DWIZ 882

Pursigido ang pamahalaan na mapahinto ang pagkalat ng sakit bunsod ng 2019 novel coronavirus acute respiratory disease (2019 nCoV-ARD) sa bansa.

Ito ang tiniyak ng Malacañang sa harap na rin ng mga ginagawang hakbang ng pamahalaan para agad matugunan ang nasabing problema.

Sa isang panayam, sinabi ni Presidential Spokesperson Atty. Salvador Panelo, hindi lamang ang Pilipinas ang humaharap sa banta ng 2019 nCoV-ARD, kung hindi ang buong mundo.

Dahil dito, inamin ni Panelo na nababahala na rito si Pangulong Rodrigo Duterte lalo na sa posibleng epekto nito sa ekonomiya ng bansa.

Una nang sinabi ni National Economic and Development Authority (NEDA) Sec. Ernesto Pernia na pumalo na sa mahigit p100-milyon ang malulugi sa Pilipinas sakaling tumagal pa ang nararanasang krisis na dala ng naturang virus.

Ipatutupad na ng kumpanyang Clean Fuel ang rollback sa presyo ng kanilang mga ibinebentang diesel at gasolina simula mamayang alas-4:01 ng hapon.

Sa abiso ng Clean Fuel, nasa P0.60/litro ang tapyas sa presyo ng kanilang diesel habang P0.30 naman kada litro sa kanilang gasolina.

Una na ring nagpatupad ng kaparehong rollback sa presyo ng diesel at gasolina ang Phoenix Petroleum, alas-6 ng umaga kahapon, ika-8 ng Pebrero.

Inaasahan namang susunod na rin ang iba pang kumpanya ng langis kung saan maglalaro sa P0.60 hanggang P0.70 kada litro ang bawas presyo sa kanilang diesel, P0.30 hanggang apatnapung sentimo kada litro sa gasolina at piso at tatlumpu hanggang apatanapung sentimo kada litro naman sa kerosene.

Ito na ang ika-apat na sunod na nagpatupad ng rollback sa presyo ng mga produktong petrolyo ang mga kumpanya ng langis.

Walang Pilipino ang nasaktan sa nangyaring pamamaril sa isang shopping mall sa Thailand na ikinasawi ng nasa 20 katao.

Batay sa ulat, alas-2 kaninang madaling araw nang mailikas na ang anim na mga Pilipino na na-trap sa Terminal 21 Mall sa Nakhon Ratchasima, Thailand.

Naka-lockdown na ang lahat ng mga stalls at kuwarto sa mall kung saan unti-unti nang inilalabas ang mga naipit na customers at staff ng nabanggit na mall.

Wala rin umanong hawak na hostage ang suspek na nanatili pang nakalalaya at nagpapalakad-lakad pa rin sa loob ng mall.

Una nang kinilala ng Thai authorities ang suspek sa pamamaril na si Sergeant Major Jakrapanth Thomma, isang junior army officer.

Nagawa ring i-post ng suspek sa Facebook ang ginawa nitong walang habas na pamamaril.

Tinawag na “wrong timing” ni Senate President Pro Tempore Ralph Recto ang pagtalikod ng Pilipinas sa visiting forces agreement (VFA) sa Amerika.

Ayon kay Recto, mali ang hakbang ng pamahalaan na talikuran ang kasunduan na bunga lang ng pagkapikon dahil sa pagbawi ng U.S. visa sa isang kaalyado nito.

Bagama’t aminado si Recto na may pagkakataon aniya na nadedehado ang Pilipinas sa VFA, hindi pa rin ito ang tamang panahon para kalimutan ang kasunduan.

Gayunman, naipakita na rin naman ani Recto ng Amerika ang pagtupad nito sa kasunduan sa pamamagitan ng agarang pagsaklolo nito sa tuwing sasalantain ang bansa ng mga kalamidad.

Iginiit din ng senador na kailangan pa rin ng Pilipinas ang Amerika dahil sa patuloy na pagtatayo ng istruktura ng China sa mga pinag-aagawang teritoryo sa West Philippine Sea.

Nabawasan ang bilang ng mga Pilipinong kasama sana sa repatriation mula Wuhan City sa China.

Ito ang inihayag ng Department of Foreign Affairs (DFA) matapos na last minute magbackout ang ilang mga Overseas Filipino Workers (OFWs) na sinundo ng repatriation team pabalik ng Pilipinas.

Mula kasi sa 56 na unang inanunsyo ng DFA, 30 Pilipino na lamang ang bumalik sa bansa mula Wuhan City kaninang umaga.

Paliwanag ng DFA, kagabi bago umalis ang eroplano ng Royal Air sa Wuhan Tianhe International Airport, nasa 26 na mga Pilipino pa lamang ang naroroon sa nabanggit na paliparan at may hinihintay na 10 iba pa.

Gayunman, 30 na lamang anila ang tuluyang nagpasiya na bumalik ng Pilipinas.

Wala namang binanggit ang DFA na dahilan kung bakit nagback out ang iba pang mga ililikas sanang mga Pilipino sa Wuhan City.

Basahin ang kaugnay na balita: Mga Pinoy na inilikas mula China nasa New Clark City na

Nasa Athlete’s Village New Clark City na ang 30 mga Pilipino na sinundo ng Department of Foreign Affairs-Department of Health (DFA-DOH) repatriation team mula Wuhan City sa China.

Pasado alas-8:20 kaninang umaga nang dumating sila sa Athlete’s Village matapos lumapag ang kanilang sinakyang eroplano sa Clark Air Base kanina namang mag-a-alas-7 ng umaga.

Bago bumaba ng eroplano, muling isinailalim sa thermal scanning ang balik-bansang mga Pilipino.

Kasamang sasailalim sa 14-day mandatory quarantine ng mga nabanggit na Pinoy sa Athlete’s Village ang repatriation team ng Pilipinas na binubuo ng Brave 5 ng DOH, Courages 3 ng DFA at maging ang anim na flight crew ng royal air.

Ayon kay Health Undersecretary Gerardo Bayugo, bibigyan ng tig-iisang kuwarto ang bawat naka-quarantine na Pilipino, maliban sa mga pamilya.

24-oras aniyang babantayan ng limang heath personnel ng DOH ang mga inilikas na mga Pilipino.

Dagdag ni Bayugo, sasagutin din ng DOH ang gastusin ng mga ito kabilang na ang mga pagkain, hygiene kits at iba pang pangangailangan sa loob ng 14 araw na quarantine period.

Habang bibigyan din sila ng access sa telepono at internet para matawagan ang kani-kanilang mga pamilya dito sa Pilipinas.