Gilbert Perdez

Makakatulong ang Simbahang Katolika para maiangat ang kumpiyansa ng publiko sa mga bakuna kontra COVID-19.

Ito ang inihayag ni Catholic Bishops’ of the Philippines committee on public affairs Executive Secretary Jerome Secillano dahil pa rin sa agam-agam ng publiko sa pagpapabakuna.

Ayon kay Secillano, kung tatanggapin ng pamahalaan ang alok na gawing vaccination sites ang mga simbahan ay mas mahihikayat ang mga tao na magpabakuna.

Maliban sa vaccination sites, nagbibigay din ng libreng counseling ang ilang simbahan para sa mga nais magpabakuna.

Kumpiyansa ang Commission on Elections (Comelec) na sasampa sa mahigit 60 milyon ang bilang ng mga registered voters bago matapos ang registration sa Setyembre 30 ngayong taon.

Ayon kay Comelec Commissioner Antonio Kho Jr., mas pinaiigting pa nila ang mga ginagawa nilang hakbang upang mahikayat ang publiko na magprehistro at maging madali sa kanila ang pagpaparehistro.

Kabilang sa mga tinukoy ni Kho ay ang i-rehistro kung saan maaaring i-download ang aplikasyon at magtungo sa Offices of Elections Officer (OEOs) habang nakalatag din ang mga satellite registration offices sa iba’t ibang lugar sa bansa.

Umaasa naman si Kho na magiging maayos ang lahat ng prosesong ginagawa nila upang madagdagan pa ang bilang ng mga botante para sa May 2022 National and Local Elections.

Ibinasura ng Sandiganbayan ang apela ng isang revenue officer ng Bureau of Internal Revenue (BIR) na nasibak kasama ang kanyang superior dahil sa kasong direct bribery.

Sa hatol ng anti-graft court, pinagtibay nito ang hatol ng Manila Regional Trial Court (RTC) laban kay Ampa at sa kanyang supervisor na si Nora Halamani kung saan pinatawan ng siyam na taong pagkakakulong ang mga ito.

Sina Ampa at Halamani ay naaresto sa entrapment operation ng National Bureau of Investigation (NBI) noong Hunyo 29, 2017 dahil sa umano’y pangingikil ng P800,000 sa isang kompanyang gumagawa ng processed meat products sa Vitas Street, Tondo, Maynila.

Posibleng alisin na sa ilang lugar sa bansa ang ilang restrictions tulad ng sapilitan o mandatory na pagsusuot ng face mask o face shield at physical distancing.

Ito’y makaraang ihayag ni DOH Undersecretary Maria Rosario Vergeire na pinag-aaralan na ng mga eksperto, kasama ang Inter-Agency Task Force for the Management of Emerging Infectious Diseases (IATF-EID), ang posibilidad na tanggalin ang mga health protocols sa ilang partikular na lugar o specific bubbles.

Gayunman, nilinaw ni Vergeire na ang magiging pasya pagkatapos ng rekomendasyon ay ibabase pa rin sa bilang ng mga nabakunahang indibidwal at kalagayan ng COVID-19 infections sa bansa.

Ayon kay Vergeire, bagama’t mahigit isang milyon na ang mga naturukan ng COVID-19 vaccines ay maliit na bahagi pa rin ito kumpara sa kabuuang populasyon ng Pilipinas na mahigit 100 milyon.

Tinutulungan na ng gobyerno ang tinatayang 403 overseas Filipino workers (OFWs) matapos ma-stranded sa paliparan.

Ayon kay Philippine Overseas Employment Administration (POEA) chief Bernard Olalia, hindi pinababayaan ng Overseas Workers Welfare Administration (OWWA) ang mga OFWs sa Ninoy Aquino International Airport (NAIA).

Nabatid na hindi pinayagan ang mga ito na sumakay sa kanilang flight patungong Saudi Arabia matapos mabatid na inoobliga sila ng kanilang mga employer o foreign recruitment agencies na bayaran ang gastos sa COVID-19 protocols at insurance coverage na nagkakahalaga ng P47,000.

Matatandaang nagpalabas ng direktiba si DOLE Secretary Silvestre Bello III noong Huwebes na nag-aatas ng pansamantalang pagsuspinde sa deployment sa Saudi.

Nilinaw ni Bello na hindi nila papayagang umalis ang mga Pinoy hangga’t hindi nabibigyang-linaw ang nasabing usapin.