DWIZ 882

I-aatras na ni Atty. Jude Sabio ang kanyang isinampang kasong crime against humanity laban kay Pangulong Rodrigo Duterte sa International Criminal Court (ICC).

Kaugnay ito ng mga umano’y mga paglabag sa ilalim ng kampanya kontra illegal droga ng pamahalaan.

Ayon kay Sabio, nakatakda siyang magtungo ng ICC para personal na isumite ang kanyang sulat na humihiling ng withdrawal ng kanya ICC communication kay Prosecutor Fatou Bensouda.

Mahigpit din aniyang hihilingin na isantabi o maibasura ang nabanggit na kaso dahil bahagi lamang aniya ito ng political propaganda nina dating Senador Antonio Trillanes, Senadora Leila De Lima at ng oposisyon.

Iginiit ni Sabio, hindi niya nais maging mabahagi ng nabanggit na political propaganda.

Si Sabio ang tumayong ng dating pulis at umaming hitman ng Davao death squad na si Edgar Matobato.

Kanselado na ang klase bukas Miyerkules, January 15, 2020 matapos ang pag-aalburuto ng Bulkang Taal sa mga sumusunod na lugar:

CALABARZON

Cavite Province – All levels (public at private)

Laguna Province – All levels (public at private)

Batangas Province – All levels (public at private)

Pinagpapaliwanag ni Interior and Local Government Secretary Eduardo Año si PNP OIC Police Lt. Gen. Archie Francisco Gamboa.

Ito ay makaraang magkahalo-halo ang ilang terms & figures sa pondo ng Philippine National Police (PNP) sa isinagawang joint command conference kasama ang AFP sa Malakanyang kamakailan.

Ayon kay Año, naniniwala siyang honest mistake lamang ng nangyari kaya kanya nang inatasan si Gamboa na magsumite ng report kay Pangulong Rodrigo Duterte para maisaayos ang gusot at mapawi ang mga pagdududa sa pondo ng PNP.

Dagdag pa ni Año, naging maayos naman aniya ang procurement sa kagamitan ng PNP sa nakalipas na dalawang taon.

Magugunitang inatasan ni Pangulong Duterte si Año na pamahalaan ang procurement ng PNP sa paniniwalang nababahiran na ito ng katiwalian. — ulat mula kay Jaymark Dagala (Patrol 9)

Welcome sa PHIVOLCS ang panukalang magsagawa ng cloud seeding sa mga lugar na matinding naapektuhan ng ash fall dala ng pagputok ng Bulkang Taal.

Ayon kay Department of Science and Technology (DOST) Undersecretary at PHIVOLCS Director Renato Solidum, sa kabuuan ay isang magandang ideya ang cloud seeding para makatulong ang mabubuo nitong ulan sa paglilinis ng mga ibinugang abo ng Taal Volcano.

Gayunman, iginiit ni Solidum na kinakailangang mapagplanuhan at mapag-aralan nangg maigi ang pagpapatupad nito.

Aniya, dapat makita kung gaano kalaki o dami ang magagawa nitong ulan at kung saan ito babagsak dahil maaari itong magresulta sa pagbaha at pamumuo ng lahar.

Dagdag ni Solidum, nakalilikha din ng sariling ulan ang pagsabog ng Taal tulad noong unang pagbuga nito ng abo noong Linggo, ika-12 ng Enero.

Tiniyak ni Health Secretary Francisco Duque III na mapaparusahan ang mga negosyanteng mapatutunayang nagho-hoard o nagtatago ng mga face masks para makontrol ang presyuhan nito.

Ayon kay Duque, may paglalagyan at papatawan ng parusa ang mga mapatutunayang nanamantala sa kasalukuyang sitwasyon sa bansa.

Sa gitna naman ng ulat na pagkakaubusan na ng stock ng mga N95 masks, sinabi ni Duque na maaari nang gamitin na alternatibo ang mga surgical mask lalo na sa mga lugar na mahina lamang ang ash fall.

Paliwanag ni Duque, makapagbibigay na ng sapat na proteksyon ang mga surgical masks sa mga lugar na mahihina ang ash fall dahil may sarili namang air filtering system ang katawan ng tao.

Dagdag ni Duque, patuloy nilang minomonitor ang nasa 61 mga evacuation centers lalo na’t karaniwang nakararanas ng pananakit ng ulo, lagnat, hypertension, acute gastroenteritis at respiratory tract infection ang mga biktima ng pag-aalburuto ng bulkan.

Patuloy ang pagpapalikas ng pamahalaan sa mga manggagawang Pilipino sa Libya.

Sa kabila ito ng naging kasunduan sa pagitan ng Government National Accord at Libyan National Army ni Khalifa Haftar na magpatupad ng ceasefire o tigil-putukan.

Ayon kay Ambassador Elmer Cato, nananatili pa ring nakataas ang alert level 4 sa Tripoli at iba pang lugar sa Libya kaya patuloy pa rin ang mandatory evacuation doon.

Sinabi ni Cato, sa ngayon meron pa lamang 12 Pilipino sa Libya ang humiling ng tulong para sa repatriation.

Kasabay nito, nanawagan si Cato sa iba pang mga Pilipino sa Libya na hindi pa handang iwan ang kanilang trabaho ay tiyakin na lamang na nakakaiwas sila sa kaguluhan.