DWIZ 882

Nakitaan umano ng mga sintomas ang ilan sa mga pasaherong nakasakay ng magkasintahang nag positibo sa 2019 novel coronavirus (nCoV).

Matatandaan na isa sa magkasintahan ang kauna-unahang nasawi sa nCoV sa labas ng China.

Ayon kay Police Colonel Rhoderick Armamento, deputy director ng Philippine National Police-Criminal Investigation and Detection Group (PNP-CIDG), tatlo sa mga na-kontak nilang nakasakay ng magkasintahan ang nakitaan ng sintomas.

Isa anya rito ang nagpa self quarantine na sa provincial hospital samantalang nasa kani kanilang bahay pa ang dalawa.

Sa 61 pasahero ng Cebu Pacific flight DG 6519 (Cebu to Dumaguete) na sinakyan ng magkasintahan, 23 pa lamang ang nakontak ng PNP-CIDG.

Patung-patong na kaso ang posibleng kaharapin ng isang Chinese national matapos lumabag sa number coding at mang-araro pa ng mga sasakyan sa Maynila.

Pinapara di umano ng miyembro ng Manila Traffic and Parking Bureau ang Toyota SUV na minamaneho ng isang Chinese national dahil sa coding violation subalit sa halip na huminto ay humarurot pa ito.

Bumangga ang sasakyan ng dayuhan sa tatlong motorsiklo, isang e-bike at isang kotse bago ito nasakote ng otoridad.

Makikita sa video ng insidente na dinuraan pa ng Chinese national ang pulis na humuli sa kanya.

May nakuha rin umanong hininihinlang isang sachet ng shabu sa SUV.

Nahaharap sa kasong tax evasion ang pitong korporasyon at mga negosyante.

Ayon sa Bureau of Internal Revenue (BIR), aabot sa P825-milyon ang hindi nabayarang buwis ng pitong korporasyon para sa mga taong 2008, 2010, 2011 at 2012.

Pinakamalaki sa hinahabol ng BIR ay ang utang sa buwis ng meat dealer at trader na si Donato Pe Benito Bautista na mahigit P69-milyon.

Kabilang sa inireklamo ng paglabag sa tax code ang Body Needs & Basic, Inc. Corporation, Firotech Fire Protection, Inc., Cristimar Corporation, Fourthwave Global, Inc., Asiatech Construction & Industrial Corporation, at negosyanteng si Igna Garrovillas Francisco.

Kasama rin  sa mga kinasuhan ang mga opisyal ng mga korporasyon.

Isang resolusyon ang inihain sa Kamara para imbestigahan ang paggamit ng Department of Information and Communications Technology (DICT) sa kanilang confidential funds.

Ang house resolution 702 ay inakda ng mga miyembro ng minority bloc sa pangunguna ni Minority Leader Benny Abante at ng Makabayan bloc.

Nais busisiin ng minorya ang ibinunyag ni resigned DICT Usec. Eliseo Rio na ginagamit sa paniniktik ang confidential fund ng ahensya.

Matatandaan na sinabi ni Rio na ang trabaho ng DICT ay protektahan ang bansa laban sa cyber-attacks at hindi ang magsagawa ng surveillance.

Bababa ang singil sa kuryente sa mga nasasakupan ng Meralco ngayong Pebrero.

Batay sa anunsyo ng Meralco, P0.59/kilowatt hour ang maaaring mabawas sa singil sa kuryente.

Dahil anila ito sa mas mababang halaga ng kinontratang kuryente at bentahan sa spot market.

Inaasahang mababawasan ng P118 ang bayarin ng mga kumokonsumo ng 200-kilowatt hour (kWh) ngayong Pebrero; P177 naman sa 300 kWh; P236 sa may konsumong 400 kWh; at P295 sa 500 kWh.

Aminado ang Department of Foreign Affairs (DFA) na hindi pa umuusad ang plano ni Pangulong Rodrigo Duterte na ikansela na ang Visiting Forces Agreement (VFA) –isang kasunduang pangmilitar sa pagitan ng Pilipinas at Estados Unidos.

Sa hearing ng senado, sinabi ni DFA Secretary Teddy Boy Locsin na mayroon na syang inihandang notice of termination subalit hindi pa nya ito ipinadadala sa Estados Unidos, sa utos na rin ng pangulo.

Sa kanyang opening statement, inisa-isa ni Locsin ang mga benepisyong nakukuha ng Pilipinas sa VFAtulad ng military assistance, financial grants at garantisadong tulong sakaling atakihin ng ibang bansa ang Pilipinas.

Ayon kay Locsin, mas may benepisyo para sa Pilipinas ang pagpapatuloy ng VFA kaysa kanselasyon.

The regular presence of US forces, including those conducting freedom of navigation operations to the South China Sea, including the West Philippine Sea, serves as a deterrent to aggressive actions in the West Philippine Sea,” ani Locsin.