DWIZ 882

Apektado na rin ng African Swine Fever ang lalawigan ng Benguet.

Ayon kay Benguet Governor Melchor Diclas, nahawa ang mga baboy matapos umanong may magpuslit ng mga baboy na positibo sa ASF mula sa Pangasinan.

Inorder umano ang naturang mga baboy online kaya hindi ito dumaan sa checkpoint at wala ring kaukulang papeles.

Dahil dito, pinatay na ang 100 baboy para maiwasan ang pagkalat ng naturang sakit.

Ipinag utos naman ng pamahalaang panlalawigan ng Benguet ang lockdown sa mga papasok na baboy sa probinsya.

Bumuo na rin ng task force ang Department of Agriculture sa probinsiya upang mapigilan ang pagkalat ng ASF.

Tinutulan ng lokal na pamahalaan ng Capas, Tarlac ang planong paggamit sa New Clark City bilang quarantine area para sa mga Pilipinong magmumula sa Hubei, China.

Nakiusap si Capas Mayor Reynaldo Catacutan na konsidera ang ibang lugar para tuluyan ng mga OFW na isasailalim sa quarantine.

Nabigo rin aniyang isangguni ng kanya ng Department of Health ang plano nitong pag gamit sa Athlete’s Village ng New Clark City na nasa kanyang nasasakupan.

Una nang ikinonsidera ng pamahalaan ang pag gamit ng Mega Drug Facility sa Laur, Nueva Ecija para sa mga OFW mula China na darating sa Sabado, Pebrero 8.

Mahigit 200 baboy ang namatay matapos na tamaan ng african swine fever (ASF) sa Calinan District, Davao City.

Ayon sa Department of Agriculture, nangamatay ang naturang mga baboy nito lamang nakalipas na dalawang linggo.

Samantala, 2,000 mga baboy pa na nakapaloob sa one kilometer radius ang nakatakdang isailalim sa culling para maagapan ang pagkalat ng sakit.

Dahil dito, hindi na rin pinapayagan ang paglabas ng mga produktong baboy at iba pang livestock sa nabanggit na distrito.

Unang tinamaan ng ASF sa Mindanao ang Davao Occidental dahilan para ilagay ito sa state of calamity.

Maninigil na ng toll sa Cavite–Laguna Expressway (CALAX) simula sa February 10, 2020.

Ang ipatutupad ng toll fee ay batay sa inaprubahan ng toll regulatory board na pagpapatupad ng provisional toll fee sa CALAX.

Batay sa abiso ng Metro Pacific Tollway, magbabayad ang mga Class 1 na sasakyan ng P47, P95 sa Class 2 at P143 para sa Class 3.

Nagkaroon ng partial operation ang CALAX noong October 30, 2019 para magamit ng mga motorista noong Undas.

Naging 24/7 ang operasyon nito simula noong December 21, 2019 para naman sa Christmas season.