahan ng Pimentel Institute for Leadership and Governance, ipinunto ni Puno na lumitaw sa sunod-sunod na kalamidad at COVID-19 pandemic na tumama sa bansa ang pangangailangan ng pagkakaroon ng pederalismo.

Paliwanag ng dating punong mahistrado, bukod sa mapipigilan nito ang korapsiyon at red tape sa gobyerno ay magiging pantay-pantay din ang kapangyarihan at resources ng bawat rehiyon.

Matatandaang si Puno ang chairman ng Consultative Committee (ConCom) na naatasang bumuo ng federal constitution pero hindi nagtagal ay nabuwag din ang naturang komite.

Hindi sang-ayon ang Department of the Interior and Local Government (DILG) sa posibleng pagkakaroon ng face-to-face classes sa mga paaralan ngayong panahon ng pandemya.

Giit ni DILG Secretary Eduardo Año, hindi pa akma sa kasalukuyang sitwasyon ang nasabing teaching method at posible pa aniyang maging dahilan ito ng pagtaas ng COVID-19 cases sa bansa.

Matatandaan na sa Senate hearing kamakailan ay nagpahayag ng suporta si Sen. Sherwin Gatchalian sa posibilidad ng pagkakaroon ng localized at limited face-to-face learning workshops upang maibsan ang hirap na nararanasan ng mga magulang sa pagtuturo sa kanilang mga anak.

Sumampa na sa 398,624 ang bilang ng mga gumaling mula sa coronavirus disease 2019 (COVID-19) sa Pilipinas.

Ito’y makaraang makapagtala ang Department of Health (DOH) ng 10,579 na bagong recoveries.

Sinasabing ito’y katumbas ng 92.7 %r ecovery rate ng mga Pinoy sa laban kontra coronavirus.

Dahil naman sa 2,076 na bagong kumpirmadong kaso, sumirit na sa 429,864 ang total COVID-19 cases sa buong bansa.

Pinakamarami naman ang naitalang bagong kaso sa Quezon City na 137 na sinundan ng Laguna na 122, Cavite 103, Batangas 96, at Angeles City 79.

Samantala, pumalo na sa 8,373 ang death toll sa bansa kasunod ng pagpanaw ng 40 pang pasyente.

JUST IN: Kaso ng COVID-19 sa bansa, nadagdagan pa ng 2,076 ngayong Linggo, Nobyembre 29.

Pumalo na sa kabuuang 429,864 ang bilang ng kumpirmadong kaso ng COVID-19 sa bansa. Mayroon namang 22,867 naitalang active cases. | https://t.co/HHOy7zaafm pic.twitter.com/KtIRCjKonp

— DWIZ Newscenter (@dwiz882) November 29, 2020

Labing-isa (11) pang Pilipino sa labas ng bansa ang tinamaan ng COVID-19.

Dahil dito, umakyat na sa 11,676 ang impeksiyon sa hanay ng mga Pinoy abroad.

Batay sa pinakahuling case bulletin ng Department of Foreign Affairs (DFA), nananatili naman sa 7,497 ang total recoveries dahil walang nadagdag sa nabanggit na bilang sa nakalipas na 24 oras.

Samantala, umakyat naman sa 845 ang death toll kasunod ng pagpanaw ng siyam pang Pinoy sa ibayong dagat.