Gilbert Perdez

Sumampa na sa higit limang milyon ang bilang ng mga Pilipinong nabigyan ng unang dose ng bakuna kontra COVID-19.

Ito ang ipinagmalaki ni vaccine czar Carlito Galvez Jr. halos tatlong buwan matapos simulan ang vaccine rollout sa bansa.

Mas mataas aniya sa target ng pamahalaan na apat na milyon ang naabot nila bago matapos ang kasalukuyang buwan.

Ayon kay Galvez, nasa 1.2 milyon naman ang nakakumpleto na ng dalawang dose ng bakuna.

Para makamit ang herd immunity sa Nobyembre, sinabi ni Galvez na kailangang makapagbakuna ng 500,000 kada araw sa National Capital Region o NCR at walo pang lugar.

Aarangkada naman sa susunod na buwan ang pagbabakuna sa A4 priority group, kabilang ang mga manggagawa sa mga government agencies, informal sector at pribadong sektor.

Magde-deploy ang Department of the Interior and Local Government (DILG) ng mahigit 50,000 police at fire personnel para sa national vaccine rollout na kabibilangan ng A4 category sa susunod na buwan.

Ayon kay DILG Secretary Eduardo Año, mahalaga ang presensya ng mga tauhan ng Phil. National Police (PNP) at Bureau of Fire Protection (BFP) para sa kaayusan at seguridad sa mga vaccination sites.

Aminado si Año na malaking hamon sa gobyerno ang malawakang COVID-19 vaccination pero tiniyak niyang magiging maayos ito sa tulong ng mga nasa hanay ng uniformed services.

Gayunman, nilinaw din ng DILG chief na ang deployment ng mga police at fire personnel ay hindi lamang para sa pagpapanatili ng minimum public health standards kundi magsisilbi ring vaccinators ang ilan sa mga ito sa mga vaccination centers.

Pinag-iingat ng Philippine Statistics Authority (PSA) ang publiko laban sa mga Facebook accounts na nagsasabing konektado sa ahensya o Philippine Identification System (PhilSys) at humihingi ng processing fee para sa Step 1 online registration.

Ayon sa PSA, walang bayad o libre ang PhilSys registration habang ang Philippine Identification card naman ay direktang ide-deliver ng PHLPost sa tahanan ng may-ari nito.

Dahil dito, hinikayat ng ahensya ang publiko na makipag-ugnayan sa official Facebook page ng PhilSys na fb.com/PSAPhilSysOfficial.

Nabatid na hanggang nitong Mayo 24, mahigit 10 milyon na ang nakatapos ng Step 2 biometrics registration.

Samantala, ayon sa PSA, maaari ring mag-email sa publiko sa kanila sa info@philsys.gov.ph o kaya’y tumawag sa PhilSys hotline 1388.

Inatasan ni Pangulong Rodrigo Duterte si Energy Secretary Alfonso Cusi na ayusin, i-convene at pangunahan ang isasagawang national assembly ng Partido Demokratiko Pilipino-Lakas ng Bayan (PDP-Laban) bukas, Mayo 31.

Ito ang inihayag ni Presidential Spokesperson Harry Roque makaraang himukin ni PDP-Laban party president at Sen. Manny Pacquiao ang kanilang mga miyembro na huwag dumalo sa pagpupulong.

Ayon kay Roque, idaraos ang assembly upang masuri o mabusisi ang suporta ng partido sa mga programa ni Duterte na siyang party chairperson.

Matatandaang nagpalabas ng memorandum si Pacquiao noong Mayo 25 na nagsasaad na hindi ‘sanctioned’ o walang kinalaman ang mga national party officers sa nasabing event.