DWIZ 882

Mayroon pang higit P891-million na stockpiles at standby funds ang Department of Social Welfare and Development.

Batay sa huling tala ng DSWD’S Disaster Response Operations Monitoring and Information Center, sa nasabing halaga, P107.92 million dito ang standbyfunds o quick response fund kung saan P37.18 million dito ang nasa DSWD Central Office at P70.75 million ang nasa field offices.

Habang ang kanilang stockpiles naman ay nasa P783.21 million pa.

Binubuo ito ng P363.9 million na non-food items at P233.25 million  naman ang halaga ng mga food items. –Sa panulat ni Abie Aliño

Inihahanda na ng Commission on Elections ang website para sa e-rallies ng mga kandidato.

Ayon kay Comelec Spokesperson James Jimenez, dito ay pwedeng magsagawa ng livestream ang mga kandidato para limitahan ang in-person campaign events.

Aniya, isasagawa ito tuwing gabi kung saan bibigyan ang bawat kandidato ng assigned time slot para mangampanya.

Sa pamamagitan ng livestream, pwedeng kausapin ng mga kandidato ang kanilang mga supporters at ilatag ang kanilang mga plataporma.

Nakatakda itong isagawa sa Pebrero 8, 2022 kasabay ng pagsisimula ng campaign period para sa halalan 2022. –Sa panulat ni Abie Aliño

Sumuko ang 14 na miyembro ng Bangsamoro Islamic Freedom Fighters (BIFF) sa mga militar sa North Cotabato.

Ayon kay Major General Juvymax Uy ng Philippine Army-6th Infantry Division, bunga ito ng pagsusumikap ng hanay ng mga militar na matuldukan ang grupo bago matapos ang termino ni Pangulong Rodrigo Duterte.

Kabilang sa mga sumuko ang 12 senior member ng BIFF at dalawang menor-de-edad kung saan, narekober ang pitong armas, isang M16 rifle, isang M1 grand rifle, isang M14 rifle, dalawang calibre 50 barret sniper rifle, isang 7.62mm barret sniper rifle, isang cal. 45 pistol at ibat-ibang klase ng bala. —sa panulat ni Kim Gomez

Patay ang dalawang katao habang 15 ang sugatan matapos magsalpukan ang isang elf truck at multicab sa Agusan Del Norte.

Kinilala ang nasawi na sina Alegi Ybanez Bawiga, 21 anyos, driver ng passenger multicab at Glenn Helig Vicente, 42 anyos na driver ng naturang truck.

Ayon sa mga otoridad, patungong Butuan City ang naturang truck na may plakang MAG2724 nang makabangga nito ang isang multicab na may sakay na 15 pasahero sa direksyong papuntang Nasipit, Agusan Del Norte.

Nasawi din ang isa sa mga pasahero habang nagpapagaling na naman sa ospital ang iba pang mga biktima.

Patuloy pa ang imbestigasyon ng mga otoridad sa pinangyarihang aksidente. —sa panulat ni Kim Gomez

Inihayag ni Labor Secretary Silvestre Bello, III na maaaring makaapekto sa inaasahang pagbangon ng employment sector ang muling pagsasailalim ng mas mahigpit na alert level at ang kamakailang resulta ng hagupit ng bagyong Odette.

Ayon kay Bello, ang pagsalanta ng bagyo at ang biglaang pagtaas ng kaso ng COVID-19 ang maglilihis sa patuloy na pag-angat ng ekonomiya at trabaho sa bansa.

Gayunpaman, tiniyak ni Bello na handa ang kagawaran na magbigay ng tulong sa mga manggagawang maaapektuhan ng alert level system.

Samantala, nananatiling matatag ang DOLE sa pakikipagtulungan sa National Employment Recovery Strategy (NERS) Task Force at pribadong sektor upang aktibong suportahan ang mga hakbangin tungo sa patuloy na pagpapabuti at pagbawi ng labor market. —sa panulat ni Kim Gomez

Sinuspinde na ang mga klase at trabaho sa Unibersidad ng Santo Tomas (UST) mula Enero a-10 hanggang Enero a-15.

Pinaalalahanan ng unibersidad ang komunidad na kompletuhin ang health declaration form sa Thomasian Online Medical Services and Support (ThoMedSS) araw-araw at gamitin ang angkop na serbisyo.

Matatandaang una nang sinuspinde ng Polytechnic University of the Philippines (PUP) at Philippine Women’s University (PWU) ang kanilang klase dahil sa tumataas na bilang ng mga kaso ng COVID-19. —sa panulat ni Kim Gomez