DWIZ 882

Umabot na 267 ang bilang ng mga persons under investigation (PUI) dahil sa 2019 novel coronavirus acute respiratory disease (nCoV-ARD).

Sa inilabas na Facebook post ng official account ng Department of Health (DOH) ngayong Sabado, makikita ang isang tally chart kung saan nakalahad ang mga bilang ng PUIs sa ibat ibang bahagi ng bansa.

Lumabas sa tally na nangunguna ang National Capital Region (NCR) sa may pinakamaraming PUIs sa bilang na 103, kung saan 6 dito ay discharged na at 93 naman ay kasalukuyang naka admit.

Sa ngayon, sinabi ng DOH na nanatiling sa 3 ang bilang ng confimed case ng nCoV-ARD sa bansa.

Posibleng nagmula sa Pangolin na ilegal na ipinuslit sa China ang pagkalat ng 2019 novel coronavirus acute respiratory disease (2019 nCoV-ARD) sa nabanggit na bansa.

Batay ito sa isinagawang pag-aaral ng mga researcher ng South China Agricultural University kung saan kanilang nadiskubre na 99% magkatulad ang genome sequence ng nakitang virus sa Pangolin at sa mga pasyenteng may 2019 nCoV-ARD.

Una nang pinaniniwalaang nagmula ang bagong virus sa mga paniki na ibinebenta sa isang palengke sa Wuhan City.

Gayunman naniniwala ang mga eksperto na mayroong intermediate host ang pagkakalipat ng virus mula sa paniki patungo sa mga tao at ito anila ang Pangolin.

Tiwala naman ang mga eksperto na magiging malaki ang tulong ng bagong nadiskubre para mapigilan ang pagkalat ng 2019 nCoV-ARD.

Asahan na ang ikaapat na sunod na linggo ng rollback sa presyo ng mga produktong petrolyo.

Batay sa pagtaya ng mga source sa industriya ng langis, maglalaro sa P0.50 hanggang P0.70 ang tapyas sa presyo ng bawat litro ng diesel.

Habang P0.25 hanggang P0.40 naman ang bawas-presyo sa kada litro ng gasolina.

Ang panibagong rollback ay bunsod naman ng patuloy na pagbaba sa presyo ng mga imported na langis sa pandaigdigang merkado.

Samantala, una nang nag-anunsyo ng P0.60 kada litro na tapyas sa diesel at P0.30 kada litro na bawas sa gasolina ang kumpanyang Phoenix Petroleum, epektibo ngayong alas-6 ng umaga.

Pumalo na sa 56 ang bilang ng mga ililikas na Pilipino mula sa Wuhan City, ang itinuturing na ground zero ng 2019 novel coronavirus acute respiratory disease (nCoV-ARD) sa China.

Ayon kay Foreign Affairs Undersecreatry Brigido Dulay, agad na ililipad pabalik ng Manila ang mga nabanggit na Pinoy oras na makakuha na sila ng go-signal mula sa mga awtoridad sa China.

Aniya, nakaantabay na ang limang kawani ng DFA at lima rin mula sa Department of Health para sa repatriation.

Sinabi ni Dulay, dahil kalat-kalat ang mga Pilipino sa Wuhan City, isinasaayos na nila ang pagtitipon sa mga ito sa iisang lugar sa lungsod para sa mabilis na paglilikas sa mga ito.

Dagdag ni Dulay, may inilatag ng proseso ang Chinese government na kanilang susundin para mabilis na repatriation.

Samantala, posible naman aniyang mabawasan ang bilang ng mga ililikas na Pilipino kung makikitaan ang ilan sa mga ito ng sintomas ng trangkaso.

Itinanggi ng Department of Interior and Local Government (DILG) na nagpapatupad sila ng 14 na araw na quarantine sa mga biyaherong magmumula sa mahigit 20 bansang may kumpirmadong kaso ng 2019 novel coronavirus acute respiratory disease (nCoV-ARD).

Ito ay matapos kumalat sa social media ang nabanggit na infographic na naglalaman ng pekeng impormasyon.

Ayon sa DILG, wala silang ipinalabas na polisiya hinggil sa nabanggit na 14 day quarantine gayundin ang pagpapalabas ng kumalat na infographic.

Iginiit ng ahensiya, alinsunod sa kanilang DILG Memorandum Circular 2020-023, tanging mahigpit na ipinatutupad sa ngayon ang 14-day quarantine sa mga biyaherong mula China, Hongkong, at Macau.

Habang maaari lamang sumailalim sa boluntaryong pag-quarantine ang mga bumiyahe mula sa iba pang mga bansang apektado rin ng nCoV.

Nasa tanggapan na ni Pangulong Rodrigo Duterte ang resignation letter ni Department of Information and Communications Technology (DICT) Undersecretary Eliseo Rio.

Ito ang kinumpirma ni Presidential spokesperson Salvador Panelo bagama’t hindi pa aniya ito nababasa ng pangulo.

Tiniyak naman ni Panelo na nakahanda si Pangulong Duterte na  pakinggan ang paliwanag ni Rio hinggil sa paggamit ng confidential fund ng DICT.

Magaganap aniya ito sa nakatakdang pakikipagkita ni Pangulong Duterte kay Rio bagama’t wala pang tinukoy na eksaktong petsa para dito.

Dagdag ni Panelo, susubaybayan din ng pangulo ang isasagawang pagdinig ng Senado sa nabanggit na kontrobersiya sa pondo ng DICT.

Nakatakdang mag-usap sina Pangulong Rodrigo Duterte at U.S. president Donald Trump sa lalung madaling panahon.

Ito ang kinumpirma mismo ni Presidential spokesperson Salvador Panelo, bagama’t hindi pa aniya malinaw sa ngayon ang magiging agenda ng nabanggit na pulong.

Gayunman sinabi ni Panelo na posibleng may kaugnayan ito sa pagbasura sa Visiting Forces Agreement (VFA) sa pagitan ng Pilipinas at Estados Unidos.

Sinabi ni Panelo, kanya pa ring itatanong kay Pangulong Duterte kung sino ang unang nagsulong ng napipintong pulong.

Dagdag pa ng kalihim, inatasan na rin ng pangulo si Executive Secretary Salvador Medialdea na sabihan si Foreign Affairs Secretary Teddy Locsin Jr. na magpadala na ng notice of termination sa pamahalaan ng Estados Unidos.

Inatasan ni Pangulong Rodrigo Duterte ang lahat ng kinauukulang ahensiya ng pamahalaan at mga local government units (LGUs) na ipatupad at sumunod sa national zoning plan kontra african swine fever (ASF).

Layun nitong maiwasan ang pagkalat pa ng nabanggit na nakamamatay na sakit sa mga alagang baboy sa iba’t ibang lugar sa bansa.

Sa Administrative Order 22 ni Pangulong Duterte, kanyang iginiit ang agarang pangangailangan para matiyak ang tuloy-tuloy na implementasyon at pagsunod sa Administrative Circular No. 12 o National Zoning and Movement Plan for African Swine Fever ng Department of Agriculture (DA).

Sa ilalim ng nabanggit na DA circular, tutukuyin ang zone classification ng isang lugar depende sa inilagay na geographical limits ng mga awroridad alinsunod naman sa mga na-infect at isinailalim sa quaratine.

Halimbawa nito ang mga natukoy na infected zones dahil sa mga naitalang kumpirmadong kaso ng ASF tulad sa Pangasinan, Nueva Ecija, Cavite, at Rizal.

Habang free zone naman ang mga lugar na walang kaso ng ASF, yellow zone ang mga tinatawag na high risk areas bunsod ng dami ng populasyon ng alagang baboy gayundin ng bentahan ng mga karneng baboy  at mga produktong gawa dito.

Magkakaloob ang World Health Organization (WHO) ng test kit sa Pilipinas para sa mapabilis ang detection ng 2019 novel coronavirus acute respiratory disease (nCoV-ARD) sa bansa.

Malugod naman itong winelcome ni Health secretary Francisco Duque dahil ito ang magpapabilis at magbibigay ng credible na resulta sa nCoV-ARD patients.

Aniya, kung mabilis na lalabas ang test ay agad na madi-discharge sa ospital ang mga mag nenegatibo dito.

Kaugnay nito, dalawang pampublikong ospital at dalawa ring pribadong ospital ang i-a-accredit ng Department of Health para magsagawa ng naturang nCoV test.