Gilbert Perdez

Arestado ang isang babaeng fixer na nanghihingi umano ng malaking halaga sa mga aplikante na nais maging miyembro ng Philippine National Police (PNP) kasunod ng ikinasang operasyon sa Gen. Santos Avenue, Barangay Upper Bicutan, Taguig City.

Kinilala ang suspek na si Evelyn Aleman, alyas “Eva Fonda,” 35 taong gulang, at ahente ng Public Safety Savings and Loan Association Inc. (PSSLAI).

Si Aleman ay naaresto ilang oras matapos ilunsad ng PNP ang kanilang “nameless & faceless” recruitment process para sa mga police aspirants na mas kilala bilang Comprehensive Online Recruitment Encrypting System o CORES.

Napag-alaman na nanghihingi umano si Aleman ng P50,000 sa mga aplikante upang masigurong makakapasa sila sa neuro-psychiatric exam.

Samantala, ibinabala naman ni PNP Chief Gen. Guillermo Eleazar na wala na ang kultura ng korapsyon at maging ang palakasan system sa recruitment process sa kanilang organisasyon.

Walang “premature campaigning.”

Ito ang inihayag ni Commission on Elections Commissioner Antonio Kho, Jr. matapos maglabasan sa telebisyon ang iba’t ibang infomercials ng mga kasalukuyang opisyal ng gobyerno isang taon bago ang May 9, 2022 elections.

Paliwanag ni Kho, ang paglabas ng isang pulitiko o personalidad sa telebisyon at iba pa ay hindi maituturing na pangangampanya dahil hindi pa naman kandidato ang mga ito.

Sa ilalim aniya ng batas, magiging kandidato lamang ang mga taong naghain ng kanilang Certificates of Candidacy (COCs) oras na magsimula na ang campaign period.

Isasama na sa recruitment program ng Philippine National Police (PNP) ngayong taon ang mga aplikante na pasok sa bagong height requirement.

Ito ang inihayag ni PNP chief Gen. Guillermo Eleazar matapos lagdaan ni Pangulong Rodrigo Duterte ang batas ukol sa pinababang height requirement para sa mga aplikante na nais maging miyembro ng pambansang pulisya at iba pang uniformed services.

Dahil dito, sinabi ni Eleazar na maaari nang mag-apply ang mga may height na 5’2” para sa mga lalaki at 5 feet naman para sa mga babae.

Ayon kay Eleazar, hindi dapat maging hadlang ang pisikal na katangian, lalo na ang height, sa mga indibidwal na nais maging bahagi ng kanilang organisasyon.

Tinuligsa ng isang grupo ng mga kabataan ang naging pasya ng Commission on Higher Education (CHED) na ipagpatuloy ang implementasyon ng flexible learning sa mga susunod na taon.

Giit ni National Union of Students of the Philippines Jandeil Roperos, daragdagan lamang ng CHED ang mga problemang pasan ng mga guro at mga mag-aaral sa ilalim ng ‘new normal’.

Sinabi ni Roperos na kung papayagan ito ng komisyon ay posibleng lalo pang lumala ang pinansyal, mental at emosyonal na problema ng mga estudyante.

Samantala, iginiit naman ni Kabataan Rep. Sarah Elago na may mga guro at mag-aaral na nakakaranas umano ng matinding stress at anxiety dahil sa online learning.

Umabot na sa mahigit tatlong milyon ang mga naisagawang COVID-19 tests ng Philippine Red Cross (PRC) sa iba’t ibang panig ng bansa.

Ito ang isiniwalat ni PRC chair at CEO Sen. Richard Gordon kasunod ng naitala nitong ‘2-million milestone’ noong Pebrero 2021.

Matatandaang nagpatayo rin ang PRC ng kauna-unahan nitong molecular laboratory para sa RT-PCR testing sa kanilang national headquarters bilang suporta sa laban ng pamahalaan kontra COVID-19.

Umakyat na sa 4,097,425 doses ng COVID-19 vaccines ang naipamahagi ng pamahalaan.

Ito ang ipinagmalaki ng National Task Force against COVID-19 ilang araw matapos lumabas ang survey ng Social Weather Stations (SWS) na nagsasaad na tumaas ang kumpiyansa ng publiko sa evaluation ng gobyerno sa bakuna kontra coronavirus.

Ayon sa task force, nasa 949,939 Filipinos na ang ‘fully vaccinated’ habang 3,147,486 naman ang nakatanggap ng first dose ng bakuna.

Pahayag naman ni vaccine czar Secretary Carlito Galvez Jr., mahalagang mapanatili ang ganitong momentum upang maabot ng bansa ang herd immunity.

Muling inihayag ng Department of Health (DOH) na hindi dapat matakot sa COVID-19 vaccines ang mga taong may human immunodeficiency virus (HIV).

Ngunit nilinaw ni DOH spokesperson Maria Rosario Vergeire na dapat kumuha muna sila ng clearance sa kanilang mga doktor.

Tiniyak din ni Vergeire na pangangalagaan ang privacy ng mga ‘persons with HIV’.

Batay naman sa datos ng ahensya, nasa 855 na ang HIV positive sa Pilipinas.