DWIZ 882

Maglalaan ng mahigit P21-milyong pondo ang Department of Agriculture (DA) bilang ayuda sa 17 bayan na apektado ng pag-aalburoto ng bulkang Taal.

Batay kasi sa datos ng DA, pumalo na sa mahigit P500-milyon ang halaga ng pinsala ng pagputok ng bulkang Taal sa sektor ng agrikultura.

Kasabay nito, ipinabatid din umano ng Bureau of Plant Industry ang kanilang ipamamahaging 5,000 coffee mother plant at 1,000 cacao seedling.

Naghahanda na rin umano ang Bureau of Fisheries and Aquatic Resources (BFAR) ng mga fingerlings ng tilapia, ulang, hito, karpa, at ayunging na mapalalaki lamang sa taal lake sa oras na maging maaayos na ang sitwasyon dito.

Sinabi rin ng DA na may pondo ring maasahan ang mga magsasaka at mangingisda na kumuha ng insurance sa Philippine Crop Insurance Corp.

Kuntento si Pangulong Rodrigo Duterte sa ginawang pagtugon ng mga ahensya ng gobyerno sa pag-aalburoto ng bulkang Taal.

Sa isinagawang situation briefing sa Batangas City kung saan nagtungo ang pangulo, pinuri nito ang pagkilos ng mga ahensya ng gobyerno dahil aniya walang napaulat na nasawi o nagkasakit sa mga lumikas na residente dahil sa pagputok ng bulkang Taal.

I am very satisfied with the response of everybody and the fact that no one was killed and no one is really very sick,” ani Pangulong Rodrigo Duterte.

Kasabay nito, nag biro ang pangulo na posible umanong nakalimutan ng mamamayan na mag-alay sa bulkang Taal kaya ito ay nag-iingay ngayon.

Ayon sa pangulo, higit niyang pinaniniwalaan ang kapangyarihan ng Diyos, ngunit wala rin naman aniyang mawawala kung susubukan ang pag-aalay na ginagawa umano nuong unang panahon.

Maybe you have failed to make some offerings there. You should go there and say a little prayer and offer something…it was true then, it might be true now.”

Nagpatupad na ng lockdown ang mga otoridad sa 6 na bayan sa Batangas na apektado sa sitwasyon ng bulkang Taal.

Ayon kay Brig. Gen. Marcillano Teofilo, pinuno ng Task Force Taal ng Philippine Army, layon ng naturang hakbang na iligtas ang mga residente sa naturang mga bayan sa nakaambang kapahamakan dahil sa patuloy na pag-aalburoto ng bulkang Taal.

Naglagay na umano sila ng checkpoint sa entry at exit points para maharang ang mga motorista o residenteng magpipilit na bumalik sa kanilang tahanan.

Kasabay nito, humingi ng pang-unawa ang mga otoridad sa lahat ng residenteng apektado.

Kabilang sa mga bayan na nilagay lockdown ay ang Talisay, Balete, Lemery, San Nicolas, Agoncillo at Laurel.

Pinaalalahanan ni Pangulong Rodrigo Duterte ang mga Batangueño na huwag munang bumalik sa kanilang tahanan dahil hindi pa rin tiyak ang kaligtasan bunsod ng patuloy na pag-aalburoto ng bulkang Taal.

Sa pagtungo mismo ng pangulo sa Batangas Provincial Sports Complex para mamahagi ng tulong sa mga pamilyang apektado ng pagputok ng bulkang Taal, sinabi nito sa mga residente na wala munang babalik sa kanilang bahay hangga’t hindi pa kalmado ang bulkang Taal at hindi pa tiyak ang kaligtasan sa lugar.

Kasabay nito, tiniyak ng pangulo na may sapat na pondo at relief supplies ang pamahalaan para ayudahan ang mga residenteng apektado ng bulkang Taal.

Pinangunahan ni Pangulong Duterte ang pamamahagi ng P3,000 financial aid at food packs sa bawat pamilya na nasa evacuation center.

Haharap sa kasong profiteering at pagmamanipula ng presyo ang 7 tindahan sa Maynila matapos na magbenta umano ng face mask sa napakataas na halaga.

Ayon kay Trade Undersecretary Ruth Castelo, bukod sa mga isasampang kaso, kanila ring irerekomenda sa Manila City Hall na ipasara na ang naturang mga tindahan dahil sa pananamantala.

Sinabi ni Castelo na ibinenta ng naturang mga tindahan ang N95 face mask sa halagang P150.

Aniya dapat ay sampung porsyento lang ang kita ng mga nagtitinda ng face mask kaya’t kung ang presyo nito sa supplier ay P65, aabot lang dapat sa P72 ang kanilang bentahan.

Tumaas ang demand para sa face mask partikular sa N95 mask dahil sa nararanasang ash fall bunsod ng pag-aalburoto ng bulkang Taal.

Maaaring mag-avail ng limang araw na special emergency leave ang mga empleyado ng pamahalaan.

Ito ang inanunsyo ng Civil Service Commission (CSC) sa gitna na rin ng nagaganap na pag-aalburuto ng Bulkang Taal.

Ayon kay CSC Commissioner Aileen Lizada, alinsunod sa memorandum circular numbers 2 at 16 na ipinalabas noong Febuary 16 at October 17 ng 2012, isinasaad ang pagkakaloob ng special emergency leave sa mga kawani ng pamahalaan.

Aniya, maaaring i-apply ng isang government employee ang kanilang special emergency leave sa magkakasunod na limang araw o magkakahiwalay.

Dagdag ni Lizada, hiwalay ang nasabing mga leave sa mismong leave credits ng mga kawani ng pamahalaan.

This is intended to repair or clean up yung mga bahay nila or stranded ba sila, or to care for immediate family members hindi ito babawasan sa vacation leave or sa sick leave, we just want to reiterate itong MC na ito baka nakalimutan na ng ibang government officials or employees ito, the head of the office shall take full responsibility pag-grant ng special emergency leave and then i-verify niya kung yung area niya o yung empleyado under state of calamity,” ani Lizada.

Nakaamba pa rin ang posibilidad ng malaki at mapaminsalang pagsabog ng Bulkang Taal.

Ito ang inihayag ng Philippine Institute of Volcanology and Seismology (PHIVOLCS) kasunod ng mga nakitang fissure o bitak sa lupa sa ilang mga bayan sa Batangas.

Ayon kay PHIVOLCS – volcano monitoring and eruption prediction Division Chief Mariton Bornas, ang mga nararamdamang malalakas na lindol at nangyayaring fissuring sa Batangas ay hudyat ng pagkakaroon ng malaking volume ng magma.

Posible aniyang ilabas ito ng Bulkang Taal sa pamamagitan ng isang malakas na eruption.

Sinabi pa ni Bornas, sa ngayon hindi pa gaanong naghihiwalay ang lupa na hindi aniya katulad ng naitala noong 1911 kung saan lumubog ang lupa matapos ang malakas na pagsabog.

Batay sa tala ng PHIVOLCS, nakitaan ng fissure o pagbibitak ng lupa ang mga Barangay Sinisian, Mahabang Dahilog, Dayapan, Palanas, Sangalang at Poblacion sa Lemery; Barangay Pansipit sa Agoncillo; Poblacion 1, 2, 3 at 5 sa Talisay; at Poblacion sa San Nicolas.

Binabantayan ng PHIVOLCS ang dami ng ibubugang sulfur dioxide ng Bulkang Taal kasunod ng pagputok nito.

Ayon kay PHIVOLCS Executive Director Undersecretary Renato Solidum, nakaalpas na ang sulfur sa Bulkang Taal na maaaring maging mapanganib oras na mahalo sa hangin at mabuong abo.

Sinabi ni Solidum, delikado ang abo na may sulfur lalo na kung madami ang malalanghap sa mahabang panahon na magreresulta naman sa pagkahilo at iba pang problema sa kalusugan.

Habang makakapagdulot din ito ng pangangati sa balat.

Nitong Lunes, Enero 13 pumalo sa 5299 tonnes per day ang naitalang sulfur dioxide na ibinuga ng bulkang taal.

Bumaba ng 6.12% ang bilang ng krimen sa National Capital Region (NCR) nitong 2019.

Ayon kay NCRPO Acting Chief Brig. General Debold Sinas, umaabot sa mahigit 48,000 mga krimen ang naitala noong nakaraang taon.

Mas mababa aniya ito sa naitalang mahigit 51,000 krimen noong 2018.

Sinabi ni Sinas, partikular na naitala ang 7.55% pagbaba sa mga index crimes tulad ng murder, homicide, physical injury, robbery, rape, theft at carjacking.

Habang 5.59% naman ang naging pagbaba sa mga non-index crimes o mga paglabag sa mga local ordinance at mga aksidente sa sasakyan.