DWIZ 882

Naghigpit na rin ang Malakanyang sa mga pumapasok na bisita sa Malakanyang dahil sa 2019 novel coronavirus (nCoV).

Ayon sa Presidential Security Group, kailangan nang mag fill-up ng health declaration form ang lahat ng pumapasok sa Malakanyang.

Sakop ng kautusan ang mga miyembro ng Malacañang Press Corps, cabinet secretaries, security detail ni Pangulong Rodrigo Duterte, at iba pang bisita.

Maliban sa mga personal na impormasyon, tinatanong rin sa form kung bumisita, nagtrabaho o nag transit sa ibang bansa sa nakalipas na 14 na araw at kung nagkaruon ito ng ubo, sipon , lagnat, o sore throat.

Nangangamba ang mga negosyanteng Chinese sa bansa na maka apekto sa ekonomiya ang 2019 novel coronavirus (nCoV) kapag nagtagal pa ang krisis na ito.

Ayon kay Dr. Henry Lim Bon Leong, pangulo ng Federation of Filipino Chinese Chamber of Commerce and Industry Incorporated, tiyak na magdudulot ng negatibong epekto sa ekonomiya ng bansa ang nCoV kapag nagtagal ito ng higit sa apat na buwan.

Umaasa si Leong na makokontrol at mawawala ang krisis sa nCoV sa susunod na dalawang buwan upang hindi aniya maapektuhan ang ekonomiya lalo na ang sektor ng turismo.

Kumpiyansa si Leong na basta’t hindi magtatagal ang nCoV, mananatiling matatag ang economic growth ng Pilipinas mula sa 6.5% hanggang 7.5% ngayong 2020.

Umabot na sa 178 ang patients under investigation (PUI) para sa 2019 novel coronavirus.

Ayon kay Health Secretary Francisco Duque III, tatlo sa mga ito ang nag positibo tulad ng naunang napaulat, 48 ang nag negatibo, samantalang hindi pa lumalabas ang resulta para sa 127 na iba pa.

Sa naturang bilang nasa 147 anya ang naka isolate sa mga ospital, pinalabas naman ang 16 subalit mahigpit pa rin ang monitoring, samantalang ayaw naman magpa confine ng 10 iba pa.

Dahil dito, sinabi ni Duque na nakikipag ugnayan na sila sa Philippine National Police (PNP) upang pilitin ang 10 PUI’s na magpa admit sa ospital.

45 OFW’s na mula sa Wuhan, Hubei, China ang gusto nang umuwi ng bansa.

Ayon kay Foreign Affairs Undersecretary Dodo Dulay, mayroon na silang team sa Wuhan na naghahanda para sa repatriation ng mga OFW’s.

Sinabi ni Dulay na sasailalim muna sa pagsusuri ang mga OFW’s at kung sino man ang makitaan ng sintomas ay hindi isasama sa repatriation bagkus ay ididiretso sa isang ospital sa China.

Posible anyang sa February 9, araw ng Linggo, dumating sa bansa ang mga OFW’s.

Iminungkahi ni Senador Imee Marcos na hilingin ng pamahalaan sa Estados Unidos na paalisin nito ang China sa Scarborough Shoal.

Ayon kay Marcos, nakasulat naman sa mga kasunduan na tutulong ang Amerika kapag inatake ang isang barko ng militar.

Bakit aniya hindi subukan ng pamahalaan na dumulog sa Amerika para mapalayas na sa scarborough shoal ang China.

Agad namang isinantabi ni Foreign Affairs Secretary Teddy Locsin ang mungkahi ni Marcos.

Ang pinag-uusapan aniya ay mutual defense treaty at hindi imbitasyon para sa giyera.

Gagamiting quarantine area ang New Clark City para sa mga Pinoy na uuwi mula sa Hubei province ng China.

Ayon kay Health Secretary Francisco Duque, nakalatag na ang susunding protocol mula sa pagsakay sa eroplano ng mga OFW’s hanggang sa paglapag nila sa Clark International Airport.

May mga nakahanda nang ospital na pagdadalhan para sa mga makikitaan ng sintomas samantalang ang mga walang sintomas ay ididiretso sa New Clark City.

Sinabi ni Duque na ang Department of Health (DOH) ang mangangasiwa sa mga OFW’s habang nasa quarantine area samantalang ang Overseas Workers Welfare Administration (OWWA) naman ang bahala sa pagpapa-uwi sa kanila makaraan ang 14 na araw.

Nagpaliwanag ang Department of Health (DOH) kung bakit nila pinalitan ang quarantine area para sa mga uuwing OFW’s mula sa Hubei province ng China partikular sa bayan ng Wuhan.

Ayon kay Health Secretary Francisco Duque, inialok sa kanila ng Bases Conversion and Development Authority (BCDA) ang New Clark City.

Minabuti anya nilang tanggapin ang alok ng BCDA dahil mas magiging komportable sa New Clark City ang mga OFW’s kaysa sa Fort Magsaysay Drug Rehabilitation Center na syang orihinal na tinukoy bilang quarantine area.

Napakaganda anya ng ambiance sa New Clark City, open space, at kumpleto sa amenities tulad ng telebisyon at refrigerators.

Ipinagtanggol ng Department of Information and Communication Technology (DICT) ang P300-million na confidential and intelligence funds, sa pagsasabing “legitimately used” o ligal itong ginamit para sa cybersecurity and protection nang pangkalahatang seguridad ng bansa.

Sa kanilang pahayag, ipinaliwanag ng DICT na ang P300 million item sa kanilang pondo ay para sa “lawful monitoring and surveillance” ng systems at networks para suportahan ang mga tungkulin ng DICT, kabilang na cybersecurity, pagbuo at epektibong pagpapatupad ng National Cybersecurity Plan, at international cooperation intelligence sa mga bagay na may kinalaman sa cybersecurity.

Ipinalabas ng DICT ang pahayag matapos ipunto ng nagbitiw na si Undersecretary Eliseo Rio na walang mandato ang ahensiya na magsagawa ng intelligence at surveillance work.

Gayunman, Sinabi ng DICT na sila ay may mandato na protektahan ang seguridad ng consumers at mga business users sa ICT-related matters at magkaloob ng technical assistance sa iba pang ahensiya ng gobyerno sa ICT-related enforcement and administration.

Ipinaliwanag pa ng DICT na ang P300 million cash advance para sa intelligence funds ay ini-liquidate nila sa Commission and Audit (COA).

“Of the 2019 GAA Confidential Expense item for the Department, Three Hundred Million Pesos (P300,000,000.00) was disbursed in (3) tranches of One Hundred Million Pesos (P100,000,000.00), each of which were liquidated with the Commission on Audit (COA). The COA did not disallow the disbursements,” Sabi ng DICT.

Nabatid ng COA na nakapag-advanced ng kabuuang P300 million in cash ang DICT sa tatlong okasyon noong buwan ng Nobyembre at Disyembre nang walang required notice of cash allotment mula sa Department of Budget and Management (DBM).

Gayunman, ito ay pinabulaanan ng DICT sa pagsasabing ang mga rekumendasyon ng COA ay para sa “timeframes for disbursement” at ang kanilang main concern ay para maging episiyente ang Kagawaran sa pag proseso ng mga mahahalagang dokumento—lahat ng iyon ay tinugunan ng ahensiya.

“The Confidential Expense allocated in the 2019 GAA was legitimately used for cybersecurity and the protection of our national security, with the safety of our government’s information facilities and institutions, and the welfare of our people, being the Department’s utmost priority,” dagdag pa nito.

Samantala, sinabi naman nina Senate President Vicente Sotto III at Senator Panfilo Lacson naghain na sila ng resolusyon na naglalayong buhayin ang komite na tututok sa intelligence funds disbursements ng mga ahensiya ng gobyerno.

Pinagbabawalan na munang pumasok ng Boracay Island o sa bayan ng Malay ang mga turistang may history ng pagbiyahe sa China, Hongkong, at Macau.

Isang resolusyon hinggil dito ang ipinasa ng Malay Task Force against 2019 nCoV na anila’y tanggap naman ng business sector lalo na sa Boracay.

Sa ngayon, may mahigit 300 Chinese national sa Boracay ang minomonitor ng task force.

Ayon sa task force, naka alert ang mga barangay health emergency response team samantalang ang mga hotels at resorts ay binigyan na ng guidelines kung paano tamang handling sa mga Chinese nationals.

Isang overseas Filipino worker (OFW) sa Dubai ang di umano’y namatay dahil sa 2019 novel corona virus (nCoV).

Hindi kinilala ni Labor Secretary Silvestre Bello III ang OFW na nasawi nuong February 2, subalit tiga-General Santos City aniya ito.

Ayon kay Bello, gumagawa na sila ng paraan upang madala sa Dubai ang kapatid at mga anak ng OFW’s para sa cremation ng kanyang labi.

Samantala, inaalam pa di umano ng health authorities sa Dubai kung nCoV nga ang ikinasawi ng Pinay o Middle East respiratory syndrome coronavirus (MERS-CoV).

Tinanggal na ng Department of Labor and Employment (DOLE) ang depoloyment ban sa Kuwait.

Ito’y matapos makasuhan ng murder ang mga suspek sa pumatay na OFW na si Jeanelyn Villavende.

Ayon kay Labor Secretary Silvestre Bello III, maaari nang makabalik ang mga skilled, semi-skilled, at mga nasa professional category Filipino workers.

Samantala, sinabi ni Bello na sakop pa rin ng partial ban ang mga newly-hired at balik-manggagawa na household workers.

Una nang inaprubahan ng Philippine Overseas Employment Administration (POEA) ang total deployment ban sa Kuwait noong Enero 15 matapos ang brutal na pagpatay sa OFW na si Jeanelyn Villavende.