DWIZ 882

Inihayag ni National Disaster Risk Reduction and Management Council (NDRRMC) Spokesperson Mark Timbal, na nagsasagawa na ng pre-emptive evacuation ang kanilang ahensya sa 10K barangay sa bansa na natukoy na nasa landslide at flash flood prone areas.

Ito ay bilang paghahandaan sakaling mag-landfall ang Bagyong Odette na may international name na “Rai” matapos pumasok sa Philippine Area of Responsibility o par kagabi at inaasahang magla-landfall sa Caraga-Eastern Visayas sa huwebes ng hapon o gabi.

Dahil dito, kinansela na ng Regional Disaster Risk Reduction and Management Council ang Sea at Land Travel papuntang Bicol Region at Eastern Visayas.

Nakahanda narin ang Quick Response Team ng NDRRMC para tumulong sa mga maaapektuhan ng Bagyong Odette. —sa panulat ni Angelica Doctolero

“Hindi ide-demonitize at mananatili sa sirkulasyon”

Ito ang naging pahayag ng Malacañang sa usapin ng lumang ₱1000 bank note na may mukha ng 3 Bayaning Pilipino na sina Josefa Llanes Escoda, Vicente Lim at Jose Abad Santos.

Matatandaang kinuwestiyon ng ilang mambabatas at personalidad ang bagong disenyo ng pera kung saan pinalitan ang 3 bayaning Pilipino ng larawan ng Philippine Eagle.

Ayon kay Acting Presidential Spokesperson at Cabinet Secretary Karlo Nograles, ang bagong P1, 000 banknote design ay para lamang sa test circulation na may layuning malaman kung mas environment friendly, mas hygienic at mas secure ang polymer material na ginamit sa paggawa ng pera.

Sa ngayon, hindi pa alam ng Malacañang kung hanggang kailan tatagal ang test circulation at kung ibabalik pa ang mukha ng tatlong bayani pagkatapos ng test run. —sa panulat ni Angelica Doctolero

Nairaffle na ng Commission on Elections (COMELEC) ang pagkakasunod-sunod ng mga pangalan ng partylist group sa balota.

Ito ay bilang paghahanda sa 2022 national and local election kung saan, nakuha ng Kalipunan ng Maralita at Malayang Mamamayan o KAMALAYAN ang pinaka number 1 spot sa balota mula sa 165 accredited na partylist groups.

Kabilang pa sa mga party-list group na kasama sa listahan na nairaffle ang:

• Kilos Mamamayan Ngayon Na (KM NGAYON NA)
• Philippine Society for Industrial Security (PSIS)
• Agricultural Sectoral Alliance of the Philippines (AGAP)
• Kabalikat ng Mamamayan (KABAYAN)
• Home Owners and Marginalized Empowerment Through Opportunities with Neighborhood Economic Reliability (HOME OWNER)
• Kabalikat Patungo sa Umuunlad na Sistematiko at Organisadong Pangkabuhayan Movement (KAPUSO-PM)
• PDP Cares Foundation, Incorporated (PDP CARES)
• Noble Advancement of Marvelous People of the Philippines (MARVELOUS TAYO)
• Advocates and Keepers Organization of OFWS, Inc. (AKO OFW) —sa panulat ni Angelica Doctolero

Sa inihaing House Resolution Number 2412, pinasisilip ng Bayan Muna sa Committe on Banks and Financial Intermediaries ang pagpalit sa disenyo ng isang libong salapi.

Ito’y matapos batikusin at kwestyunin ng ilang mga grupo at indibidwal ang pagtanggal sa larawan ng mga bayani.

Batay sa resolusyon ang disenyo ng pera ng bansa ay hindi lamang kumakatawan sa turismo kundi isang paalala sa kasaysayan ng bansa. Ang pag-alis sa larawan ng mga bayani ay isang paraan nang pagbura sa isipan ng mga tao.

Magugunitang, inihayag ni Banko Sentral ng Pilipinas (BSP) Governor Benjamin Diokno na aprubado na ito ng National Historical Commission, BSP Monetary Board at ng opisina ng pangulo na ilalabas sa April 2022. —sa ulat ni Tina Nolasco (Patrol 11), sa panulat ni Joana Luna

Dapat tiyakin ng Banko Sentral ng Pilipinas (BSP) na maibabalik ang perang nawala sa mga kliyente ng Banco De Oro (BDO) sa halip na palitan ng larawan ng agila ang 1,000 piso.

Ito’y ayon kay Assistant Minority Leader at Gabriela Partylist Representative Arlene Brosas, dapat aniyang magtulungan ang BSP at Anti-Money Laundering Council na madaliin ang imbestigasyon at palakasin ang Data Privacy maging seguridad sa sistema ng banko.

Batay sa tala ng Bankers Association of the Philippines hindi bababa sa isang bilyong pisong halaga ng pera ng mga kliyente sa bangko ang nawala dulot ng online scam ngayon taon. —sa ulat ni Tina Nolasco (Patrol 11), sa panulat ni Joana Luna

Aprubado na ng Senado sa ikalawang pagbasa ang panukalang batas na naglalayong matigil ang paggawa ng mga krimen gamit ang mga cellphone at iba pang electronic device.

Sa ilalim ng Senate Bill Number 2395, oobligahin ang mga seller at reseller ng sim card na kunin ang pangalan, address at birthday ng bibili ng sim card at kailangan nitong magpakita ng government-issued ID o anumang katibayan ng identity.

Kapag ito ay naisabatas ang mga aktibo o ginagamit ng sim cards ay kailangang i rehistro sa loob ng isang taon. Maaring i-deactivate ng telecommunications company (TELCO) ang sim cards hindi pina-rehistro.

Nakasaad din sa panukala na magiging confidential ang impormasyon ukol sa sim card buyer maliban na lang kung hingin ng korte o sa anumang lehitimong imbestigasyon.

Samantala, ang sim card buyer na magbibigay ng pekeng pangalan o impormasyon ay makukulong ng 6 hanggang 12 taon habang ang seller o reseller na ilegal na magsasapubliko ng impormasyon ay pagmumultahin ng hanggang 200,000 piso. —sa ulat ni Cely Ortega-Bueno (Patrol 19), sa panulat ni Joana Luna

Mananatiling magkaibigan ang Pilipinas at Tsina sa kabila ng mga isyu patungkol sa agawan ng teritoryo.

Ito ang sinabi ni Pangulong Rodrigo Duterte sa kanyang Talk to the People kagabi, dahil China lang aniya ang patuloy na nagpapaabot ng tulong sa bansa.

Ani pa pangulo, ibang usapin ang pakikipag-kaibigan ng bansa sa Tsina sa isyu ng West Philippine Sea (WPS).

Magugunitang China ang unang bansa na nagpadala ng mga bakuna kontra COVID-19 sa Pilipinas. —sa panulat ni Joana Luna