DWIZ 882

Nalambat ng mga tauhan ng PNP Criminal Investigation and Detection Group (CIDG) ang anim na indibidwal dahil umano sa pagbebenta ng hindi awtorisadong rapid antigen test kits para sa COVID-19 na nagkakahalaga ng mahigit 1.2 milyong piso.

Sa ulat kay PNP CIDG Director P/MGen. Albert Ignatius Ferro, unang isinagawa ang operasyon sa Bacoor City, Cavite, kung saan nahuli sina Maria Eileen Caballero at Mike Anderson Yao at nakuha sa kanila ang dalawang kahon ng test kits na may estimated value na 360,000 piso.

Habang nahuli rin si Maria Lourdes Judith Capucion at nakumpiska sa kanya ang dalawang kahon ng test kits na tinatayang nagkakahalaga ng 486,000 piso.

Sunod na isinagawa ang operasyon sa isang condominium sa Ermita, Manila, kung saan natiklo sina Joy Anne Llorca alyas Jas Fernando, Oliver Ong at Julius Caesar Ilagan matapos ang online transaction sa pulis na nagpanggap na poseur buyer.

Nakuha sa kanila ang 5 kahon ng test kits na tinatayang nagkakahalaga ng 450,000 piso.

Mahaharap ang mga suspek sa paglabag sa Section 10 ng RA 9711 o Food and Drug Administration (FDA) Act of 2009.

Pinag-iingat naman ni Ferro ang publiko laban sa mga nagsasamantala sa pagtaas ng mga nagpopositibo sa COVID-19 sa bansa. —sa ulat ni Jaymark Dagala (Patrol 9)

Hindi minasama ng kampo ni Presidential Aspirant at dating Sen. Ferdinand BongBong Marcos ang ginawang pag-ampon ng PDP LABAN Cusi faction sa kaniyang running mate na si Davao City Mayor Sara Duterte-Carpio.

Ayon kay Atty. Vic Rodriguez, Chief of Staff at Tagapagsalita ni BBM, malaya ang PDP Laban na ampunin si Mayor Sara at walang namang batas na nagbabawal dito.

Ipinabatid sa kanila LAKAS CMD at ng Hugpong ng Pagbabago na partido ng Presidential Daughter na walang nangyaring anumang pirmahan sa pagitan nila at ng PDP Laban.

Malinaw aniyang indikasyon ito ng pagpapatibay ng alyansa sa pagitan nila BBM at Mayor Sara bilang magkatambal sa Halalan 2022.

Basta’t sa panig ng Partido Federal ng Pilipinas na siyang partido ni Marcos at ng Uniteam, sinabi ni Atty. Rodriguez na ang hakbang ng PDP laban na ampunin si Mayor Sara sa kanilang partido ay lubos nilang iginagalang. —sa ulat ni Jaymark Dagala (Patrol 9)

Patay ang isang pulis instructor matapos ang insidente ng fire accident sa loob ng Special Action Force (SAF) training center sa Pampanga.

Kinilala ang nasawi na si Police Master Sergeant Godfrey Marquez Cagdan, 38 anyos.

Ayon sa mga otoridad, nakarinig ng isang putok ng baril si Staff Sergeant Lovely Curilan Pungos mula sa barracks at nang kanyang tinungo ang kwarto ni Cagdan nakita niya itong duguang at nakasandal ang ulo sa kanyang higaan.

Patuloy ang isinasagawang imbestigasyon ng mga pulis sa sinasabing accidental firing.  —sa panulat ni Kim Gomez

Patay ang isang negosyante na sangkot sa drug trade matapos pagbabarilin ng dalawang hindi kilalang lalaki sa Batangas.

Kinilala ang biktima na si Rodel Alegria, may-ari ng tindahan.

Ayon sa mga otoridad, abala sa loob ng kanyang tindahan si Alegria nang dumating ang dalawang lalaki na nagpanggap na mga customer at pinaputukan ang biktima na kinasawi sa insidente.

Nang makita ng mga ito ang nakabulagtang katawan ng biktima mabilis na naglakad ang dalawang suspek patakas.

Patuloy ang imbestigasyon sa motibo ng krimen lalo na ang lumalabas na impormasyon na ang biktima ay nasa tokhang list at patuloy ang ginagawang iligal na aktibidad sa droga.

Samantala, patuloy ding pinaghahanap ng mga operatiba ang dalawang lalaking suspek. —sa panulat ni Kim Gomez

Patay ang isang hepe matapos mabaril nito ang sarili sa Mobo, Masbate.

Kinilala ang biktima na si Police Lieutenant Colonel Steve Dela Rosa, 39 anyos.

Ayon sa mga otoridad, nag-aayos si Dela Rosa ng kanyang mga gamit at uniporme sa loob ng kanilang kuwarto nang biglang nakarinig ng putok ng baril ang misis nito. Agad namang pinuntahan ng asawa ang kanilang kuwarto at natagpuan ang duguang mister.

Gamit ang motorsiklo ay mabilis na iniangkas ang duguang biktima ng isa sa kamag-anak nito para isugod sa ospital pero idineklara ng mga doktor na dead-on-arrival. —sa panulat ni Kim Gomez