DWIZ 882

Ipinahayag ng Alphabet Inc’s Google na posibleng hindi sumahod at mawalan ng trabaho ang kanilang mga empleyadong hindi sumunod sa kanilang vaccination rules.

Batay sa memong inilabas ng Google, kailangang mag-sumite ang kanilang empleyado ng dokumentong nagsasaad ng kanilang vaccination status o applikasyon para sa medical o religious exemption.

Ayon sa Google, ang kanilang mga empleyadong bigong makasunod sa vaccination rules sa Enero 18 sa susunod na taon ay makatatanggap ng paid administrative leave sa loob ng 30 araw at kung tatagal ng anim na buwan na hindi pa sila bakunado ay tatawagin itong “Unpaid Personal Leave” hanggang ma-terminate o mawalan ang mga ito ng trabaho. —sa panulat ni Joana Luna

Tiniyak ni presidential candidate at dating senador Bongbong Marcos ang pagpapatayo ng karagdagang mga dialysis centers sa mga probinsya sakaling manalo sa pagkapangulo sa 2022 Elections upang mas maraming pilipino ang makinabang sa nabanggit na serbisyo.

Sa datos ng University of the Philippines hinggil sa COVID-19 at dialysis noong December 2020, isang pasyenteng may malubhang sakit sa bato ang namamatay kada oras.

Nasa 35,000 Pinoy din ang nagpapa-dialysis sa buong bansa at sa nakalipas na isang dekada ay tumataas ang bilang na ito ng 15% kada taon.

Ayon kay Marcos, dapat bigyang-pansin ang sitwasyon ng mga dialysis patients na kailangan pang bumiyahe nang malayo o mula probinsya patungong Metro Manila para lamang makapagpagamot.

Sa halip anya na ipambili ng gamot ay napupunta pa sa pamasahe ang malaking ginagastos ng mga pasyente kaya’t panahon na para ilapit sa kanila ang mga dialysis center.

Inihayag ng Philippine Amusement and Gaming Corporation (PAGCOR) na bumaba ang bilang ng Philippine Offshore Gaming Operators o POGOS sa bansa.

Ayon kay Joseph Lobo ng PAGCOR, aabot na lamang sa 39 POGOs kumpara sa 63 POGO Licensees noong 2019 at 53 POGOs noong 2020 ang nag-o-operate ngayon sa bansa.

Sa 39 POGO licensees, 27 lamang dito ang kasalukuyang operational bunsod ng COVID-19 pandemic.

Bukod pa diyan, bumaba rin ang bilang ng POGO workers ngayong taon na may kabuuang 31,816 kumpara sa 120,000 noong 2019 at 50,259 noong 2020.

Samantala, mula naman sa 228 noong 2019 at 185 noong 2020, nasa 146 nalang ngayon ang bilang ng PAGCOR pagdating sa accredited service providers ngayong taon.—sa panulat ni Angelica Doctolero

Mananatiling pantay ang Administrasyong Duterte kaugnay sa nalalapit na 2022 national and local election.

Ayon kay Pangulong Rodrigo Duterte, walang magiging kalaban o kakampi ang kaniyang administrasyon dahil magiging “neutral” ang kanilang pagtingin sa lahat ng kakandidato sa 2022.

Sa kabila ng pahayag ng Pangulo, tiniyak nito na magiging mapayapa ang halalan kasabay ng mahigpit na pagbabantay laban sa banta ng terorismo at vote-buying.

Ipinaalala din ng Pangulo sa publiko na panatilihin ang pagsunod sa health and safety protocols na ipinatutupad ng pamahalaan.—sa panulat ni Angelica Doctolero

Inihayag ni National Capital Region Police Office (NCRPO) Regional Director PMGEN. Vicente Danao, na umabot na sa mahigit P 5-B ang halaga ng nakumpiskang iligal na droga sa loob ng 13 buwang operasyon.

Ayon kay Danao mula noong November 10, 2020 hanggang December 12, 2021, sa ikinasang 12, 597 na Anti-Drug operations ay nagresulta ng pagkakakumpiska ng mahigit 839, 475 na gramo ng shabu.

Umabot naman sa mahigit 568, 233 na gramo ng marijuana ang nakumpiska na nagkakahalaga ng mahigit P68, 187, 980; nasa mahigit P27-M naman ang halaga ng nakumpiskang ecstasy habang 286.10 na gramo ng cocaine din ang nasamsam na nagkakahalaga ng mahigit P1.5-M.

Tinitiyak naman ni Danao na magpapatuloy ang kanilang operasyon kontra sa iligal na droga para sa kapayapaan at kaayusan sa Metro Manila.—sa panulat ni Angelica Doctolero

Nagbabala si Dra. Anna Cabel ng QC Veterinary Office kaugnay sa mga bumibili ng lechon online.

Ayon kay Dra. Cabel, dahil sa patuloy na pagtaas sa presyo ng lechon, napipilitan nalang bumili ang ilan sa online na mas mura kaysa sa ilang tindahan ng lechon.

Umaabot na kasi ngayon sa 7,500 pesos ang presyo ng mababang timbang ng lechon habang aabot naman sa 15,000 pesos ang 28 kilos nito.

Ipinaliwanag ni Dra. Cabel na hindi sigurado ang mga produktong ibinebenta online dahil dumarami ngayon ang kaso ng African Swine Fever (ASF) sa bansa partikular na sa Quezon at iba pang lalawigan kung saan hinahango ang mga baboy.

Sinabi pa ni Dra. Cabel na dapat na magdoble ingat ang publiko sa pagbili ng lechon o karne ng baboy online dahil sa masamang epekto nito sa kalusugan.—sa panulat ni Angelica Doctolero

Nagpapatuloy parin ang operasyon ng mga barko sa Nortport Terminal sa Maynila na patungong iloilo sa kabila ng pagpasok ng Bagyong Odette sa Philippine Area of Responsibility (PAR).

Ilang sa mga pasaherong babiyahe ay mula pa sa Central Luzon partikular na sa Metro Manila.

Ayon sa ilang mga pasahero, minamadali na nilang maka-uwi sa kanilang probinsya upang doon magdiwang ng kapaskohan.

Sa ngayon, wala pang abiso ng suspensiyon sa biyahe ng mga barko pero tiniyak ng Philippine Coast Guard (PCG) ang pagmomonitor sa sitwasyon sa Visayas at Mindanao.

Sa ngayon, hinihintay nalang nila ang impormasyong magmumula sa PAGASA.—sa panulat ni Angelica Doctolero

Sinabi ni ALU-TUCP Spokesperson Atty. Alan Tanjusay, na nakatulong sa maraming Pilipino ang pagluwag ng restrction sa bansa kabilang na dito ang pagtaas ng kapasidad sa mga establisyimento at transportasyon.

Bukod pa dito, tumaas nadin ang bilang ng mga negosyong nagparehistro at muling nagbukas dahilan para dumami ang mga Pilipinong nagkaroon ng trabaho sa kabila ng banta ng panibagong virus na Omicron variant.

Matatandaang sa naging datos ng Social Weather Stations, bumaba sa 11.9-M ang bilang ng mga pilipinong walang trabaho sa 3rd quarter ng 2021.

Kumpiyansa naman si Tanjusay na muling sisigla ang online business sa pagpasok ng taong 2022.—sa panulat ni Angelica Doctolero

Pinaboran ni Pangulong Rodrigo Duterte ang pansamantalang pagpapahinto sa Second Round National Vaccination Drive sa ilang rehiyon sa bansa bunsod ng banta ng Bagyong Odette.

Ayon sa National Vaccination Operations Center, iuurong sa December 20 hanggang December 22 ang pagbabakuna sa Bicol Region, MIMAROPA, Visayas at Mindanao.

Habang itutuloy naman ngayong araw, December 15 hanggang December 17 ang Vaccination Drive sa Northern Luzon, Central Luzon at CALABARZON.

Layunin nitong matiyak ang kaligtasan ng mga magpapabakuna, health workers at volunteers sa posibleng epekto ng Bagyong Odette. - panulat ni Angelica Doctolero