DWIZ 882

Muling binuhay sa Kamara ang panukalang pagkalooban ng 14th month pay ang mga empleyado sa gobyerno at pribadong sektor.

Batay sa house bill no. 61988, makatatanggap ang mga empleyado ng 13th month pay ng hindi lalagpas sa ika-31 ng Mayo habang ang 14th month pay naman ay matatanggap hanggang ika-15 ng Nobyembre.

Sa oras na maging batas, inaasahang malaki ang maitutulong sa mga Pilipinong manggagawa bilang pandagdag sa araw-araw na gastusin.

Posibleng ilibing na lamang sa bansa ang Chinese national na nasawi dahil sa 2019 novel coronavirus acute respiratory disease (2019 nCoV-ARD).

Ito’y matapos tanggihan ng mga crematory facilities ang pagki-cremate sa labi ng nasabing Chinese sa takot na makahawa ang virus na ikinasawi nito.

Ayon kay Health Sec. Francisco Duque III, inatasan na niya ang medical center chief ng San Lazaro Hospital na makipag-ugnayan sa mga public cemetery upang tingnan kung maaari bang ilibing doon ang labi ng dayuhan.

Sa ngayon aniya ay hinihintay pa rin ng San Lazaro Hospital ang direktiba ng Chinese embassy sa bansa para sa susunod nilang hakbang kaugnay sa labi ng dayuhan.

Nanindigan si Pangulong Rodrigo Duterte na hindi na makikipag-ayos sa mga may-ari ng Maynilad at Manila Water kaugnay sa kwestiyonableng water concessionaire contract ng mga ito sa gobyerno.

Ayon kay Pangulong Duterte, sinusubukan ng mga opisyal ng dalawang water concessionaire na ayusin ang problema ngunit aniya malabo nang mangyari ito dahil galit na siya.

Aniya matagal nang ginagawang gatasan ng Maynilad at Manila Water ang mga Pilipino.

Maaari pa siguro umanong pumayag siyang ayusin ang kanilang problema kung magagawa ng dalawang water concessionaire na ibalik sa taumbayan ang pera na dapat nilang isauli.

Dagdag pa ng pangulo, hindi siya natatakot na mawalan ng suplay ng tubig sa Metro Manila dahil handa umano niya itong i-take over.

Biniro ni Pangulong Rodrigo Duterte si Senador Bong Go sa tila ambisyon nito na maging presidente ng Pilipinas.

Sa ginanap na mas oath taking ng mga bagong appointees sa Malacañang, tila nilaglag ng pangulo si Go matapos nitong sabihing napapadalas sa mga insidente ng sunog si Go.

Ayon sa pangulo, lahat ng mga nangyaring sunog ay agad dumarating ang senador.

Kung minsan pa aniya yata wala pang sunog ay nandoon na umano si Go o di kaya’y nauuna pa sa bumbero.

Biro pa ng pangulo na dapat ay limitahan ng senador ang pagpunta sa mga sunog dahil baka aniya isipin ng mga tao na siya ang responsable dito.

Halata din umano masyado ang kagustuhan nitong tumakbo sa pagkapangulo dahil sa laging present sa mga sunog.

Bong Go itinangging may balak tumakbong pangulo ng bansa

Mariing itinanggi ni Senador Bong Go na siya ay may balak na tumakbong pangulo ng bansa.

Ito’y matapos ang naging biro ni Pangulong Rodrigo Duterte sa senador sa tila umano’y kaniyang ambisyon.

Ayon kay Senador Bong Go, kilala ng publiko ang pangulo bilang mapagbiro kaya wala aniyang katotohanan ang birong iyon.

Paliwanag ni Go, kaya lamang siya tumutulong sa mga nasunugan ay para ibalik lamang ang serbisyong dapat na tinatamasa ng publiko matapos siyang mahalal bilang senador at mabigyan aniya ng pagkakataong makapaglingkod.

Tumanggi naman ang senador na mapag-usapan pa ang pulitika ngunit ipinabatid nitong handa siyang maging volunteer bilang campaign manager sa 2022 elections ng kung sinuman ang makapagpapatuloy ng mga sinimulang pagbabago ni Pangulong Duterte.

Sinimulan na ang pagtatayo ng bagong gusali ng Senado sa Fort Bonifacio sa Taguig City.

Pinangunahan ni Senate President Vicente Sotto III ang concrete pouring ceremony para sa P8.9-bilyong halagang proyekto.

Ang nasabing seremonya ay tanda bilang pagsisimula ng konstruksyon ng bagong gusali ng Senado na inaasahang matatapos sa ika-21 ng Hulyo, taong 2021.

Sa kasalukuyan ay nangungupahan ang Senado sa government service insurance system headquarters sa Pasay City.

Itinanggi ng pamahalaan ng Dubai na isang Filipina domestic helper sa kanilang bansa ang nasawi sa 2019 novel coronavirus acute respiratory disease (2019 nCoV-ARD).

Ayon sa Facebook post ng Dubai government media office, lumabas sa pagsusuri na mayroong respiratory infection ang OFW, subalit wala itong coronavirus.

Una rito, mismong si Labor Secretary Silvestre Bello III ang nagpahayag na isang OFW sa Dubai ang nasawi sa coronavirus noong February 2.

Gayunman, hindi naging malinaw kung ang tinutukoy na coronavirus ni Bello ay ang Middle East respiratory syndrome coronavirus (MERS-CoV) na galing Middle East o 2019 nCoV-ARD na galing ng China.

Nakatakdang serbisyuhan ng Philippine Airlines (PAL) ang mga na-stranded na pasahero sa Mainland, China dahil sa 2019 novel coronavirus acute respiratory disease (2019 nCoV-ARD).

Ayon sa PAL, magtutungo sa Xiamen, China ang kanilang Airbus A321 sa Lunes, February 10 ng alas-7 ng umaga, para maghatid ng pasahero at babalik rin agad ng Pilipinas –pasado alas-11 ng umaga.

Tiniyak ng PAL na pawang mga dayuhan ang sakay nila sa biyaheng Manila-Xiamen, samantalang pawang mga Pinoy naman ang sakay nila sa kanilang Xiamen-Manila flight.

Ipinaalala ng PAL na ang kailangang mayroong cancelled PAL ticket patungo ng China, Macau o Hong Kong ang sinumang nais na sumakay sa kanilang flight patungo ng Xiamen.