DWIZ 882

Pinatitiyak ng Commission on Human Rights (CHR) sa pamahalaan na hindi dapat mauwi sa authoritarian tendencies ang paghahabol sa mga nagpapakalat ng fake news ukol sa 2019 novel coronavirus acute respiratory disease (2019 nCoV-ARD).

Ayon kay CHR spokesperson Atty. Jackie De Guia, labis aniya nilang ikinababahala na magresulta umano sa diskriminasyon sa tao at ibang lahi ang outbreak ng 2019 nCoV-ARD.

Bagama’t normal lang na mabahala at matakot sa sakit na dulot ng nasabing virus ang mga kakaunti lang ang nalalamang impormasyon, sinabi ni De Guia na hindi dapat manaig ang maling pagtrato sa ibang tao.

Kasunod nito, hinimok ni De Guia ang pamahalaan na mas pagtuunan ng pansin ang pagtukoy sa sinumang nagtataglay ng nasabing virus hanggang sa tuluyan itong mapigilan sa pagkalat at masupil.

Pinaiimbestigahan ni Philippine National Police (PNP) Chief P/Gen. Archie Francisco Gamboa kung totoong sangkot nga sa illegal drug trade ang 357 mga pulis.

Ito, ani Gamboa, ay kabilang din sa drug watch list ni Pangulong Rodrigo Duterte kung saan, one star o brigadier general ang may pinakamataas na ranggo.

Sinabi ng PNP chief, hindi muna niya isasapubliko ang pangalan ng mga ito lalo’t sisimulan na nila bukas ang adjudication at validation process at tatagal ito sa loob ng isang buwan.

Sisimulan aniya ito sa regional at directorial staff adjudication boards at saka ipapasa naman sa national adjudication board na pangungunahan ng deputy chief PNP for administration saka isusumite kay Pangulong Duterte.

Pagtitiyak ni Gamboa, aalisin sa listahan ang sinumang pulis na mapatutunayang inosente habang ipaghaharap naman ng mga kasong administratibo at kriminal ang mga mapatutunayang sangkot nga sa ilegal na droga.

Nanindigan si Presidential Spokesman Atty. Salvador Panelo sa pagnanais ni Pangulong Rodrigo Duterte na tuluyan nang ibasura ang visiting forces agreement (VFA).

Ito ang reaksyon ni Panelo makaraang tawaging ‘fake news’ ni Defense Sec. Delfin Lorenzana na ipinag-uutos na ng pangulo ang pagpapadala ng abiso sa Amerika para sa tuluyang pagbasura sa nasabing kasunduan.

Ayon kay Panelo, posibleng hindi pa natatanggap ni Executive Secretary Salvador Medialdea ang kopya ng kautusan ng pangulo, subalit ito aniya ang resulta ng kanilang naging pag-uusap.

Magugunitang sinabi ni Lorenzana na wala naman silang natatanggap ni Foreign Affairs Sec. Teddy Boy Locsin Jr. na kopya ng kautusan mula kay Medialdea kaya’t maituturing aniyang hindi totoo ang mga naglabasang ulat hinggil sa isyu.

Lumobo na sa higit 800 ang bilang ng mga nasawi dahil sa 2019 novel coronavirus acute respiratory disease (2019 nCoV-ARD) mula sa China.

Ito’y makaraang maitala pa ang panibagong 81 katao na nasawi mula sa Hubei Province sa China —ang sentro at pinakatimaan ng naturang virus.

Kinumpirma rin ng health commission ng Hubei na kanila pang naitala ang panibagong 2,147 bagong kaso ng 2019 nCoV-ARD.

Sa ngayon ay nasa kabuuang 803 na ang bilang ng mga nasawi sa 2019 nCoV-ARD at nasa 36,690 naman ang kabuuang kumpirmadong kaso nito.

Umabot na 267 ang bilang ng mga persons under investigation (PUI) dahil sa 2019 novel coronavirus acute respiratory disease (nCoV-ARD).

Sa inilabas na Facebook post ng official account ng Department of Health (DOH) ngayong Sabado, makikita ang isang tally chart kung saan nakalahad ang mga bilang ng PUIs sa ibat ibang bahagi ng bansa.

Lumabas sa tally na nangunguna ang National Capital Region (NCR) sa may pinakamaraming PUIs sa bilang na 103, kung saan 6 dito ay discharged na at 93 naman ay kasalukuyang naka admit.

Sa ngayon, sinabi ng DOH na nanatiling sa 3 ang bilang ng confimed case ng nCoV-ARD sa bansa.

Posibleng nagmula sa Pangolin na ilegal na ipinuslit sa China ang pagkalat ng 2019 novel coronavirus acute respiratory disease (2019 nCoV-ARD) sa nabanggit na bansa.

Batay ito sa isinagawang pag-aaral ng mga researcher ng South China Agricultural University kung saan kanilang nadiskubre na 99% magkatulad ang genome sequence ng nakitang virus sa Pangolin at sa mga pasyenteng may 2019 nCoV-ARD.

Una nang pinaniniwalaang nagmula ang bagong virus sa mga paniki na ibinebenta sa isang palengke sa Wuhan City.

Gayunman naniniwala ang mga eksperto na mayroong intermediate host ang pagkakalipat ng virus mula sa paniki patungo sa mga tao at ito anila ang Pangolin.

Tiwala naman ang mga eksperto na magiging malaki ang tulong ng bagong nadiskubre para mapigilan ang pagkalat ng 2019 nCoV-ARD.

Asahan na ang ikaapat na sunod na linggo ng rollback sa presyo ng mga produktong petrolyo.

Batay sa pagtaya ng mga source sa industriya ng langis, maglalaro sa P0.50 hanggang P0.70 ang tapyas sa presyo ng bawat litro ng diesel.

Habang P0.25 hanggang P0.40 naman ang bawas-presyo sa kada litro ng gasolina.

Ang panibagong rollback ay bunsod naman ng patuloy na pagbaba sa presyo ng mga imported na langis sa pandaigdigang merkado.

Samantala, una nang nag-anunsyo ng P0.60 kada litro na tapyas sa diesel at P0.30 kada litro na bawas sa gasolina ang kumpanyang Phoenix Petroleum, epektibo ngayong alas-6 ng umaga.

Pumalo na sa 56 ang bilang ng mga ililikas na Pilipino mula sa Wuhan City, ang itinuturing na ground zero ng 2019 novel coronavirus acute respiratory disease (nCoV-ARD) sa China.

Ayon kay Foreign Affairs Undersecreatry Brigido Dulay, agad na ililipad pabalik ng Manila ang mga nabanggit na Pinoy oras na makakuha na sila ng go-signal mula sa mga awtoridad sa China.

Aniya, nakaantabay na ang limang kawani ng DFA at lima rin mula sa Department of Health para sa repatriation.

Sinabi ni Dulay, dahil kalat-kalat ang mga Pilipino sa Wuhan City, isinasaayos na nila ang pagtitipon sa mga ito sa iisang lugar sa lungsod para sa mabilis na paglilikas sa mga ito.

Dagdag ni Dulay, may inilatag ng proseso ang Chinese government na kanilang susundin para mabilis na repatriation.

Samantala, posible naman aniyang mabawasan ang bilang ng mga ililikas na Pilipino kung makikitaan ang ilan sa mga ito ng sintomas ng trangkaso.