DWIZ 882

Pinalawak pa ng lokal na pamahalaan ng Quezon City ang sakop ng kanilang libreng COVID-19 testing program.

Ayon kay Quezon City Mayor Joy Belmonte, 17 community-based testing centers (CBTS) na ang sakop ng programa na matatagpuan mula District 1 hanggang 6 at sa QC Xperience (QCX) sa Quezon Memorial Circle.

Layon nitong mapabilis pa ang pagtukoy sa mga kaso at mapigilan ang pagkalat nito.

Bawat testing center ay mayroong swab boot na kayang tumanggap ng 100 hanggang 200 indibidwal kada araw.

Hindi pinapayagan ang walk-in kaya kailangang magparehistro online sa quezoncity.gov.ph. —sa panulat ni Abby Malanday

Posibleng bumaba sa isang libo ang maitatalang bagong kaso ng COVID-19 sa Metro Manila pagsapit ng Valentine’s Day.

Ayon kay OCTA Research Fellow Dr. Guido David, ito ay kung patuloy na bababa ang trend ng mga kaso sa rehiyon.

Umaasa naman si Guido na bababa na sa limang-daan ang maitatalang kaso pagsapit naman ng katapusan ng Pebrero sa NCR.

Maliban sa Ncr Plus, sinabi ni David na tumaas na ang kaso sa labas ng rehiyon kung saan mula sa 4K nitong Enero 12 ay umakyat na ito sa 12K nitong Enero 20.

Pero sa kabila ng pag-plateau o pagpantay ng kaso ng COVID-19 sa Metro Manila, patuloy ang paggiit ng DOH na kailangan pa ng pag-aaral upang ito ay mapatunayan. —sa panulat ni Abby Malanday

Hinimok ng Department of the Interior and Local Government (DILG) ang mga indibidwal na nagpositibo sa COVID-19 self-administered test kits na agad makipag-ugnayan sa mga barangay officials.

Sa gitna na rin ito ng tanong kung dapat bang dumiretso sa self-quaratine ang mga indibidwal kahit hindi ipina-paalam ang kanilang kondisyon sa mga otoridad.

Ayon kay DILG Undersecretary Martin Diño, kailangan ito upang agad na maalagaan ng barangay ang mga nagpositibo.

Hanggang nitong Enero 18, nasa labing-isang manufacturers ng self-administered antigen tesk kits ang nag-apply ng approval sa Food and Drug Administration (FDA). —sa panulat ni Abby Malanday

Sarado simula kahapon Enero 21 hanggang Enero 31 ang ilang korte sa bansa bunsod ng pagtaas ng kaso ng COVID-19.

Batay sa inilabas na circular ng Office of the Court Administrator, sarado ang mga sumusunod na korte sa nasabing petsa.

Ito ay sa mga lugar ng;

• Apayao sa Cordillera Administrative Region
• Puerto Princesa City sa Region 4-B
• Masbate sa Region 5
• Siquijor sa Region 7
• Zamboanga Del Norte at Zamboanga Sibugay sa Region 9
• Lanao Del Norte sa Region 10
• Davao De Oro at Davao Oriental sa Region 11
• North Cotabato, Sarangani at Sultan Kudarat sa Region 12
• Surigao Del Norte Sa Caraga Region of Mindanao
• at Maguindanao at Basilan sa BARMM

—sa panulat ni Abby Malanday

Humigit na sa P100-bilyon ang naipalabas na home loan ng Home Development Mutual Fund o PAG-IBIG Fund sa kabila ng epekto ng COVID-19 sa bansa.

Sa inilabas nitong pahayag, kabuuan itong P100.8-bilyon na pinakamalaking halaga na naipalabas sa loob ng isang taon.

Nitong 2021, tumaas ng 58% ang halagang naipalabas ng PAG-IBIG fund na nahigitan ang naitala noong 2020 at 2019.

Good news naman ito para sa kanilang miyembro dahil mas maraming pilipino ang nagkakaroon ng sariling bahay sa gitna ng pandemya. —sa panulat ni Abby Malanday

Hinimok ng Department Of Health (DOH) ang publiko na magsuot ng dobleng mask upang ma-kontrol ang  filtration at mapigilan ang anumang pagkalat ng COVID-19.

Ayon kay Health Undersecretary Maria Rosario Vergeire, kailangan ito upang maging ligtas ang indibidwal sa virus.

Sa nasabing paraan, inirerekomenda ang surgical mask na pinatungan ng telang mask.

Pinaka-inire-rekomenda naman ang paggamit ng N95 at KN95 para sa maximum na proteksyon laban sa COVID-19.

Ang surgical mask ay kailangang palitan sa loob ng anim na oras habang madalas dapat na labhan ang telang mask.  —sa panulat ni Abby Malanday

Aabot sa P1B ng equipment ang ibinigay na donasyon ng China sa Armed Forces of the Philippines (AFP).

Ayon sa Department of National Defense (DND), inisyal na batch pa lamang ito na dumating sa bansa nitong Enero 16.

Naglalaman ito ng ilang rescue at relief equipment, drone sytem, detectors, water purification vehicles, ambulansiya, sasakyan ng bumbero at x-ray machines.

Habang mayroon din itong Explosive Ordinance Disposal (EOD) robots at iba pang kagamitan.

Sa susunod na buwan magaganap ang pormal ang turn-over ng mga kagamitan sa DND at AFP.—sa panulat ni Abby Malanday

Inaresto ng National Bureau of Imbestigation (NBI) ang ilang dawit umano sa pangha-hack at pagnanakaw ng pera sa accounts holders ng BDO.

Naganap ito noong Disyembre kung saan nasa 400 ang naging biktima.

Sa nasabing entrapment operation, dalawang Nigerian at isang Pinoy na kasabwat nila ang nahuli.

Ayon sa NBI, nagsimula ang lahat ng sumuko ang isang alyas ‘pikachu’.

Agad namang nakipag-ugnayan ang nbi sa mga bangko para maiwasang maulit pa ang krimen.

Kinasuhan na ang mga suspek ng paglabag sa Cybercrime Prevention Act.  —sa panulat ni Abby Malanday