DWIZ 882

Muling magsisilbing caretaker ng bansa ang tatlong miyembro ng gabinete ni Pangulong Ferdinand Marcos jr. kasunod ng kanyang working visit sa United Arab Emirates.

Bukod kay Executive Secretary Lucas Bersamin, itinalaga din bilang caretakers sina Justice Secretary Jesus Crispin Remulla at Agrarian Reform Secretary Conrado Estrella.

Hindi ito ang unang pagkakataon na pinamahalaan ng tatlong opisyal ang operasyon ng executive department habang nasa official foreign trip ang pangulo.

Nagawa na ito noong dumalo ang Chief Executive sa 44th at 45th ASEAN Summit at mga kaugnay na pagpupulong sa Laos noong nakaraang buwan.

Ngayong araw, magsisimula ang working visit ng pangulo kung saan inaasahang malalagdaan ang ilang kasunduan na layong palakasin pa ang relasyon ng Pilipinas at UAE, partikular sa mga larangan ng kalakalan, enerhiya, at ekonomiya. – Sa panulat ni Laica Cuevas

Muling binira ni Vice President Sara Duterte si Pangulong Ferdinand Marcos jr., kung saan hinamon nito ang matataas na opisyal ng gobyerno na sumailalim sa drug test.

Sa isang live video sa social media page, sinabi ni VP Sara na ginagamit lamang siya ng kanyang kaaway para pagtakpan ang kakulangan ng pamahalaan.

Hinamon rin niya ng bise presidente ang mga opisyal ng pamahalaan kabilang na ang mga nasa Office of the President at kongreso na sumailalim sa drug tests.

Binigyang-diin pa ni VP Sara na sinusubukan niyang magtrabaho nang maayos sa DEPED subalit hindi niya maintindihan kung bakit patuloy na binabastos ng kongreso ang budget ng nasabing departamento. - Sa panulat ni Jeraline Doinog

Iginiit ni Senate President Francis ‘Chiz’ Escudero na dapat unahin at tutukan ng mga opisyal ng gobyerno ang mga problemang nakaaapekto sa mga Pilipino.

Sa  gitna na ito ng lumalalang away ng dalawang pinakamatataas na lider ng bansa kung saan nagbanta si Vice President Sara Duterte sa buhay ni Pangulong Ferdinand Marcos Jr., First Lady Liza Araneta-Marcos at House Speaker Martin Romualdez.

 Ayon kay SP Escudero, mayroong mga mas mahahalagang problema at usapin na dapat na unahin ang gobyerno.

Mas makabubuti aniya kung ang ibabaling na lamang ng mga ito ang kanilang atensyon sa pagresolba sa mga problema ng bansa sa halip na sa mga nangyayaring awayan sa pagitan ng government officials.

Sinabi pa ng lider ng senado na ang pabigla-bigla at nakababahalang asal ng bise presidente ay nagiging distraction, panggulo o nakakaapekto sa paggawa nito ng kanyang tungkulin bilang pangalawang pangulo ng Pilipinas.  – Sa panulat ni Laica Cuevas

Protectionist trade policy ni Us president elect Donald Trump.

Ito ayon kay Economist Astro Del Castillo ang nakikita nilang dahilan sa pagsirit ng halaga ng piso sa halos anim napung piso kontra isang dolyar.

Sinabi sa DWIZ ni Del Castillo na inaasahan na ng ang posibleng paghihigpit ni trump sa trade exchange sa ibang bansa.

Sinabi pa ni Del Castillo na hindi lamang ang philippine peso kundi maging ang iba pang currency ang apektado nang lumalakas na dolyar matapos ang eleksyon sa amerika.

Puspusang pinag-aaralan  ng Senate Committee on Finance ang panukala ng  ilang senador na dagdagan ang budget ng Office of the Vice President para sa susunod na taon.

Sinabi ni Senator Grace Poe, Chairman ng naturang komite, na posibleng madesisyunan ito ng senado bukas, para maisapinal ang latag ng panukalang 2025 national budget.

Matatandaang nagpasya ang Committee on Finance na i-adopt o sang-ayunan ang desisyon ng kamara na bawasan ng 1.3 billion pesos ang panukalang higit 2 billion pesos na budget para sa  OVP.

Ayon kay Poe, ito ay dahil hindi tumugon ang opisina ng bise presidente sa maraming ulit nilang request para sa mga dokumento na para naman sa paglilinaw ukol sa hinihingi nitong pondo.

Una rito, sinabi ni Senator Joel Villanueva na walo silang senador na gustong padagdagan ang panukalang budget ng ovp na sa ngayon ay nagkakahalaga ng 733 million pesos.

Hinikayat ni vice President Sara Duterte ang mga Pilipino na manawagan ng pananagutan at tunay na serbisyo-publiko sa pamahalaan.

Ginawa ni VP Sara ang pahayag sa isang video live stream, kung saan kanya ring pinasalamatan ang kanyang mga taga-suporta sa pag-protekta kay OVP Chief of Staff at Undersecretary Zuleika Lopez.

Iginiit ng bise-presidente na ayaw niya ng kaguluhan at karapatan ng mga Pilipino na sabihin ang kanilang pananaw sa mga ginagawa ng gobyerno.

Dapat aniyang hingin ng publiko sa pamahalaan kung ano ang karapat dapat para sa kanila at hindi lamang ang para sa pulitiko at mayayaman.

Ang nasawing apela ng pangalawang pangulo ay naganap matapos himukin ni dating presidential spokesperson at Atty. Harry Roque ang mga Pilipino na pumunta sa edsa bilang pagpapakita ng puwersa laban sa administrasyong Marcos.

Plantsado na ang impeachment complaint na ihahain ng grupong Bayan Alyansa Makabayan laban kay vice President Sara Duterte.

Kasunod ito ng naging pahayag ng bise presidente na sakaling may masamang mangyari sa kaniya, may inatasan na itong tao na patayin sina Pangulong Ferdinand Marcos Jr., Liza Araneta-Marco at House Speaker Martin Romualdez.

Dahil dito, sinabi ni  Act Teachers Partylist Representative France Castro na target ng maihain ang reklamo laban sa bise presidente bago matapos  ang taon.

Hinog na hinog na aniya ang impeachment complaint sa pangalawang pangulo kung saan hinihintay na lamang ang desisyon ng People’s Organization.

Una nang umugong ang pagpapatalsik kay VP Sara dahil sa hindi pa rin maipaliwanag na pag wawaldas umano ng milyun-milyon  niyang confidential fund ng OVP at DEPED.

Sa ngayon, mas lumakas pa ang panawagan dahil sa pagbabanta nito sa buhay ng pangulo.

Para naman kay dating senador Leila De Lima bukod sa impeachment, pwede rin aniyang ireklamo ng ibat-ibang criminal charges ang bise presidente gaya ng grave threats, illegal utterances  at  cyberlibel. – Sa panulat ni Jeraline Doinog

Walang plano ang House Committee on Good Government and Public Accountability na itigil ang imbestigasyon sa maling paggamit sa confidential funds ng Office of the Vice President at Department of Education noong 2023.

Ito, ayon kay House Majority Leader Manuel Jose Dalipe  matapos na dalawin ni vp sara ang kaniyang Chief of Staff na si Atty. Zuleika Lopez na nakakulong.

Sinabi naman ni Manila Rep. Joel Chua, na ipagpapatuloy nila ngayong araw ang imbestigasyon at muling inimbitahan ang bise presidente para ipaliwanag kung saan, papaano at kanino ginamit ang 612.5 million pesos na confidential funds sa OVP at DEPED.

Ayon sa mambabatas, hindi magpapatinag ang komite kahit pinagmumura na ang mga ito ng pangalawang pangulo at kahit pa anila nagwawala  ito.

Para naman kay Surigao del Norte Rep. Robert Ace Barbers, walang kinalaman sa pagdinig ang ambisyon ni VP Sara na maging pangulo sa 2028, dahil ang gusto lang aniya ng komite ay maipaliwanag nito ng maayos ang nasabing confidential funds.

Dinepensahan ni Senador Ronald Dela Rosa ang pagmumura ni Vice President Sara Duterte kina Pangulong Ferdinand Marcos Jr., First Lady Liza Araneta-Marcos, at House Speaker Martin Romualdez sa isang online press briefing.

Nag-ugat ang maaanghang na pahayag ni VP Sara laban sa mga Marcos matapos ipag-utos ng kamara ang paglilipat sa Chief of Staff nito na si Atty. Zuleika Lopez sa Women’s Correctional mula sa detention facility sa Batasang Pambansa.

Ayon kay Senador Dela Rosa, tao lamang si VP Sara at sinumang nasa ganoong sitwasyon ay posibleng ganoon din ang maging reaksyon.

Nang tanungin naman kung makasisira ang mga naging aksyon ni VP Sara sa kanyang imahe bilang pangalawang pangulo, iginiit ng senador na ipinauubaya na niya ito sa publiko.

Iginiit ni House Committee on Good Government and Public Accountability Chairman at Manila 3rd District Representative Joel Chua na labag sa konstitusyon ang pag-akto ni Vice President Sara Duterte bilang abogado ng kanyang Chief of Staff na si Atty. Zuleika Lopez.

Nagpakilala si VP Duterte bilang legal counsel ni Lopez at tutulan na maipatupad ang utos ng komite na mailipat ito sa Correctional Institution for Women sa Mandaluyong City mula sa detention facility ng kamara.

Paliwanag ni Cong. Chua, pinagbabawalan ng  saligang-batas na pangulo, ikalawang pangulo at mga miyembro ng gabinete na i-practice ang kanilang profession habang sila ay nakaupo sa nabanggit na mga posisyon. –  Sa panulat ni Jeraline Doinog