DWIZ 882

Kinuwestiyon ni Vice President Sara Duterte ang Presidential Security Command dahil sa aniya’y pananahimik nito sa kabila ng ilang beses na banta sa kanyang buhay at sa kanyang pamilya.

Kasunod ito ng pahayag ng PSC na pinaigting nito ang seguridad ni Pangulong Ferdinand Marcos jr. matapos ang bantang pagpatay ni VP Sara sa pangulo sakaling may mangyaring masama sa kanya.

Ayon sa bise-presidente, patunay lamang ang pagkakasama ng Vice President Security and Protection Group sa PSC para maimpluwensyahan ng Office of the President ang ilalatag na seguridad para sa kanya.

Una nang sinabi ng pangalawang pangulo na may mga pagbabanta laban sa kanya at sa kanyang mga tauhan, ngunit itinanggi ng National Bureau of Investigation na nakatanggap ito ng intelligence information kaugnay sa sinasabing death threat. – Sa panulat ni Laica Cuevas

Dapat nang tigilan ang panawagang maglunsad ng panibagong Edsa People Power.

 Tugon ito ni Senate President Pro-Tempore Jinggoy Estrada sa apela ni dating presidential spokesman Harry Roque publiko na suportahan si Vice President Sara Duterte at magtipon-tipon sa Edsa.

 Ito’y upang ihayag ang pagtutol sa pamamahala ni Pangulong Bongbong Marcos.

 Ayon kay Senator Estrada, magdudulot lamang ang apela ni Roque ng pagkakawatak-watak ng sambayanang Pilipino.

 Sapat na anya ang Edsa People Power 1 at 2 kaya’t hindi na dapat masundan ng panibagong people power.

 Iginiit ng mambabatas na hindi ito kailangan sa ngayon ng bansa dahil mas maraming dapat unahin na problema ang gobyerno.

Iginiit ni Vice President Sara Duterte na wala na siyang inaasahang “Fair treatment” o patas na pag-trato mula sa pamahalaan.

Ginawa ng bise-presidente ang pahayag kasunod ng kanyang pagdalo sa pagdinig ng kamara kaugnay sa sinasabing kwestyunableng paggasta ng confidential funds ng OVP at Department of Education.

Kinwestyon ni VP Sara kung bakit nang lumabas ang usaping banta sa buhay ni Pangulong Ferdinand Marcos jr. ay isyu ito ng national security, ngunit nang siya ang makatanggap ng death threat ay pinagwalang-bahala lamang ito.

Samantala, handa naman aniya siyang sagutin ang mga katanungan ng National Bureau of Investigation, sakaling maihain na ang subpoena laban sa kanya.  – Sa panulat ni Laica Cuevas

Tinutunton na ng National Bureau of Investigation ang assassin na sinasabing kinontrata ni Vice President Sara Duterte para patayin si Pangulong Ferdinand Marcos jr. at iba pang personalidad.

Ayon kay Justice Undersecretary Jesse Andres, inatasan na nila ang law enforcement agencies na alamin ang pagkakakilanlan at kinaroonan ng indibidwal o mga taong posibleng nagpa-plano ng masama laban sa pangulo.

Inaasahan naman ni NBI Director Jaime Santiago na mismong si VP Sara ang magpapaliwanag kung sino ang nasabing indibidwal, sa oras na humarap ito sa imbestigasyon sa bisa ng ipadadalang subpoena.

Itinuturing din umanong mabigat ang banta ni VP Sara dahil siya ay nasa mataas na posisyon sa gobyerno at may malawak na impluwensya.

Iginiit pa ni Usec. Andres na anumang banta sa pangulo ay banta sa lahat ng pilipino, kasabay ng paalala na si VP Sara ang makikinabang at aakyat bilang pangulo sakaling mapatay si Pangulong Marcos. –  Sa panulat ni Laica Cuevas

Sanib-pwersa na ang iba’t ibang ahensya ng pamahalaan sa pagpapatupad ng batas, kaugnay sa naging banta ni vice president sara duterte laban kina Pangulong Ferdinand Marcos Jr., First Lady Liza Araneta – Marcos, at House Speaker Martin Romualdez.

Sa press briefing sa Malacañang, sinabi ni Justice Undersecretary Jesse Hermogenes Andres na hindi personal ang pagkilos na ito ng pamahalaan.

Gayunpaman, kailangan aniyang palakasin ang mga institusyon ng gobyerno at isulong ang konstitusyon.

Ayon sa opisyal, isang pagkakataon na rin ito, upang ipakita sa taumbayan na walang kinikilala ang batas, at papapanagutin nito ang mga mapapatunayang nagkasala.

Aniya, kung hindi ipatutupad ang batas sa mga makapangyarihan at ma-impluwensyang tao, ano pang klaseng pamahalaan, mayroon ang bansa. – Sa panulat ni Laica Cuevas

Posibleng sa Palawan o Davao Prison and Penal Farm  ikulong ang convicted on death row na  si  Mary Jane Veloso kapag nakabalik na ito ng Pilipinas sa susunod na buwan.

Ayon kay Bureau of Corrections Director General Gregorio Catapang jr., pinag-uusapan na nila kung saan maaring mamalagi si Veloso, kung saan tatlong kulungan mula Metro Manila, Davao at Palawan ang kasalukuyang pinagpipilian.

Hahayaan naman ng boc na mamili si Veloso kung alin sa mga correctional facilities ang gusto nito.

Samantala, makakatanggap din ng training ang Pinay conivict mula sa Technical Education and Skills Development Authority  upang makapagtrabaho ito sa mga planta o depende sa skills na matutunan nito. – Sa panulat ni Jeraline Doinog

Kumpiyansa ang election watchdog na Parish Pastoral Council for Responsible Voting na isa sa magiging transparent na eleksyon ang may 2025 midterm elections.

Ayon kay PPCRV I.T. Director William Yu, ito ay dahil pinayagan sila at ang iba pang stakeholders para obserbahan ang electoral process.

Maituturing din aniyang highlight ng 2025 polls ang online voting system, na siyang kauna-unahan sa kasaysayan ng eleksyon sa Pilipinas.

Kung dati ay kailangan pa ng Overseas Filipino Workers na personal na pumunta sa presinto para bumoto, ngayon ay pinadali  na ito at maari na lamang silang gumamit ng cellphone para makaboto.

Muling magsisilbing caretaker ng bansa ang tatlong miyembro ng gabinete ni Pangulong Ferdinand Marcos jr. kasunod ng kanyang working visit sa United Arab Emirates.

Bukod kay Executive Secretary Lucas Bersamin, itinalaga din bilang caretakers sina Justice Secretary Jesus Crispin Remulla at Agrarian Reform Secretary Conrado Estrella.

Hindi ito ang unang pagkakataon na pinamahalaan ng tatlong opisyal ang operasyon ng executive department habang nasa official foreign trip ang pangulo.

Nagawa na ito noong dumalo ang Chief Executive sa 44th at 45th ASEAN Summit at mga kaugnay na pagpupulong sa Laos noong nakaraang buwan.

Ngayong araw, magsisimula ang working visit ng pangulo kung saan inaasahang malalagdaan ang ilang kasunduan na layong palakasin pa ang relasyon ng Pilipinas at UAE, partikular sa mga larangan ng kalakalan, enerhiya, at ekonomiya. – Sa panulat ni Laica Cuevas

Muling binira ni Vice President Sara Duterte si Pangulong Ferdinand Marcos jr., kung saan hinamon nito ang matataas na opisyal ng gobyerno na sumailalim sa drug test.

Sa isang live video sa social media page, sinabi ni VP Sara na ginagamit lamang siya ng kanyang kaaway para pagtakpan ang kakulangan ng pamahalaan.

Hinamon rin niya ng bise presidente ang mga opisyal ng pamahalaan kabilang na ang mga nasa Office of the President at kongreso na sumailalim sa drug tests.

Binigyang-diin pa ni VP Sara na sinusubukan niyang magtrabaho nang maayos sa DEPED subalit hindi niya maintindihan kung bakit patuloy na binabastos ng kongreso ang budget ng nasabing departamento. - Sa panulat ni Jeraline Doinog