DWIZ 882

Sobrang bigat na ng pasanin ng taumbayan sa sunod-sunod na pagtaas ng mga pangunahing bilihin kaya dapat maging proactive ang DTI  sa halip na mag-aantay na lamang itong tumaas ang mga presyo na wala man lamang gagawing paunang hakbang

Ito ang inihayag ni Sen.Kiko Pangilinan makaraang manawagan sa  Department of Trade and Industry na makialam o umaksyon sa naka ambang pagtaas ng presyo ng tinapay.

Giit ni Pangilinan  milyung milyon pa nating mga kababayan ang  naghihirap dahil sa  epekto ng  pandemya at ng paghagupit ng bagyong Odette.

Ang panawaga ni Sen. Pangilinan ay sa harap ng report na  hinihiling ng pinakamalaking asosasyon ng  bread makers sa gobierno na makapagtaas sila ng  presyo ng kanilang produkto kasama  ang pinoy tasty at pinoy pandesal.

Ayon kay Pangilinan ang pagtaaas ng presyo ng mga bilihin tulad ng tinapay ay magpapataas sa bilang ng mga nagugutom lalo na ng mga bata na naninirahan sa mga pinaka apektadong  lugar. —ulat mula kay Cely Ortega Bueno (Patrol 19)

Nagpaabot ng pakikiramay ang Armed Forces of the Philippines o AFP sa pagyao ng kanilang dating Chief of Staff na si Retired Gen. Lisandro Abadia sa edad na 83.

Ayon kay AFP Spokesman Col. Ramon Zagala, bibigyan nila ng nararapat na parangal at pagkilala si Abadiya para sa kaniyang natatanging pamana at sakripisyo.

Nagsilbing AFP Chief of Staff si Abadia sa ilalim ng yumaong dating Pangulong Corazon Aquino nuong 1991 hanggang kay dating Pangulong Fidel Ramos nuong 1994.

Si Abadia ang nagsilbing daan para professionalismo sa hanay ng Militar kung saan niya itinaguyod ang bagong sistema ng promosyon.

Pinamunuan din ni Abadia na miyembro ng Philippine Military Academy o PMA Class of 1962 ang Oplan “Lambat Bitag” na siyang lubhang nagpahina sa pwersa ng mga Komunista sa bansa. —ulat mula kay Jaymark Dagala (Patrol 9)

Inanunsyo ng Manila Electric Company o MERALCO na may tapyas singil sila sa kuryente ngayong Enero.

Batay sa anunsyo ng MERALCO, nasa 0.07 sentimo ang tapyas sa kada kilowatt hour.

Dahil dito, mababawasan ng 15 piso ang monthly bill ng mga kumokonsumo ng 200 kilowatt hour.

Ang bawas singil ay bunsod na rin ng pagbaba sa presyo ng kanilang Generation charge.  —ulat mula kay Jaymark Dagala (Patrol 9)

Isasapubliko ng department of Health (DOH) ang resulta ng genome sequencing sa sample ng isang Returning Overseas Filipino (ROF) na tumakas sa quarantine protocols sa isang Hotel sa Makati City upang dumalo sa isang party at kalauna’y nagpositibo sa COVID-19 makalipas ang ilang araw.

Ayon kay Health Undersecretary Maria Rosario Vergeire, nakuha na nila ang resulta ng isinagawang genome sequencing sa naturang quarantine violator pero patuloy arin itong biniberipika base sa RA 11332 at Data Privacy Act.

Sinabi pa ni Vergeire na maaari din na hindi na isiwalat ang nasabing impormasyon upang maprotektahan ang mamamayan.   —sa panulat ni Angelica Doctolero

Tinutulan ni presidential aspirant at Vice President Leni Robredo ang direktiba ni Pangulong Rodrigo Duterte sa mga opisyal ng barangay na arestuhin ang mga indibidwal na hindi pa bakunado.

Ayon kay VP Leni, bigyan dapat ng insentibo, hikayatin at huwag takutin ang mga unvaccinated individuals upang mas dumami pa ang bilang ng mga bakunado.

Ikinalungkot din ni Robredo ang pagiging kampante ng gobyerno sa mabilis na pagluwag ng restriksiyon na isa umano sa posibleng dahilan kaya tumaas ang kaso ng COVID-19 sa bansa.

Kahapon Enero a-9, nakapagtala ang bansa ng 28,707 na panibagong kaso ng COVID-19 sa ilalim ng Alert level 3. —sa panulat ni Angelica Doctolero

Hawak na ng Pulisya ang unang lumabag sa ipinatupad na COMELEC gun ban kasabay ng opisyal na pagsisimula ng panahon ng halalan sa Negros Occidental.

Batay sa ulat ng Kabankalan Municipal Police Station, naharang sa inilatag na checkpoint na si Luno Gaisen, isang tricycle driver.

Nakuha mula sa suspek ang isang kalibre 38 baril nang makita ng nag-iinspeksyong pulis ang handle nito gayundin ang 2 patalim.

Bigo ring makapagpakita ng kaukulang dokumento si Gaisen para sa kaniyang baril dahilan para siya’y arestuhin at ngayon ay nahaharap sa kasong paglabag sa omnibus election code.   —ulat mula kay Jaymark Dagala (Patrol 9)