DWIZ 882

Tiniyak ng Armed Forces of the Philippines na tututukan nito ang kaligtasan ni Vice President Sara Duterte sa gitna ng balak nitong kumuha ng  private security services.

Ayon kay AFP Spokesperson Colonel Francel Margareth Padilla, ipagpapatuloy ng militar ang pagsunod sa kanilang mandato, kabilang na rito ang pagbibigay ng seguridad sa Bise Presidente.

Dagdag pa ni Colonel Padilla, titiyakin nilang hindi makokompromiso ang kaligtasan ni VP Sara at iba pang mga pangunahing lider ng bansa.

Nabatid na sinabi ni  AFP Chief General Romeo Brawner Jr. na papalitan nito ang Vice Presidential Security and Protection Group bagama’t hindi ito pinahintulutan ng Bise Presidente.

Tiniyak ng Department of Justice na makakatanggap ng patas na pagtrato si Vice President Sara Duterte.

Kasunod ito ng muling pagliban ng Bise Presidente sa imbestigasyon ng National Bureau of Investigation kaugnay sa pagbabanta kina Pangulong Ferdinand Marcos Jr., First Lady Liza Araneta-Marcos at House Speaker Martin Romualdez.

Gayunman, sinabi ni VP Sara na kaya hindi siya nagtungo  sa NBI ay dahil nakikita niyang wala siyang makukuhang patas na pagtrato.

Para naman kay Justice Undersecretary Jesse Andres, labis siyang nalungkot sa ginawa ng pangalwanag pangulo na muling pang-i-isnab na tila ba may kinikilingan ang NBI.

Ngunit magpapadala pa rin aniya ang NBI ng sulat kay VP Sara dahil anumang imbestigasyon ng PNP at DILG ay mamamayagpag pa rin ang rule of law.

Inatasan ni Pangulong Ferdinand Marcos Jr.ang mga law enforcement at anti-corruption entities na magpatupad ng mas maraming operasyon laban sa mga philippine offshore gaming operations, na nagpapatuloy pa rin ang aktibidad sa Pilipinas.

Ayon sa Presidential Communications Office, ibinaba ng pangulo ang direktiba sa ikalawang Joint National Peace and Order Council-Regional Peace and Order Councils Meeting 2024, sa Kampo Crame.

Inatasan din ng Pangulo ang Philippine Anti-Organized Crime Commission, Philippine National Police, at ang Criminal Investigation and Detection Group na palakasin pa ang kanilang kampanya laban sa POGO.

Matatandaang inanunsyo ni Pangulong Marcos Jr sa kanyang ikatlong State of the Nation Address ang pagpapasara sa POGO operations sa bansa dahil sa talamak na pang-aabuso at kawalan ng respeto sa mga batas ng Pilipnas.

Aprubado na ng Metropolitan Waterworks and Sewerage System ang dagdag-singil sa tubig para sa mga customer ng Maynilad at Manila Water na magiging epektibo simula sa January 1, 2025.

Sa ilalim ng inaprubahang rate adjustments, para sa mga konsyumer ng Manila Water, nasa 2.87 pesos ang dagdag-singil sa mga low-income lifeline customers, 24.68 pesos ang taas-singil sa mga regular residential o kumukonsumo ng 10 cubic meters kada buwan; 54.79 pesos naman sa buwanang singil para sa kumukonsumo ng 20 cubic meters kada buwan, habang may adjustment na 111.83 pesos naman sa mga customer na may konsumong 30 cubic meters.

Ang mga customer naman ng Maynilad na kumukonsumo ng mas mababa sa 10 cubic meters kada buwan o mga low income lifeline customers, ay magkakaroon ng dagdag na 10.56 pesos sa kanilang water bill.

20.08 pesos naman sa regular lifeline customers, 75.89 pesos din ang dagdag sa buwanang singil para sa kumukonsumo ng 20 cubic meters kada buwan, habang may adjustment na 155.53 pesos naman sa mga customer na may konsumong 30 cubic meterskada buwan.

Layon ng taas-singil sa tubig ay para  mapabilis ang capex spending o mga proyekto ng maynilad at manila water na nakatutok sa pagpapaganda ng kanilang mga serbisyo sa publiko.

Tiniyak ng Philippine Amusement and Gaming Corporation na wala nang Philippine Offshore Gaming Operators o POGOs sa bansa sa pagtatapos ng taon.

Ayon kay PAGCOR Chairman Alejandro Tengco, sa katunayan ay sinimulan nila ang pagbuwag sa mga pogos na sangkot sa mga iligal na aktibidad pagkaupo niya sa opisina noong 2022.

Inisyal na 298 online gambling hubs anya ang nagsasagawa ng operasyon sa bansa pero ibinaba ito ng PAGCOR sa 48, bago pa ang tuluyang ipagbawal ang pogo operations.

Iginiit din ni Tengco na pagsapit ng january 1, 2025, ang mga POGO na nag-o-operate, kabilang ang mga nasa probinsya, ay ituturing na iligal dahil sa kanselasyon ng kanilang mga lisensya.

Kasunod nito ay binigyang-diin ni Tengco na nakasalalay ang implementasyon sa law enforcement agencies, dahil kulang ang police power ng PAGCOR.

Ipinauubaya na ni Senadora Imee Marcos kina Pang. Bongbong Marcos at Vice President Sara Duterte kung muling magkakaayos sa gitna ng ingay sa politika.

Ayon sa Presidential Sister, nasa dalawang pinakamataas na opisyal na ng pamahalaan kung talaga bang nasa ‘point of no return’ o may pag-asa pa sa kanilang pagkakaibigan.

Pero umaasa si Senadora Marcos na anoman ang salpukan nina Pang. Marcos at VP Sara, nasa unahan pa rin ng kanilang listahan kung ano ang ikabubuti ng sambayanang Pilipino.

Sagot ito ng senadora nang tanungin tungkol sa panawagan ng ilang mambabatas na mamagitan siya at pag-ayusin ang kaniyang kapatid na Pangulo at matalik na kaibigang Bise-Presidente.

Una nang sinabi ni Senador Marcos na umaasa siyang may himala sa away ng dalawa at idinadaan na lamang niya ito sa dasal at pagtitirik ng kandila.

Nang tanungin naman tungkol sa pagbabanta ni VP Sara kina Pang. Marcos, First Lady Liza Araneta-Marcos at House Speaker Martin Romualdez, sinabi ng senador na palagi namang may banta sa buhay ng mga Marcos, gaya ng mga Duterte kaya sila bantay-sarado ng security escorts.

Idiniin niyang ‘given’ na ang death threats sa kanilang buhay kaya hindi na ito dapat na pinag-uusapan pa.

Inamin ni Vice President Sara Duterte na inalok sya ng kanyang amang si dating pangulong Rodrigo Duterte na sagutin ang pagkuha ng mga abogado na humahawak sa inihaing impeachment complaint ng kongreso laban sa kaniya.

Gayunman, sinabi ni VP Sara na tinanggihan niya ang alok ng kaniyang ama dahil napaghandaan na anila ang impeachment case.

Matagal na aniya ito napaghandaan matapos ang walang tigil na pag-atake sa kaniya ng kongreso kabilang na rito si Act Teachers Party-List Representative France Castro.

Sa ngayon  dalawang reklamo ng impeachment na ang isinampa laban sa kaniya sa Kamara.

Iginiit mismo ni Vice President Sara Duterte na hindi siya umiiwas sa mga tanong ng mga mambabatas hinggil sa paggamit ng confidential funds ng Office of the Vice President at Department of Education.

Ayon sa Bise Presidente, malinaw na ‘political attack’ ang gingawa sa kanya ng Kamara.

Nanindigan din si VP Sara na hindi siya magbibigay ng anumang paliwanag kaugnay sa paggastos ng confidential funds ng kanyang tanggapan at DEPED.

Kinuwestiyon naman ni VP Sara kung bakit hindi iniimbestigahan ang Office of the President kaugnay ng paggastos nito sa confidential funds.

Batay sa report ng Commission on Audit, lumabas na na ang nasabing tanggapan ang may pinakamalaking gastos ng confidential at intelligence funds noong nakaraang taon.

Inaasahan na ni Vice President Sara Duterte na hindi magiging patas ang pagsisiyasat ng national bureau of investigation kaugnay sa kanyang pagbabanta laban kay Pangulong Ferdinand Marcos Jr.

Giit ng Pangalawang Pangulo, sa umpisa pa lamang ay mayroon nang desisyon para maghain ng kaso laban sa kanya.

Sinabi pa ni VP Sara na hindi niya pinagsisisihan ang kanyang binitiwang pahayag na may kinausap siya para patayin sina PBBM, First Lady Liza Araneta-Marcos at House Speaker Martin Romualdez, kapag may nangyaring masama sa kanya.

Sinabi naman ng Bise Presidente na wala siyang plano na magtago o umalis ng Pilipinas, sakaling arestuhin siya sa gitna ng mga kinakaharap na legal issues at impeachment complaints.