DWIZ 882

Ibinunyag ng Philippine National Police na nakatanggap sila ng report na nagkaroon ng hakutan at bayaran sa ilang mga taga-suporta ng pamilya Duterte sa Edsa-Shrine.

Ayon kay PNP Spokesperson Brigadier General  Jean Fajardo, batay sa report na kanilang natanggap,  pinangakuang babayaran ang mga dadalo sa nasabing pagtitipon.

Ipinakita rin ni Brigadier General Fajardo ang video ng nangyaring pag-iinterview sa mga posibleng hakot at paglilista sa mga sinasabing nabayaran ng 200 piso.

Depensa naman ng mga Duterte supporter, hindi sila mga bayaran.

Samantala, tiniyak ng pnp na mahigpit nilang binabantayan ang pagtitipon-tipon ng Duterte supporters sa Edsa Shrine.

Kaugnay nito, ipinaubaya na nila sa sa NCRPO ang pagpapasya kung kailangang itaas ang alerto sa Metro Manila.

Nahaharap sa patong-patong na reklamo si Vice President Sara Duterte kasunod ng nangyaring tensyon nang ilipat si OVP Chief of Staff Atty. Zuleika Lopez sa Veterans Memorial Medical Center mula sa House of Representatives Detention Center noong weekend.

Ayon sa Philippine National Police, maliban kay VP Sara, sinampahan din ng reklamo sina Vice Presidential Security and Protection Group Head Colonel Raymund Dante Lachica, at iba pa.

Kabilang sa isinampang kaso ang direct assault, disobedience to authority, at grave coercions, na inihain ni Dr. Van Jason Villamor ng PNP Health Service at ng kanyang testigo sa Quezon City Prosecutor’s Office.

Aabot sa mahigit dalawang libong magsasakang Agrarian Reform beneficiaries mula sa mga lalawigan ng Albay; Catanduanes; Masbate at Sorsogon ang hindi na sisingilin ang utang sa kanilang lupang pang-agraryo na hinuhulugan matapos itong ipamahagi sa kanila ng Department of Agrarian Reform.

Ang nasabing inistyatiba ay bahagi ng condonation na tuloy-tuloy nang  isinasagawa ng kasalukuyang administrasyon.

Ayon kay Agrarian Reform Regional Director Reuben Theodore Sindac, ipinamahagi ang may 2,931 certificates of condonation with release of mortgages o sertipikasyon bilang patunay na binubura na ang utang.

Aabot anya sa mahigit 88 milyong piso ang halaga ng nasabing condonation.

Idinaos ang aktibidad sa pangunguna ni Senadora Imee Marcos sa Legazpi City Convention Center.

Tinutulan ni  dating military chief of staff at PDEA chief, retired general Dionisio Santiago ang panawagan ni dating pangulong Rodrigo Duterte sa militar na ituwid ang inilarawan nitong “Fractured governance”, sa ilalim ng pamumuno ni Pangulong Ferdinand Marcos Jr.

Ayon kay General Santiago, na nagsilbi ring gabinete ng nakaraang administrasyon bilang dangerous drugs board chief, bagama’t naiintindihan niya kung saan nanggagaling ang dating presidente, hindi masosolusyunan ang problema ng isa pang problema.

Iginiit pa ni dating general Santiago na kung aminado ang mga pilipino na nagkamali ang mga ito sa pagpili ng lider ng bansa, maaari naman itong palitan sa paraang ligal o sa pamamagitan ng isang eleksyon.

Sinabi ng dating heneral na natuto na ng leksyon ang militar matapos suportahan ng mga pinuno nito ang mga nakaraang pag-aalsa tulad ng 1986 People Power Revolution na nagpatalsik kay yumaong dating pangulong Ferdinand Marcos at ng 2001 Edsa Dos Revolt na nagpabagsak naman kay pangulong Joseph Estrada. – Sa panulat ni Laica Cuevas

Inupakan ni House Deputy Majority Leader at ACT-CIS Partylist Rep. Erwin Tulfo ang Department of Agriculture dahil umano sa kawalan ng aksyon para mapababa ang presyo ng bigas.

Ito’y kahit umiiral ang mababang taripa at bumaba ang presyo nito sa world market.

Kinuwestyon din ng kongresista ang D.A. Kung bakit hindi pa rin nakabibili ang mga consumer ng murang bigas gayong ibinaba na sa 15% ang taripa mula sa dating 35% alinsunod sa executive order 62.

Aminado naman si D.A. Undersecretary Asis Perez na maging sila ay nagtataka kung bakit hindi bumababa ang presyo nito sa merkado gayong nagmura na ito sa world market.

Gayunman, hindi nagustuhan ng mambabatas ang tugon ng D.A. At iginiit na dapat ay maramdaman na ng mga mamamayan ang epekto ng E.O. 62 na ipinatupad simula noong Hulyo.

Magtatapos na anya ang Nobyembre at wala pa ring ginagawa ang kagawaran sa mataas pa ring presyo ng bigas at iba pang agricultural products, lalo’t inaasahang tataas ang konsumo sa pagkain ng mga Pilipino ngayong malapit ng mag-pasko at bagong taon.

Umapela na ang Catholic Bishops Conference of the Philippines sa mga lider ng gobyerno na tumuon sa pamumuno at paglilingkod sa mga Pilipino.

Sa gitna ito ng tumitinding tensyon sa pulitika sa pagitan nina Pangulong Ferdinand Marcos Jr. at Vice President Sara Duterte.

Nanawagan din si Antipolo Bishop Ruperto Santos sa mga lider na isantabi ang kanilang pagkakaiba at sa halip ay magtrabaho na lamang para paunlarin ang lahat ng mga mamamayan.

Handa naman si Bishop Santos na tulungan ang magkabilang kampo na ayusin ang kanilang mga gusot.

Magugunitang nagbanta si Duterte na may kinausap na itong papatay kay Pangulong Marcos, First Lady Liza Araneta-Marcos at House Speaker Martin Romualdez kapag siya at pinatay bagay na pinalagan ng punong ehekutibo.

Pinag-aaralan na ng Land Transportation Franchising and Regulatory Board ang hirit ng ilang taxi operators na itaas ang kasalukuyang flag-down rate na 50 pesos sa 60 pesos.

Ito ayon kay LTFRB Chairman Teofilo Guadiz III, ay dahil ilang factors na dapat isaalang-alang, kabilang na rito ang epekto nito sa inflation.

Dagdag pa ni Chairman Guadiz, sa pagtaas ng flag-down rate, kailangan munang matukoy ng pamahalaan ang mga posibleng epekto nito sa ekonomiya kabilang ang presyo ng mga pangunahing bilihin.

Mababatid na itinaas na ng LTFRB ang flag-down rate sa mga taxi sa sinkwenta pesos mula sa dating kwarenta pesos. –  Sa panulat ni John Riz Calata

Posibleng magkaroon ng malaking epekto sa ekonomiya ng pilipinas ang tumitinding girian sa pagitan nina Pangulong Ferdinand Marcos Jr. at Vice President Sara Duterte.

Ayon kay Political Scientist, Professor Dennis Coronacion, kung hindi kakalma ang magkabilang partido, maari itong humantong sa political crisis dahilan para umatras ang foreign investors.

Kasunod nito, iginiit ni Professor Coronacion na dapat tutukan ng sinumang magsisilbing tagapamagitan sa dalawa ang mga kondisyon upang magkaroon ng ceasefire sa banggaan nina Pangulong Marcos at VP Sara.

Iginiit ng Armed Forces of the Philippines na hindi kailangan ang loyalty check sa kanilang hanay sa gitna ng girian nina Pangulong Ferdinand Marcos jr. at Vice President Sara Duterte.

Sa press briefing sa Camp Aguinaldo, muling binigyang-diin ni AFP Spokesperson Colonel Francel Margareth Padilla ang pahayag ni AFP Chief of Staff General Romeo Brawner Jr., na mananatiling tapat ang militar sa konstitusyon at sa chain of command.

Ayon kay Colonel Padilla, nahaharap ang pilipinas ngayon sa malaking hamon kaya’t bilang tagapagtiyak ng national stability, tungkulin ng AFP na manatiling walang pinapanigan at ialay lamang ang katapatan sa bansa.

Samantala, nang tanungin naman kaugnay sa banat ni dating pangulong Rodrigo Duterte na dapat magkaroon ng military intervention sa gitna ng inilarawan nitong “Fractured governance”, sinabi ni Colonel Padilla na direktiba sa kanila ang maging propesyunal at umiwas sa anumang isyung politikal. –  Sa panulat ni Laica Cuevas

Kinuwestiyon ni Vice President Sara Duterte ang Presidential Security Command dahil sa aniya’y pananahimik nito sa kabila ng ilang beses na banta sa kanyang buhay at sa kanyang pamilya.

Kasunod ito ng pahayag ng PSC na pinaigting nito ang seguridad ni Pangulong Ferdinand Marcos jr. matapos ang bantang pagpatay ni VP Sara sa pangulo sakaling may mangyaring masama sa kanya.

Ayon sa bise-presidente, patunay lamang ang pagkakasama ng Vice President Security and Protection Group sa PSC para maimpluwensyahan ng Office of the President ang ilalatag na seguridad para sa kanya.

Una nang sinabi ng pangalawang pangulo na may mga pagbabanta laban sa kanya at sa kanyang mga tauhan, ngunit itinanggi ng National Bureau of Investigation na nakatanggap ito ng intelligence information kaugnay sa sinasabing death threat. – Sa panulat ni Laica Cuevas