DWIZ 882

Pinangunahan ni Pangulong Rodrigo Duterte ang Change of Command ceremony ng Philippine Security Group (PSG) sa PSG Grandstand sa Malacañang Park, kahapon, ika-25 ng Pebrero.

Pagkakaisa sa pagbabantay ng mga institusyon sa bansa ang naging sentro ng talumpati ng pangulo para sa mga opisyal at tauhan ng PSG.

Ayon pa sa pangulo mas mahalagang maging tapat ang PSG sa bansa sa halip na sa kaniya.

Kasabay nito, pinasalamatan ng pangulo ang bagong PSG chief na si Colonel Jesus Durante sa pagtanggap sa responsibilidad na matiyak ang seguridad ng tanggapan ng pangulo, kaniyang pamilya at maging ng mga bibisita pang lider ng ibang mga bansa.

Kinilala naman ni Pangulong Duterte ang tapat na serbisyo ni outgoing PSG chief Brigadier General Jose Eriel Niembra kung saan naging payapa umano ang kaniyang kalooban para sa kaligtasan ng kaniyang pamilya at iba pang mga head of state na bumista sa bansa.

Nanawagang patalsikin sa pwesto si Pangulong Rodrigo Duterte ng aabot sa 3,000 raliyista na nagtipun-tipon sa Mendiola, Maynila kasabay ng paggunita sa ika-34 na anibersaryo sa EDSA People Power Revolution kahapon, Martes, ika-25 ng Pebrero.

Ayon sa mga raliyista, marapat lamang na bakantehin na ng pangulo ang kaniyang posisyon dahil sa paggamit umano nito ng batas para patahimikin ang kaniyang mga kritiko.

Protest rally of Militant groups at Espana Mla infront of UST #Edsa1 @dwiz882 pic.twitter.com/egFsiFkBfX

— JILL RESONTOC – DWIZ -882 AM radio (@JILLRESONTOC) February 25, 2020

Giit pa ng mga ito, bigo umano ang pangulo na tugunan ang pangangailangan ng taumbayan.

Sa ngayon ay hindi pa naglalabas ng pahayag ang Malacañang kaugnay sa pambabatikos sa pangulo.

Pinakakalma ng Embahada ng Pilipinas sa Kuwait ang mga Pilipino doon matapos makumpirmang mayroon nang kaso ng 2019 coronavirus disease (COVID-19) sa Kuwait.

Ayon sa Embahada ng Pilipinas, hindi dapat matakot ang mga pilipino kun’di ibayong pag-iingat lamang ang kailangan.

Payo rin ng embahada na mayroon mang virus o wala, dapat na ugaliing maging malinis sa katawan upang hindi mahawaan ng sakit.

Kasabay nito, hinimok ng embahada ang mga Pilipino sa Kuwait na bisitahin ang website ng World Health Organization (WHO) para sa karagdagang kaalaman kung paano maiiwasan ang virus.

Obligado nang magsuot ng face mask ang lahat ng mga Pinoy na magtutungo sa Embahada ng Pilipinas sa South Korea.

Ito’y dahil sa pagtaas ng kaso ng 2019 coronavirus disease (COVID-19) sa naturang bansa.

Ayon sa embahada, ang pagsusuot ng face mask ay bilang pag-iingat sa kalusugan ng bawat nagtutungo sa kanila at kumukuha ng serbisyo.

Samantala, inanunsyo rin ng embahada na simula ngayong araw, Miyerkules, ika-26 ng Pebrero, ay iiklian na ang oras ng operasyon ng embahada –magsisimula ito ng alas-10 ng umaga hanggang alas-3 ng hapon.

29 pang mga person under investigation (PUI) ang pinalabas na sa ospital matapos na mag negatibo sa coronavirus 2019 (COVID-19).

Ayon sa DOH, may kabuuang 509 na PUI na ang na – discharge sa mga ospital habang 98 PUI pa rin ang nanatili pa rin sa iba’t-ibang pagamutan.

Umaabot naman sa 610 ang pasyenteng sinuri dahil sa COVID-19.

Nanatili pa ring tatlo ang positibong kaso ng COVID-19 sa bansa na pawang mga Chinese nationals kung saan isa dito ang namatay.