DWIZ 882

Tiniyak ng Philippine Health Insurance Corporation na mayroon itong sapat na pondo para sa operasyon at benepisyo ng mga miyembro nito para sa susunod na taon.

Gayunpaman, sinabi ni PhilHealth Spokesperson, Dr. Israel Francis Pargas, na susulat sila kay Pangulong Ferdinand Marcos Jr. para hilingin na pag-aralan ang posibleng epekto ng pagbabawas sa kanilang subsidiya.

Sigurado aniya na maaapektuhan sa 2026 ang administrative expenses ng ahensya dahil naka-depende ito sa social premium contribution.

Una nang dinepensahan ng mga mambabatas ang pagtapyas sa pondo ng PhilHealth dahil hindi naman anila nito ginagamit ang P600-B na reserve funds. - sa panulat ni Laica Cuevas

Malabong makaranas ng water crisis ang mga customer ng Maynilad at Manila Water sa susunod na taon.

Ito ang tiniyak ng Metropolitan Waterworks and Sewerage System-Regulatory Office matapos aprubahan ang ikatlong bugso ng dagdag singil ng dalawang concessionaire simula Enero a – uno.

Ipinaliwanag ni MWSS-RO Chief Regulator Patrick Ty na bunsod ito ng bilyun-bilyong pisong kapital na ginastos ng mga konsesyonaryo upang masiguro ang maaasahan at mas maayos na serbisyo sa kanilang franchise areas.

Ayon kay Ty, gumastos na ang manila water ng 32.6 billion pesos at maynilad ng 47.5 billion pesos para sa taong 2023 hanggang 2024 bilang bahagi ng kanilang Capital Expenditure (CAPEX).

Ito, anya, ay para sa service continuity, service accessibility, water security, environmental sustainability projects, water sources programs, operations support programs, sewerage, programs at iba pang proyekto.

Hindi umano maaaring gamitin ni Vice President Sara Duterte ang kanyang mandato upang pigilan ang impeachment process laban sa kanya.

Ito, ayon sa Commission on Elections, ay kahit pa umani ng tatlumpu’t dalawang milyong boto ang pangalawang pangulo noong 2022 elections.

Ipinaliwanag ni COMELEC Chairman George Garcia na kahit pangulo ay maaaring ma-subject sa tinatawag na impeachment.

Hindi naman anya nangangahulugan ang impeachment na mapapatalsik sa posisyon ang isang opisyal dahil kailangan pang sumailalim ito sa paglilitis ng senado.

Pero kung mapapatunayang guilty, ipinunto ni Garcia na maaaring matanggal sa pwesto ang Bise Presidente at harapin ang iba pang criminal complaints.

Makailang ulit nang tinanggihan ni Duterte ang panawagang magbitiw sa pwesto sa gitna ng imbestigasyon sa sinasabing iregularidad sa paggamit sa daan-daang milyong pisong confidential funds noong 2022 at 2023.

Ikinalungkot ni Education Secretary Sonny Angara sa pagbawas sa budget ng DEPED sa susunod na taon.

Ayon kay Secretary Angara, taliwas ito sa kadalasang ginagawa ng kongreso na ibinibigay sa kanilang departamento ang pinakamalaking pondo.

Ang binawasan anya sa kanilang proposed budget ay ang computerization program ng departmento kung saan popondohan sana ang libu-libong computer at gadgets sa mga pampublikong paaralan.

Nabatid na mula sa 748.65 billion pesos budget na inaprubahan ng kamara, bumaba ang pondo ng DEPED sa 737 billion pesos.

Itinanggi ng Department of Social Welfare and Development ang mga alegasyong isang uri ng pork barrel ang 26 billion pesos na Ayuda para sa Kapos ang Kita Program o AKAP funds.

Ipinaliwanag ni DSWD Secretary Rex Gatchalian na hindi naman mapupunta sa mga mambabatas ang akap funds kundi mismong sa kagawaran.

Layunin ng akap, na isang financial assistance program, na tulungan ang mga minimum-wage earner na apektado ng inflation at hindi saklaw ng iba pang programa ng  DSWD.

Una nang ibinunyag ni Senator Imee Marcos na insertion ang akap fund na hindi isinama sa proposed spending plan ng kanyang kapatid na si Pangulong Bongbong Marcos.

Hinikayat ni Senator Imee Marcos si Pangulong Ferdinand Marcos Jr. na utusan ang kongreso na wag nang ipagpilitan ang impeachment laban kay vice President Sara Duterte.

Giit ng Presidential Sister, kung mayroon mang sapat na dahilan na isampa na lang ang kaso laban sa Pangalawang Pangulo at huwag nang pagwatak-watakin ang sambayanan lalo na ngayong panahon ng kapaskuhan.

Nangangamba rin si Senator Marcos na magpulasan ang mga investor sa gitna ng salpukan ng dalawang pinakamataas na opisyal ng pamahalaan.

Aniya, pinakaayaw ng mga mamumuhunan ang unpredictability at political anxiety dahil hindi alam ng mga ito kung saang direksyon patungo ang bansa, partikular ang mga umiiral na patakaran at regulasyon.

Umaasa si super ate na magkakaroon ng katahimikan at matatapos din ang tinawag niyang ‘napakalupit na pulitika’ para bigyang-daan ang diwa ng pasko.

Matatandaang una na ring umapela ang senador sa pinsang si House Speaker Martin Romualdez na isantabi muna ang ambisyon sa 2028 elections at makinig sa presidenteng tutol sa pagpapa-impeach kay VP Sara.

Pinalawig pa isang taon ng Land Transportation Franchising and Regulatory Board ang Provisional Authority (PA) para sa mga traditional jeep at UV Express upang maipagpatuloy ang kanilang pagbiyahe.

Kinumpirma ng LTFRB na pinalawig ang PA ng individual operators ng mga jeepney at UV ng hanggang December 31, 2025.

Tanging saklaw ng extension ang mga operator na mayroong nakabinbing application for consolidation alinsunod sa public utility vehicle modernization program ng gobyerno.

Nito lamang Nobyembre a-29 nang muling buksan ng LTFRB ng consolidation applications.

Binalaan ng Land Transportation Franchising and Regulatory Board ang publiko sa pagtangkalik sa mga colorum na motorcycle taxis.

Sa harap ito ng mga sumbong na nagpapatay ng app ang mga legitimate motorcycle riders mula sa Transportation Network Companies (TNC) kapag rush hour at nagbu-book sa labas ng app.

Ipinaliwanag ni LTFRB Chairman, Atty. Teofilo Guadiz III na hindi saklaw ng insurance ang mga pasahero ng colorum na sasakyan o motorcycle taxi ay hindi sa oras na maaksidente.

Ang mga rider anyang mapatutunayang guilty o hindi kukuha ng pasahero ay pagmumultahin ng 5,000 pesos at maaaring patawan ng hanggang anim na buwang suspensyon.

Mag-iisyu rin ng resolusyon ang LTFRB technical working group para panagutin din ang mga TNC.

Determinado ang House Quad Committee, na mapanagot sa batas ang tumakas na si dating presidential spokesman Attorney Harry Roque.

Ayon kay Quadcomm overall Lead Chairman at surigao Del Norte 2nd District Representative Robert Ace Barbers, patuloy pang hinahanap ng mga otoridad si Atty. Roque matapos patawan ng contempt at arrest order para sagutin ang pagkakasangkot nito sa iligal na operasyon ng Philippine Offshore Gaming Operators (POGO) at iba pa.

Marami pa anyang dapat ipaliwanag si Roque sa mga ebidensyang inihain ng mga mambabatas laban sakaniya.

Una nang nakalabas ng bansa si Roque kasama ang kaniyang asawa na si Mylah Roque patungong United Arab Emirates.

Gayunman, ipagpapatuloy ng Quadcomm ang paghahanap sa mag-asawa, upang bigyang linaw ang kanilang pagkakasangkot sa POGO.

Hinamon ni Senador Cynthia Villar ang pamahalaan na panagutin ang mga smugglers at mga hoarders ng bigas para mapababa ang presyo ng nasabing produkto.

Ayon sa Senador, maraming negosyante pa rin ang nagsasamantala at nagtatago ng kanilang suplay kahit pa mababa itong inangkat sa ibang bansa.

Inihayag ni Senador Villar na una nang pinirmahan ang republic act 12022 o ang Anti Agricultural Economic Sabotage Law na layong habulin at patawan ng mas mabigat na parusa ang mga sangkot sa smuggling, hoarding, profiteering at cartel pero hanggang ngayon wala pa ring nakakasuhan at nakukulong.

Naniniwala naman ang mambabatas na hindi bababa ang presyo ng bigas hanggang bente pesos kada kilo gaya ng pangako ni Pangulong Bongbong Marcos Jr dahil sa ginawang pagtapyas sa tarpa sa imported rice.