DWIZ 882

Asahan ang dagdag-bawas sa presyo ng produktong petrolyo sa susunod na linggo.

Batay sa 4 na araw na trading, posibleng magkaroon ng P 0.55  hanggang P0.80 na dagdag sa kada litro ng gasolina.

Asahan naman ang P0.10  hanggang P0.30 na bawas sa kada litro ng kerosene habang posible naman ang hanggang P 0. 30  na tapyas sa kada litro ng diesel.

Ayon kay Department of Energy-Oil Industry Management Bureau Assistant Director Rodela Romero, ang nasabing price adjustments ay bunsod ng tigil-putukan sa pagitan ng Israel at Hezbollah at ang hindi inaasahang pagbaba ng imbentaryo ng krudo ng United States.

Kadalasang nag-aanunsyo ang ng opisyal na presyo ang mga kumpanya ng langis tuwing Lunes at ipinatutupad sa kinabukasan.

Dinepensahan ni Senador Ronald Dela Rosa si dating pangulong Rodrigo Duterte kaugnay sa panawagan nitong pagkilos ng militar.

Ayon kay Senador Dela Rosa, hindi seditious ang sinabi ng dating pangulo dahil wala anya itong binanggit na magkudeta kayo o atakihin ang Malacañang.

Paliwanag pa ng senador, ipina-alala lamang ni dating pangulong Duterte sa militar ang kanilang  papel sa bansa na ipagtanggol ang konstitusyon.

Trabaho anya ng Armed Forces of the Philippines na panatilihin ang katatagan ng bansa at hindi ito i-destabilize.

Una rito, sinabi ng dating pangulo na militar lamang ang maaaring magtama ng anyang “Fractured governance” sa bansa.

Tiwala ang National Economic Development Authority na hindi makaaapekto sa ekonomiya ng bansa ang tumitinding banggaan ng malalaking pangalan sa larangan ng pulitika.

Ayon kay NEDA Secretary Arsenio Balisacan, nakatutok pa rin ang administrasyon upang makamit ang mga mithiin nito na nakapaloob sa Philippine Development Plan 2023-2028.

Sa katunayan aniya, kahit pa ganito na ang sitwasyon ng pulitika noong 1990s, patuloy naman ang pag-unlad ng bansa dahil napanatili nito ang mga polisiyang pang-ekonomiya.

Binigyang-diin pa ng kalihim na hangga’t nasa direksyon ang pamahalaan sa mga prayoridad at proyekto nitong pang-ekonomiya, mapapanatili ang matatag na business community.

Kaugnay nito, inihayag din ni Trade Secretary Ma. Cristina Roque na marami pa ring investment ang pumapasok sa bansa sa kabila ng ingay sa pulitika. –  Sa panulat ni Laica Cuevas

Iginiit ni Federation of Free Farmers Chairman Leonardo Montemayor na napapanahon na para gamitin ng kamara ang kapangyarigan nito para kasuhan ang mga nasa likod ng rice smuggling, hoarding at iba pang iregularidad sa rice sector.

Ito, ayon sa dating agriculture secretary, ay dahil mataas pa rin ang presyo ng bigas sa kabila ng pagpapatupad ng executive order no. 62 o ang pinababang taripa sa imported rice.

Binigyang-diin din ng opisyal na hanggang ngayon ay tikom pa rin si Pangulong Ferdinand Marcos jr. sa apela nilang ihinto na ang E.O. 62, bagay na pinakikinabangan lamang naman ng ibang bansa. –  Sa panualt ni Laica Cuevas

Nilinaw ng Department of Justice na walang hurisdiksyon si Pangulong Ferdinand Marcos Jr. para suspindihin si Vice President Sara Duterte.

Kasunod ito ng pahayag ng bise-presidente na pagpatay sa pangulo at kanyang asawa na si First Lady Liza Araneta-Marcos, sakaling siya ang unang mapatay.

Ayon kay Justice Undersecretary Jesse Andres, tanging ombudsman lamang ang maaring mag-suspinde sa pangalawang pinakamataas ng opisyal ng bansa at local government executives lamang ang maaring suspindihin ng pangulo.

Itinalaga ni dating pangulong Rodrigo Duterte si Ombudsman Samuel Martires nuong 2018.

Matatandaang sinabi ni Usec. Andres na maaaring ma-disqualify si VP Sara sa posisyon kung mapapatunayang lumabag ito sa anti-terror law ng bansa. –  Sa panualt ni Laica Cuevas

Nilinaw ng Department of Justice na hindi idedeklara ng pamahalaan bilang terosista si Vice President Sara Duterte.

Ito’y kasunod ng mga naging pagbabanta ng bise presidente na ipapapatay sina Pangulong Ferdinand Marcos Jr.; First Lady Liza Marcos at House Speaker Martin Romualdez kung sakali mang patayin siya.

Ayon kay Justice Undersecretary Jesse Andres, nakapag labas naman na ng subpoena ang National Bureau of Investigation para bigyan ng pagkakataon ang pangalawang pangulo na ipaliwanag ang kanyang mga naging pahayag.

Samantala, kumpyansa naman si Usec. Andres na malalaman nila kung sino ang sinasabi ni VP Sara na inutusan niya para patayan sila pangulong marcos.

Giit pa ng DOJ official, nakikipag-ugnayan na sila sa iba’t ibang ahensya ng pamahalaan para sa masusing imbestigasyon. –  Sa panulat ni Kat Gonzales

Kakasuhan din ni Vice President Sara Duterte ang Philippine National Police dahil sa sinasabing disobedience, pagnanakaw at pagkidnap.

Kasunod ito ng pagsasampa ng PNP sa bise presidente ng reklamong direct assault, disobedience at grave coercion.

Nag-ugat ang pagsasampa ng mga kaso dahil sa mga nangyari nuong nilipat si  OVP Chief of Staff atty. Zuleika Lopez sa Veterans Memorial Medical Center mula sa House of Representatives Detention Center.

Iginiit naman ni vp sara na bahagi ng “Oppression” At “Harassment” Laban sa kanya ang mga reklamo ng pambansang pulisya.

Nanawagan na ng panalangin mula sa publiko ang Catholic Bishops Conference of the Philippines dahil sa tumitinding tensyon sa pulitika, partikular na sa pagitan nina Pangulong Ferdinand Marcos jr. at Vice President Sara Duterte.

Hiniling ni Manila Archbishop Jose Cardinal Advincula sa taumbayan, na ipagdasal ang katahimikan sa Pilipinas, at huwag hayaang hatiin ng mga isyu sa politika at pansariling interes ang bansa.

Ayon naman kay Antipolo Bishop Ruperto Santos, isantabi muna ang pagkakaiba, at mas pagtuunan ng pansin ang pagpapabuti sa kapakanan at kaunlaran ng lahat ng Pilipino.

Kaugnay nito, sinabi ni Bishop Santos na handa siyang mamagitan kina pangulong marcos at VP Sara upang magkaayos na ito.

Nanawagan si dating senador Bam Aquino na huwag nang kaladkarin at idamay ang pinatay na dating senador na ninoy Aquino sa mga away sa pulitika.

Ayon sa nakababatang Aquino, nitong mga nakalipas na araw ay ilang beses na nabanggit ang pangalan ng kanyang tiyuhin sa bangayan ng mga Marcos at Duterte.

Hiniling pa nito sa mga taga-suporta ng nakatatandang aquino na ipagpatuloy ang laban nito tungo sa isang mapayapang lipunan, abot-kayang edukasyon, at gobyernong hindi corrupt.

Matatandaang lumabas ang usaping pagpatay sa dating senador ninoy nang hingin ang reaksyon ni Vice President Sara Duterte sa pahayag ni Pangulong Ferdinand Marcos Jr. na kanyang papalagan ang anumang pagbabanta laban sa kanya.

Ang mga Aquino at Marcos ay kilalang magkaribal na pamilya sa pulitika.

Isa rin ang pagkamatay ni Aquino noong 1983 sa itinuturing na pangunahing dahilan ng Edsa People Power Revolution, na nagpatalsik sa ama ng kasalukuyang pangulo na si Pangulong Ferdinand Marcos Sr.