DWIZ 882

Lumikha ang Google Philippines ng isang consolidated map na nagpapakita ng mga lugar na kinaroroonan ng mga evacuation centers para sa mga biktima ng bulkang Taal.

Ayon sa google, naging posible ang naturang map dahil na rin sa impormasyon mula sa Batangas Public Information Office.

Layon nitong matulungan ang mga biktima lalo na ang mga evacuees at kanilang kaanak gayundin ang mga nagnanais na maghatid ng tulong.

Para magamit ito, magtungo lamang sa google.com at i–click ang evacuation centers for the Taal eruption.

Natakdang isarado ang ilang lansangan sa Pandacan, Maynila para sa pagdiriwang ng Buling–buling festival ngayong araw, January 18.

Ayon sa advisory ng Manila City Government, magsisimula ang parada sa Sto. Niño Parish Church patungong Teodoro San Luis-Hilom–Narciso hanggang Jesus Industria–Hilom–Laborer pabalik sa simbahan.

Dahil dito, isasara muna ang mga sumusunod na kalsada simula 11:00 ng umaga:

• Jesus St/ Nagtahan
• East Zamora / President Quirino
• Pedro Gil St/ Carreon St
• Beata / Laura

Umabot sa 653 ang naitalang volcanic earthquake ng Phivolcs simula nang mag alburoto ang bulkang Taal nuong Linggo, January 12.

Ayon sa Philvolcs, ang mga nararanasang pag galaw ng lupa ay senyales na patuloy ang magmatic intrusion sa bulkan na maaring mauwi sa mga susunod pang pagsabog.

Simula 8:00 ng umaga kahapon Biyernes, January 17 ay mayroong mahihinang pagbuga ng abo ang bulkan at may naitalang 5 mahihinang pagsabog.

Nanatili naman sa alert level 4 ang Taal volcano na nangangahulugan na posible pa rin ang hazardous explosive eruption sa susunod na mga oras at araw.

Apektado rin ng pag-aalburoto ng bulkang Taal ang may halos 300 pulis.

Ayon kay PNP Officer in Charge Police Lt. Gen Archie Gamboa, ang naturang mga pulis ay mula sa Calabarzon.

Kaugnay nito, inaasahan ng PNP na hindi agad na makababalik sa trabaho ang mga apektadong pulis para tutukan muna ang kanilang pamilya at kabuhayan.

Dahil dito,  handa naman ang PNP National Headquarters na magpadala ng dagdag na pulis para magbigay ayuda sa PNP Region 4A.

Naghanda naman ang PNP ng N95 mask, goggles at raincoats sa mga pulis na naka deploy sa mga evacuation centers at relief efforts.

Nagkaloob ng $200,000 na donasyon ang South Korea sa mga nasalanta ng bulkang Taal.

Pinangunahan ni Korean Ambassador to the Philippines Han Dong–Man ang pag-aabot ng tulong sa Philippine Red Cross.

Nagpasalamat naman dito si Senator at Red Cross Chairman Richard Gordon sa aniya ay mabilis na pagtugon at pagtulong ng SoKor sa mga biktima ng bulkang Taal.

Dahil sa naturang donasyon, mas marami pa aniyang mga hygiene kits, food at non–food items, sleeping kits, portable water, portalets at iba pang pangangailangan ng mga nasalanta ang matutugunan.

Umapela si Cagayan De Oro Rep. Rufus Rodriguez kay Solicitor General Jose Calida na irekonsidera nito ang paghahain ng quo warranto petition para kwestiyonin ang validity ng prangkisa ng ABS-CBN.

Ayon kay Rodriguez, kung itutuloy ito ni Calida ay makikita lamang ito bilang pang ha-harrass ng gobyerno sa naturang istasyon at pagsikil sa ‘press freedom’ na paglabag naman sa konstitusyon.

Una nang sinabi ni Presidential Spokesman Salvador Panelo ang naturang plano ng Solicitor General na bunsod na rin aniya ng ilang pronouncement ng Pangulo laban sa istasyon.

Nakatakdang mag expire ang prangkisa ng ABS–CBN sa Marso samantalang naka pending ang panukalang franchise renewal nito sa Kongreso.

Mahigit 9,000 mga manok ang ipinamigay ng isang poultry sa Agoncillo, Batangas kasunod ng pag aalburoto ng bulkang Taal.

Ayon kay Agoncillo Councilor Crister de Leon, may ari ng poultry farm, libre niyang ipinamigay ang mga manaok upang mapakinabangan pa ito.

Aniya, sigurado kasing mamatay din ang naturang mga manok sakaling mas lumalala pa ang sitwasyon sa naturang bayan na bahagi ng danger zone ng bulkang Taal.

Samantala, nakuha na rin ng mga may ari ang kanilang mga alagang hayop tulad ng baka, baboy at kabayo na sinasabing ibebenta na lamang ng palugi para kanilang mapakinabangan.

Nasira ang instrumento ng Philvolcs na ginagamit sa pagsukat ng sulfur dioxide emission ng bulkang Taal.

Ayon kay Philvolcs Volcano Monitoring and Eruption Prediction Division Chief Mariton Bornas, masyadong sensitive ang flyspec na aparato kaya nagka problema ito ng matabunan ng abo.

Aniya, dadalhin na sa taal ang flyspec mula sa Mayon volcano para muling ma monitor ang sulfur dioxide sa bulkang Taal.

Mahalaga aniya ang monitoring ng sulfur dioxide dahil ang presensiya nito sa hangin ay nangangahulugang paakyat na ang magma ng bulkan.

Aprubado na ni Pangulong Rodrigo Duterte ang rekomendasyon ng Department of Labor and Employment na total ban sa pagpapadala ng mga Pilipinong manggagagwa kabilang ang mga skilled worker sa Kuwait.

Ayon kay Presidential Spokesperson Salvador Panelo, ang pasiya ng Pangulo ay kasunod ng tila tangka ng Kuwaiti Government na itago ang impormasyon hinggil sa pagkasawi ng Pinay household worker na si Jeanelyn Villavende.

Ito ay matapos naman aniyang lumabas sa isinagawang re-autopsy ng NBI kay Villavende kung saan lumabas na nakaranas ito ng seksuwal na pang-aabuso.

Iginiit naman ni Panelo na mananatiling epektibo ang total deployment ban sa Kuwait hangga’t hindi matitiyak ng Kuwait na kanilang ipatutupad ang lahat ng nakasaad sa nilagdaang labor agreement sa pagitan ng dalawang bansa. — ulat mula kay Jopel Pelenio (Patrol 17)