Drew Nacino

Pinirmahan na ni Pangulong Rodrigo Duterte ang Executive Order (EO) na nag-a-apruba sa Coconut Farmers And Industry Development Plan (CFIDP) para sa industriya ng pagniniyog sa bansa.

 Nakapaloob sa EO 172 ang paglalabas ng 75 billion peso coco levy trust fund para sa mga coconut farmers.

 Sa ilalim nito, dapat na maipatupad ang CFIDP ng Philippine Coconut Authority alinsunod sa Republic Act 11524 o ang Coconut Farmers and Industry Trust Fund Act na isinabatas noong Pebrero 2021.

 Layunin ng pag-apruba sa CFIDP na mapataas ang pagkalahatang productivity at kita ng mga magniniyog, maresolba ang kahirapan, ma-i-rehabilitate at i-modernize ang coconut industry.

 Welcome naman para kay Agriculture Secretary William Dar ang paglagda ng pangulo sa nasabing kautusan.

 Samantala, matapos isabatas, 10 billion pesos ang dapat na ibigay sa trust fund habang 10 billion din sa ikalawang taon; tig-15 billion sa ikatlo at ika-apat na taon habang 25 billion pesos sa ikalimang taon, kabilang ang interes.

Kinasuhan na ang tatlong guwardiya sa isang subdivision sa Quezon City matapos harangin ang mga pulis na mag-iimbestiga sa suv driver na sangkot sa hit-and-run incident sa Mandaluyong City.

Ayon kay Mandaluyong City Police Chief, Col. Gauvin Mel Unos, kasong ‘obstruction of justice’ ang isinampa laban sa mga guwardya, kabilang ang security officer ng Ayala Heights, sa barangay Old Balara.

Dalawang beses umanong nagtangkang pumasok sa exclusive subdivision ang mga pulis pero hindi sila pinapasok ng mga security guard.

Base sa record ng Land Transportation Office, isang Jose Antonio San Vicente ang nagma-may-ari ng puting Toyota RAV-4 na may plakang NCO-3781 na bumundol at sumagasa sa security guard ng SM Megamall na si Christian Floralde.

Hindi pa masabi ng mga otoridad kung nasangkot na ang may-ari ng sasakyan sa dating kaso at kung may koneksyon siya sa mga pulis.

Nahaharap ang driver ng suv sa kasong frustrated murder at abandonment of one’s own victim at bagaman pinadalhan ng show cause order, hindi naman ito sumipot sa pagdinig ng L.T.O.

Tiniyak ni Agriculture Secretary William Dar na kanilang nililinis ang listahan ng mga magsasakang tumatanggap ng financial assistance mula sa gobyerno.

Bunsod ito ng hinaing ng ilang magsasaka, partikular sa Bicol Region, na kahit hindi naman nagtatrabaho sa agriculture sector ay nabibigyan ng ayuda.

Inihayag ni Dar na taon-taon nilang nililinis ang Registry System for Basic Sector in Agriculture o R.S.B.S.A upang matiyak na pawang mga magsasaka at mangingisda lamang ang tumatanggap ng tulong pinansyal.

Nakikipag-ugnayan anya sila sa mga local government unit, lalo sa mga municipal agriculturist, upang tutukan at suriing maigi ang mga inilalagay sa registry system ng mga agricultural laborer.

Nilinaw naman ng kalihim na bukod sa mga farm laborer, kasama rin dapat sa listahan ang mga may-ari ng mga agricultural land, na kadalasang nagpaparenta ng kanilang sakahan.

Aminado naman si Dar na may mga nakalulusot sa registry system na hindi naman talaga farm laborer kaya’t hindi nila tinitigilan ang inventory upang matiyak na nakararating ang ayuda ng gobyerno sa mga tunay na nangangailangan.

Nanawagan na si Agriculture Secretary William Dar sa pagrelease ng additional 6 billion peso fund para sa fertilizer subsidy.

Ito’y sa gitna ng tumataas na production cost, lalo sa pagtatanim ng palay bunsod ng walang prenong pagtaas ng mga produktong petrolyo at fertilizer dulot ng giyera sa pagitan ng Ukraine at Russia.

Aminado si Secretary Dar na nakababahala kasing hindi na masyadong naglalagay ng pataba ang mga magsasaka dahil sa mataas na presyo nito, na maaaring makaapekto sa produksyon.

Bagaman ipinagmalaki ng kalihim na umabot sa record harvest na 19.96 million metric tons ang produksyon ng palay noong isang taon, nanganganib naman itong lumiit kung tataas pa ang production cost dahil sa napakamahal na fertilizer.

Sakali namang tumaas ang production maging ang labor costs, namemeligro anyang lumagpak sa 1.1 million metric tons ang produksyon ng palay na may malaking epekto sa food security ng bansa.

Malabong makamit ang target na makapagbenta ng mas murang bigas sa unang quarter ng susunod na taon.

 Ito ang inamin ni Agriculture Secretary William Dar sa kabila ng pahayag ng Department of Agrarian Reform (DAR) na kakayaning magbenta ng 20 pesos na kada kilo ng bigas simula sa unang quarter ng taong 2023.

 Ayon kay Dar, isang malaking hamon ang “campaign promise” ni incoming President Ferdinand “Bongbong” Marcos Jr. na ibaba ang presyo ng bigas.

 Bagaman suportado ng kalihim ang paghahangad ni Marcos na price cut, marami anyang prosesong pagdaraanan bago ito makamit.

Ipinaliwanag ng DA Secretary na mahabang panahon pa ang pagdaraanan bago tuluyang maibaba sa 20 pesos ang kada kilo ng bigas.

 Base anya sa kanilang analysis, dapat munang maibaba ang production cost ng palay na ngayon ay nasa 15 pesos na ang kada kilo ng farm gate price sa bansa.

 Gayunman, inaasahang tataas pa ang production cost dahil nagmahal ang fertilizer at oil products dulot ng giyera sa pagitan ng Ukraine at Russia kaya’t malaking palaisipan kung paano pa ibaba ang presyo ng bigas.

 Samantala, umaasa ang kalihim na tatalakayin nila sa task group on food security ang sinasabing formula ng DAR upang maibaba ang presyo ng bigas.

Ibinabala ng dalawang food agencies ng United Nations ang namemeligrong kaliwa’t kanang food crisis sa mundo.

Bunsod ito ng climate change tulad ng tagtuyot at epekto ng COVID-19 pandemic at giyera sa Ukraine na nagresulta sa pagsirit ng presyo ng mga produktong petrolyo at pagkain.

Ayon sa UN–World Food Program (WFP) at Food and Agriculture Organization (FAO), lubhang maaapektuhan ng global food crisis ang milyun-milyong pinaka-mahihirap na pamilya.

Lumala anila ang sitwasyon sa nakalipas na mahigit isang dekada, partikular sa Indonesia, Pakistan, Peru at Sri Lanka.

Ipinanawagan din ng WFP at FAO ang agarang humanitarian action upang masaklolohan ang mga apektadong pamilya sa mga inaasahang hunger hotspot sa mga susunod na buwan.

Nagbabala rin ang dalawang nabanggit na UN agencies na labis nang nakaapekto sa walang prenong pagtaas ng presyo ng pagkain at enerhiya ang giyera sa pagitan ng Ukraine at Russia, simula noong Pebrero.

Isa hanggang dalawang bagyo ang maaaring pumasok sa Philippine Area of Responsibility (PAR) ngayong Hunyo.

Ayon sa PAGASA, posibleng maapektuhan ng mga papasok na sama ng panahon ang Eastern Visayas at Bicol Regions kung saan maaari itong mag-landfall.

Sakaling mag-landfall sa Bicol, maaaring dumiretso ang bagyo sa Metro Manila.

Gayunman, may tsansa pa ring lumihis ang bagyo sa PAR at hindi maka-apekto sa bansa pero maaari naman nitong palakasan ang Southwest Monsoon o hanging Habagat na magdudulot ng malakas na ulat at pagbaha.

Nanindigan ang Duterte administration na hindi dapat suspendihin ang pagpapataw ng Excise Tax sa oil products sa kabila ng hindi maawat na pagtaas ng presyo nito.

Iginiit ni Acting Presidential Spokesman at PCOO Secretary Martin Andanar na ginagamit ang nasabing buwis upang pondohan ang mga programa ng gobyerno.

Ang nakokolekta anyang Excise Tax ay ibina-budget din para sa sweldo ng mga guro, Build, Build, Build Program at iba pang proyekto.

Ipinauubaya na naman ng Malakanyang sa incoming administration ni President-Elect Bongbong Marcos ang pagpapasya kung pananatlihin nito ang polisiya.

Tinutukoy na ng Department of Health (DOH) ang travel history ng tatlo pang karagdagang kaso ng COVID-19 Omicron subvariant BA.5 sa Pilipinas.

Dalawa sa mga bagong kaso ay galing sa CALABARZON habang inaalam pa ang lokasyon ng isa at kung pagbabatayan ang history ng mga kaso ay masasabing wala pang international sources para sa BA.5

Ayon kay Health Undersecretary Maria Rosario Vergeire, isa sa karagdagang kaso ay fully vaccinated na kontra COVID-19 at ang isa ay walang bakuna habang inaalam pa ang vaccination status ng isa pa.

Inaalam din anya ang mga naging sintomas ng tatlo maging ang kanilang naging close contacts.

Nilinaw naman ni Vergeire na ang tatlong indibidwal ay nakakober na at hindi direktang konektado ang pagpasok ng mas nakahahawang Omicron subvariants sa bahagyang pagtaas ng mga nagpopositibo sa COVID-19 sa bansa.