DWIZ 882

Sisimulan na ngayong araw ng Philippine National Police (PNP) ang kanilang checkpoint operations sa iba’t ibang bahagi ng bansa.

Ayon kay PNP Spokesperson Col. Roderick Alba, magsasagawa ng checkpoint operations sa mga strategic location upang mahigpit na ipatupad ang pagbabawal sa pagdadala ng baril ng mga hindi otorisadong indibidwal simula ngayong linggo, Enero a-9 ng hatinggabi.

Bilang pangkalahatang tuntunin, tanging ang mga bonafide na pulis, militar at mga miyembro ng mga ahensyang nagpapatupad ng batas na may kumpletong uniporme ang pinapayagang magdala ng mga baril sa buong panahon ng halalan.

Samantala, mananatili ang COMELEC gun ban hanggang matapos ang halalan sa Mayo. —sa panulat ni Kim Gomez

Nagbabala sa publiko ang Social Security System (SSS) partikular sa mga miyembro at empleyado kaugnay sa mga scammers at fixers.

Kasunod ito ng pagtaas ng bilang ng naitatalang insidente ng panloloko sa kanilang mga kliyente.

Ayon kay SSS President at Chief Executive Officer Aurora Ignaci, hindi dapat nagbibigay ng kahit anong impormasyon angmga miyembro ng kanilang ahensya  kagaya ng social security number, credentials, at iba pang personal information.

Nilinaw din ng ahensya na libre at walang bayad ang pagsali sa social media groups na nagbibigay ng tulong sa pag-proseso ng ilang online transactions. —sa panulat ni Angelica Doctolero

Lilimitahan ng government service insurance system (GSIS) ang kanilang onsite operations kasunod ng muling pagpapatupad ng alert level 3 sa Metro Manila.

Kabilang sa mga serbisyong limitado ay ang Ecard enrollment at card releasing; cashiering; paglabas ng tseke; pagpapalabas ng clearance, mga sertipikasyon; pabahay at non-life insurance sa main site sa Pasay City maging sa iba pang mga sangay nito sa Mindanao Avenue, Quezon City, at Bulacan.

Ayon sa GSIS, magsisimula ang onsite services mula alas-8 ng umaga para sa kanilang kliyente hanggang alas-dose ng tanghali maliban lang sa cashiering na hanggang alas-tres ng hapon.

Samantala, nagpaalala naman sa publiko ang naturang ahensya na pansamantala munang gumamit o magbayad online at iba pang nakalista sa GSIS website. —sa panulat ni Angelica Doctolero

Inaresto ng mga tauhan ng Station Drug Enforcement Unit (SDEU) ang 13 indibidwal makaraang ikasa ang buy-bust at anti-criminality operation sa magkakahiwalay na lugar sa Bulacan.

Base sa report ng mga otoridad ang mga nahuli ay mula sa sta. Maria, San Jose, Meycauayan City, Plaridel at Pandi, Bulacan.

Nasamsam sa mga suspek ang 11 pakete ng shabu, motorsiklo, candy box at buy-bust money.

Nahaharap sa kasong paglabag sa  RA 9165 o Comprehensive Dangerous Drugs Act of 2002 at violation of RA 7877 o ang Anti-Sexual Harassment Act of 1995 ang mga naarestong suspek. —sa panulat ni Angelica Doctolero

Sugatan ang apat na bumbero at isang volunteer sa naganap na sunog sa Starmall Alabang, Muntinlupa City kahapon kung saan, itinaas ang task force Alpha.

Ayon sa Bureau Of Fire Protection, tumagal ng labing limang oras ang sunog bago idineklarang fire under control.

Sa imbestigasyon ng mga otoridad, nagsimula ang sunog sa ground level ng 4-story commercial building kung saan, rumesponde ang 226 fire trucks at siyam na ambulansya ng BFP at volunteers.

Sa ngayon, hinihintay pa ang official statement ng nasabing mall.  —sa panulat ni Angelica Doctolero

Humihirit sa pamahalaan ang Metro Manila mayors na itaas sa Alert Level 4 ang Alert Level System sa National Capital Region (NCR).

Ito ay para matugunan ang lumalalang bilang ng tinatamaan ng Corona Virus Disease makaraang luwagan ng gobyerno ang restriksiyon sa bansa.

Ayon sa mga Alkalde, dapat na ikunsidera ang pagtaas ng alert level gaya ng mobility at hospital care utilization.

Kahapon, sumipa sa record-high na 26 thousand 458 ang naitalang bagong covid-19 cases sa bansa sa ilalim ng alert level 3. —sa panulat ni Angelica Doctolero

Nababahala ngayon ang US Food and Drug Administration kaugnay sa paggamit ng Rapid Antigen Test.

Ayon sa US-FDA, hindi agad matutukoy ang Omicron variant sa pag-swab lamang ng ilong sa pamamagitan ng naturang test.

Dahil dito, nanawagan ang manufacturers ng US approval na payagan ang users na kumolekta ng sample mula sa lalamunan upang agad na matukoy ang Omicron variant sa isang indibidwal. —sa panulat ni Angelica Doctolero

Naniniwala ang HEPE ng Adult Infectious Diseases and Tropical Medicine Unit ng San Lazaro Hospital at miyembro ng Department Of Science And Technology’s Vaccine Expert Panel Dr. Rontgene Solante na mayroon nang community transmission ng Omicron variant sa bansa.

Ayon kay Solante, ang pagtaas ng kaso ng COVID-19 sa bansa sa mas maiksing panahon at oras ay nagpapakita ng mga sintomas ng upper respiratory tract na tatlo hanggang limang beses na mas nakahahawa kaysa Delta variant.

Gayunpaman, wala pang pormal na anunsyo ang Department Of Health tungkol sa community transmission ng Omicron variant. —sa panulat ni Angelica Doctolero