DWIZ 882

Nagbabala ang Commission on Human Rights (CHR) laban sa naging direktiba ni Pangulong Rodrigo Duterte na higpitan ang paggalaw ng mga hindi pa nababakunahang indibidwal.

Ayon kay CHR Spokesperson Atty. Jacqueline De Guia, na anumang pag-aresto nang walang warrant ay labag sa konstitusyon.

Dagdag pa ni De Guia, magagawa lamang ang mga walang warrant of arrest sa ilalim ng ilang mga exemption, kabilang na ang mga pag-aresto sa akto ng paggawa ng krimen; ‘hot pursuit’ operation; at muling pagdakip sa mga nakatakas na bilanggo.

Samantala, hinimok ng CHR ang gobyerno na gumamit ng isang human rights-based at isipin ang mga alternatibongparaan sa pag-aresto. —sa panulat ni Kim Gomez

Inihayag ng Philippine General Hospital (PGH) na hindi na isasailalim sa quarantine ang mga healthcare workers na na-expose sa COVID-19 at walang sintomas.

Ito ang kinumpirma ni PGH Spokesperson Dr. Jonas Del Rosario, na nasa 40% workforce ang naapektuhan, nahawa o na-expose sa COVID-19 sa nasabing ospital.

Dagdag pa ni Del Rosario, hindi kaya ng ospital na i-quarantine ang mga empleyado, doktor, nars, at mga kawani dahil walang sinuman ang mangangasiwa sa mga serbisyo ng pagamutan.

Sa huling tala, nasa 255 sa 2,000 COVID frontliners sa PGH ang nagkasakit habang umabot naman sa 51% ang ICU bed occupancy sa National Capital Region (NCR) mula sa 25% lang noong nakaraang linggo. —sa panulat ni Kim Gomez

Inihayag ng Pharmaceutical and Healthcare Association of the Philippines (PHAP) na nagkaroon ng temporary out of stock situation sa ilang mga botika sa Metro Manila.

Kasunod ito ng mataas na demand ng mga anti-flu pills dahilan kaya walang makuhang gamot ang mga suppliers.

Ayon kay PHAP Vice President Jannette Jakosalem, kanilang sisiguraduhin na mapapalitan at maibibigay ang kailangan ng drug stores sa bansa.

Sa kabila nito, nagpaalala si Jakosalem sa publiko na bumili ng mga gamot sa mga lisensiyadong drug stores o sa mga aprubado ng Food and Drug Administration (FDA) at Department of Trade and Industry (DTI). —sa panulat ni Kim Gomez

Tiniyak ng Malacañang sa publiko na hindi magdedeklara ang gobyerno ng “total lockdown” para mapigil ang kasalukuyang pagtaas ng kaso ng COVID-19 sa bansa.

Ayon kay acting presidential spokesperson at Cabinet Secretary Karlo Nograles, walang katotohanan ang kumakalat na voice clip kaugnay sa pag-stock ng mga essential supplies dahil sa posibleng pagpapatupad ng lockdown at martial law ng pamahalaan.

Tiniyak ni Nograles sa publiko na ang imbentaryo ng bansa para sa mga pangunahing bilihin ng pagkain, partikular na ang bigas, ay sapat.

Nanawagan naman si Nograles sa publiko na kunin lamang ang kanilang impormasyon mula sa mga mapagkakatiwalaang source. —sa panulat ni Kim Gomez

Inihayag ni Quezon City Representative Alfred Vargas na siya ay nagpositibo sa COVID-19.

Ayon kay Vargas, siya ay asymptomatic at under isolation.

Hindi naman binanggit ni Vargas kung kanino o sino ang taong kaniyang mga nakasalamuha.

Samantala, patuloy ang trabaho ni Vargas habang naka-quarantine upang matiyak na patuloy ang mga serbisyo sa kanyang mga nasasakupan. —sa panulat ni Kim Gomez