DWIZ 882

Umakyat na sa tatlo ang kaso ng coronavirus disease 2019 (COVID-19) sa Maynila.

Ito ay makaraang makumpirma na residente ng Maynila ang dalawang nagpositibo sa virus.

Kabilang sa nadagdag sa kaso ang isang 23-anyos na babae na mula sa Sta. Ana.

Nagta-trabaho umano ito sa isang salon sa Greenhills sa San Juan City.

Isang 64-anyos na babae naman mula sa Sta. Cruz ang ikatlong kaso sa lalawigan at walang naitalang history ng pagbiyahe-abroad.

Kasalukuyan umano itong nasa isang ospital sa labas ng Maynila.

Samantala, kahapon lamang ay idineklara na ang state of calamity sa lungsod dahil sa banta ng COVID-19.

Total lockdown.

Ito ang mungkahing ipatupad ni House and Means Committee Chairman Joey Salceda sa National Capital Region (NCR) sa gitna ng dumarami pang kaso ng coronavirus disease 2019 (COVID-19) sa bansa.

Ayon kay Salceda, isang linggo lamang tatagal ang total lockdown na kanyang iminumungkahi.

Giit ng kongresista, kailangang magpatupad ng total work stoppage sa NCR upang lubusang mabawasan ang exposure ng publiko sa naturang virus.

Malaking kabawasan aniya kung magiging 13-milyon na lamang ang populasyon sa Metro Manila mula sa karaniwang 20-milyon kada araw.

Sa pamamagitan aniya nito ay mailalayo sa panganib ang nasa 6-milyong manggagawa.

Kasunod nito, nais din ni Salceda na magkaroon ng pagpapahinto sa transportasyon sa Metro Manila, maliban na lamang sa mga ‘essential services’.

Dagda pa ng kongresista, mayroong mga ‘leakage’ o butas sa implementasyon ng umiiral nang community quaratine sa Metro Manila na magdudulot aniya ng panganib sa mga manggagawa.

Hanggang Parañaque Integrated Terminal Exchange (PITX) na lamang ang mga provincial bus mula sa Cavite.

Ito’y dahil sa implementasyon ng community quarantine sa Metro Manila bunsod ng coronavirus disease (COVID-19).

Bumababa na sa PITX ang mga pasahero ng bus at pinapapila ang mga ito para makuhanan ng body temperature.

Isa-isa rin chine-check ang mga gamit ng mga pasahero.

Magugunitang nakakaderecho pa ng EDSA ang ilang provincial bus mula sa Cavite.

Tuloy ang operasyon ng mga bangko at iba pang mga financial institusyon sa kasagsagan ng umiiral na community quarantine sa Metro Manila sa loob ng isang buwan.

Ito ang ginawang pagtitiyak ng Bangko Sentral ng Pilipinas (BSP) sa publiko.

Ayon sa BSP, bilang bahagi ng global risk management standards, nakapagpatupad na anila ang mga bangko ng kanilang business continuity plans sa gitna ng coronavirus disease 2019 (COVID-19) outbreak.

Layunin anila nitong matiyak na tuloy-tuloy ang aktibidad ng mga bangko tulad ng pagtanggap ng mga deposito, atm withdrawals, check clearing at iba pa.

Kaugnay nito, hinimok ng BSP ang mga pamunuan ng bangko na tiyaking nagpapatupad ng mga protocol laban sa COVID-19 ang kanilang personnels.

Iginiit pa ng BSP, isang public health crisis ang nararanasang COVID-19 outbreak at hindi anila financial crisis.

Nagpalabas ng paglilinaw ang Department of Foreign Affairs (DFA) hinggil sa pagtatanggal ng travel ban sa mainland China maliban sa Hubei Province.

Alinsunod anila ito sa ipinalabas na resolution ng interagency task force for the management of eerging infections disease noong Marso 12  bilang hakbang para mapigilan ang paglaganap ng coronavirus disease 2019 (COVID-19).

Ayon sa DFA, sakop ng tinaggal na travel ban ang mga balik manggagawa o overseas filipino workers na may maipakikitang validong visa, work permits,OEC, naka-notaryong deklarasyon kaugnay ng kaalaman sa panganib ng pag-alis at iba pang mga dokumento.

Gayundin ang mga Filipinong may permanent resident visa sa China, pilipinong opisyal ng pamahalaan na on-official duty.

Habang hindi naman kasama ang mga Overseas Filipino Workers (OFW)’s na unang beses pa lamang na-deploy sa mainland China, estudyante, mga dependents ng mga OFW’s at turista.