DWIZ 882

Tumaas na ang presyo ng tilapia sa ilang mga palengke sa Metro Manila.

Bunsod ito ng pagbaba sa suplay ng tilapia kasunod ng pagputok ng Bulkang Taal.

Tulad sa Commonwealth Market sa Quezon City kung saan tumaas ng P20 ang presyo ng kada kilo na tilapia na mabibili na sa P120 mula sa dating P100.

Ayon sa Department of Agriculture (DA), umaabot sa 15 metriko tonelada suplay ng tilapia ang nawala kasunod ng pag-aalburuto ng Bulkang Taal.

Pagtitiyak naman ng DA, naghahanap na sila ng alternatibong mapagkukunan ng suplay para hindi na rin sobrang maapektuhan pa ang presyo nito.

Samantala, nananawagan ang DA sa mga supplier ng tilapia na huwag samantalahin ang sitwasyon para kumita.

Nakahanda si Pangulong Rodrigo Duterte na personal na magtungo sa Gitnang Silangan sakaling mahirapan ang iba’t-ibang ahensiya ng pamahalaan sa repatriation ng mga manggagawang Pilipino doon.

Kasunod na rin ito ng paglalayag na ng dalawang barko ng Philippine Navy para pangunahan ang repatriation efforts sa mga OFW’s na posibleng maipit sa tensyon sa pagitan ng Iran at Estados Unidos sa Middle East.

Ayon kay Pangulong Duterte, mahigpit niyang susubaybayan ang biyahe ng BRP Davao Del Sur at Ramon Alcaraz hanggang makarating ang mga ito sa Jeddah, Saudi Arabia.

Iginiit ni Pangulong Duterte, sakaling kailanganin ang kanyang presensiya sa pagpapatupad ng repatriation, hindi aniya siya magdadalawang isip na magtungo ng Gitnang Silangan.

Pinangunahan ni Pangulong Rodrigo Duterte ang send-off ceremony ng BRP Davao Del Sur at Ramon Alcaraz na ginanap sa Port Area sa Manila City.

Patungong Middle East ang dalawang nabanggit na barko ng Philippine Navy para pangunahan ang repatriation ng mga Overseas Filipino Workers sa Baghdad Iraq at iba pang bansa posibleng maapektuhan ng tensyon sa pagitan ng Iran at United States.

Sakay ng BRP Davao Del Sur at Ramon Alcaraz ang umaabot sa 1,000 mga tauhan ng Armed Forces of the Philippines (AFP) na tutulong sa repatriation.

Sa kanyang naging mensahe, sinabi ni Pangulong Duterte na pangunahing inaalala ng pamahalaan ang interes at kaligtasan ng mga Pilipino sa Gitnang Silangan.

Umaasa naman ang Pangulo na magtatagumpay ang AFP sa kanilang layunin na mailikas ang mga Pilipino sa Gitnang Silangan na posibleng maipit sa napipintong kaguluhan doon.

Kaugnay nito, pinabaunan ni Pangulong Duterte ng dasal at pag-asa ang tropa ng AFP at Philippine Navy para sa matagumpay na pagtupad sa kanilang tungkulin.

Naantala ang biyahe ng unang batch ng mga Pilipino sa Iraq na pabalik na sana ng pilipinas.

Batay sa ulat, bigong makalipad paalis ng Baghdad International Airport ang mga nabanggit na Pilipino dahil sa problema sa exit visa.

Ayon kay Middle East special envoy Roy Cimatu, nakatakda sana siyang makipagkita sa unang batch ng mga OFW’s sa King Hamad International Airport sa Doha, Qatar.

Sa naturang airport aniya naka-schedule ang biyahe ng mga ito pabalik ng Pilipinas, kahapon ng 3:00 ng madaling araw, oras sa Pilipinas.

Sinabi ni Cimatu, nananatili pa rin sa Baghdad ang nabanggit na grupo ng mga Pilipino kasama ang opisyal ng Pilipinas sa pangunguna ni Charge D’ Affairs Jomar Sadie.

Umaasa naman si Cimatu na agad ding mareresolba ang problema sa exit visa ng mga ito sa lalong madaling panahon.

I-aatras na ni Atty. Jude Sabio ang kanyang isinampang kasong crime against humanity laban kay Pangulong Rodrigo Duterte sa International Criminal Court (ICC).

Kaugnay ito ng mga umano’y mga paglabag sa ilalim ng kampanya kontra illegal droga ng pamahalaan.

Ayon kay Sabio, nakatakda siyang magtungo ng ICC para personal na isumite ang kanyang sulat na humihiling ng withdrawal ng kanya ICC communication kay Prosecutor Fatou Bensouda.

Mahigpit din aniyang hihilingin na isantabi o maibasura ang nabanggit na kaso dahil bahagi lamang aniya ito ng political propaganda nina dating Senador Antonio Trillanes, Senadora Leila De Lima at ng oposisyon.

Iginiit ni Sabio, hindi niya nais maging mabahagi ng nabanggit na political propaganda.

Si Sabio ang tumayong ng dating pulis at umaming hitman ng Davao death squad na si Edgar Matobato.

Kanselado na ang klase bukas Miyerkules, January 15, 2020 matapos ang pag-aalburuto ng Bulkang Taal sa mga sumusunod na lugar:

CALABARZON

Cavite Province – All levels (public at private)

Laguna Province – All levels (public at private)

Batangas Province – All levels (public at private)

Pinagpapaliwanag ni Interior and Local Government Secretary Eduardo Año si PNP OIC Police Lt. Gen. Archie Francisco Gamboa.

Ito ay makaraang magkahalo-halo ang ilang terms & figures sa pondo ng Philippine National Police (PNP) sa isinagawang joint command conference kasama ang AFP sa Malakanyang kamakailan.

Ayon kay Año, naniniwala siyang honest mistake lamang ng nangyari kaya kanya nang inatasan si Gamboa na magsumite ng report kay Pangulong Rodrigo Duterte para maisaayos ang gusot at mapawi ang mga pagdududa sa pondo ng PNP.

Dagdag pa ni Año, naging maayos naman aniya ang procurement sa kagamitan ng PNP sa nakalipas na dalawang taon.

Magugunitang inatasan ni Pangulong Duterte si Año na pamahalaan ang procurement ng PNP sa paniniwalang nababahiran na ito ng katiwalian. — ulat mula kay Jaymark Dagala (Patrol 9)