DWIZ 882

Naka-admit sa Armed Forces of the Philippines Medical Center o mas kilala bilang V. Luna Medical Center sa Quezon City ang ilang mga persons under investigation (PUI) dahil sa 2019 novel coronavirus (nCoV).

Kinumpirma ito ni AFP Public Affairs Office Health Service Command spokesperson Captain Sherwin Joseph Sarmiento bagama’t tumanggi na siyang isiwalat kung ilan ang mga ito.

Ayon kay Sarmiento, kasalukuyang naka-isolate sa infectious ward ng V. Luna ang mga PUI’s para ma-obserbahan.

Binigyang diin naman ni Sarmiento na nakahiwalay sa main building ng ospital ang gusali ng infectious ward.

Dagdag ni Sarmiento, binilinan na rin sila ng AFP Public Affairs Office na huwag nang maglabas pa ng impormasyon sa bilang at classification kung militar o sibilyan ang naka-admit na PUI’s.

Itinanggi ni Presidential spokesperson Salvador Panelo na nagkakaroon ng inconsistencies o hindi pagkakatugmatugma sa pahayag ng mga miyembro ng gabinete sa usapin ng pagterminate sa Visiting Forces Agreement (VFA).

Ito ay matapos na tawagin bilang fake news ni Defense Secretary Delfin Lorenzana ang pahayag ni Panelo.

Kaugnay ito ng anito’y utos ni Pangulong Rodrigo Duterte kay Executive Secretary Salvador Medialdea na sabihan si Foreign Affairs Secretary Teodoro Locsin na magpadala na ng notice of termination ng VFA sa gobyerno ng Estados Unidos.

Ayon kasi kay Lorenzana, wala pa silang natatanggap ni Locsin na utos mula sa pangulo.

Gayunman, iginiit ni Panelo na posibleng hindi pa lamang natatanggap ng excutive secretary ang direktiba ng pangulo.

Wala rin aniya siyang sinabi na naipadala na ang nabanggit na kautusan kay Medialdea pero hindi pa rin naman ito nangangahulugang hindi totoo ang kanyang ibinahaging impormasyon sa media.

Pinabulaanan din ni Panelo ang ulat na nagkakasalungat ang mga pananaw ng gabinete ng pangulo sa usapin ng pagbasura sa VFA.

Kinalma ni Interior and Local Government Secretary Eduardo Año ang mga nangangambang residente ng Capas, Tarlac.

Ito ay matapos gamitin bilang quarantine facility para sa mga balik bansang Pilipino mula Wuhan City ang Athlete’s Village sa New Clark City.

Ayon kay Año, walang dapat ikatakot ang mga taga-Capas dahil mahigpit ang ipatutupad na protective measure ng pamahalaan.

Aniya, walang magiging banta sa 2019 novel coronavirus (nCoV) dahil hindi naman masisilayan ng mga residente kahit ang anino ng mga naka-quarantine na mga OFW’s sa Athlete’s Village.

Dagdag ni Año, kanilang nauunawaan ang sentimiyento ng lokal na pamahalaan at mga residente ng Capas pero nagpasiya pa rin ang national government na gamitin anag pasilidad dahil matinding pangangailangan at pambansang interes.

Binigyang diin pa ni Año, kapwa mga Pilipino rin ang mga inilikas mula Wuhan na nangangailangan ng tulong at pang-unawa mula sa lahat.

Pinabulaanan ng Bureau of Immigration (BI) at Department of Health (DOH) ang nag-viral na post sa social media hinggil sa umano’y nakatakas na Chinese national mula sa quarantine area ng Ninoy Aquino International Airport (NAIA).

Ayon kay Immigration spokesperson Dana Sandoval, wala silang natatanggap na anumang ulat na may kaugnayan sa nabanggit na post.

Ani Sandoval, sa unang tingin pa lamang makikita na aniya ang napakaraming senyales na mali ang mga impormasyong ibinahagi sa nabanggit na viral social media post.

Gayundin, tinawag ng DOH bilang isang fake news ang kumakalat na ulat sa social media.

Kaugnay nito hinimok ng dalawang ahensiya ng pamahalaan ang publiko na iwasang magpakalat ng mga maling impormasyon at mag-antabay lamang sa kani-kanilang ipalalabas na mga official statements.

Tiwala ang Department of Health (DOH) na walang nangyaring contamination o pagkahawa sa pagbaba ng eroplano ng mga Pilipinong inilikas mula Wuhan City sa China, ang ground zero ng 2019 novel coronavirus acute respiratory disease (nCoV-ARD).

Ayon kay Health Undersecretary Gerardo Bayugo, kanilang tiniyak na mahigpit na nasunod at naipatupad ang kanilang plano.

Sinabi ni Bayugo, maayos ang naging proseso ng deplaning o pagbaba sa eroplano ng mga balik bansa ng mga Pilipino.

Dagdag  pa  ng  opisyal, wala sa mga inilikas na Pilipino ang  naging  symtomatics o nagkaroon ng sakit habang nasa paliparan sa Wuhan hanggang makasakay sa eroplano, batay na rin sa nakuha nilang report.

Mag-aalas siyete ng umaga ngayong Linggo, Pebrero 9, nang lumapag sa Clark Air Base ang eroplano ng Royal Air lulan ang 30 mga Pilipinong nagpasiyan bumalik ng Pilipinas mula Wuhan City.

Pumalo na sa 284 ang bilang ng mga persons under investigation (PUI) dahil sa posibilidad ng pagkahawa sa 2019 novel coronavirus acute respiratory disease (nCoV-ARD).

Ayon sa Department of Health (DOH), 240 sa nabanggit na bilang ang naka-admit sa iba’t ibang mga ospital, 15 ang tumangging magpa-confine at 24 ang nadischarge na.

Pinakamaraming PUI’s ang naitala sa Metro Manila na umaabot sa 108.

Habang nananatili namang 3 ang kumpirmadong kaso ng 2019 nCoV-ARD sa bansa.

Kinabibilangan ito ng dalawang Chinese national na bumiyahe ng Wuhan City at isang 44 anyos na lalaking Chinese na siyang kauna-unahang nasawing pasyente sa labas ng China.