Drew Nacino

Makabubuting payagan ng Department of Energy (DOE) na haluan ng mas maraming bioethanol ang gasolina at diesel para bumaba ang presyo ng mga ito.

Ito ang mungkahi ni Senate Committee on Economic Affairs Chairperson Imee Marcos habang pinagde-debatehan pa ng mga mambabatas kung sususpindehin o hindi ang Fuel Excise Tax.

Tiyak anyang makatutulong sa mga consumer ang paghahalo ng mas maraming bioethanol sa gasolina at diesel.

Nagbabala naman si Marcos na may mga kasunod pa ang big time oil price hike lalo’t hindi pa natatapos ang giyera sa pagitan ng Ukraine at Russia.

Sa ilalim ng Biofuels Act of 2006, ino-obliga ang mga kumpanya ng langis na maglabas ng supply ng gasolina na may halong 10% ng bioethanol.

Gayunman, maaaring magrekomenda ang National Biofuels Board na taasan pa ang ‘minimum requirement’ alinsunod sa pagpayag ng kalihim ng DOE. —sa ulat ni Cely Ortega-Bueno (Patrol 19)

Handa si outgoing Senate President Tito Sotto na tumulong sa kampanya kontra iligal na droga ng susunod na administrasyon ni President-Elect Bongbong Marcos.

Ayon kay Sotto, noong Mayo 28 ay nagkausap na sila ni Marcos sa opisina nito makaraan siyang imbitahan.

Pinag-usapan anya nila ni PBBM ang maaari niyang maitulong sa pagsawata sa illegal drugs.

Tiniyak naman ni Sotto na maka-aasa ng tulong mula sa kanya si Marcos.

Gayunman, wala pang nabanggit ang senador kung may partikular na posisyon na ini-alok sa kanya ang susunod na pangulo. —sa ulat ni Cely Ortega-Bueno (Patrol 19)

Dapat nang paspasan ng Land Transportation Franchising And Regulatory Board (LTFRB) at Department of the Interior and Local Government (DILG) ang pagsusuri at pagsusumite ng listahan ng mga dapat makatanggap ng fuel subsidy.

Ito ang panawagan ni Senator Grace Poe sa harap ng bantang transport strike ng mga Public Utility Vehicle drivers at operators sa oras na hindi maaksyunan ng pamahalaan ang problema sa walang prenong oil price hike.

Ayon kay Poe, Chairman ng Committee on Public Services, ang mabagal na pagtugon ng mga kinauukulang ahensya ng pamahalaan ang nagtutulak sa transportation sector para maglunsad ng transport strike.

Batay sa pinaka-huling datos, aabot na sa 250,000 operators at drivers na ang nakatanggap ng subsidiya mula sa kabuuang 264,000 na target beneficiaries.

Samantala, wala pang naisusumite ang DILG na listahan ng mga beripikadong tricycle drivers at operators. —sa ulat ni Cely Ortega-Bueno (Patrol 19)

Tatanggap ang Pilipinas ng nasa 300,000 COVID-19 vaccine doses mula sa COVAX facility sa Hunyo 20 upang palitan ang mga nag-expire na bakuna.

Ayon kay Health Undersecretary at Spokesperson Maria Rosario Vergeire, hindi  pa sila natatapos sa wall-to-wall inventory ng mga bakuna pero nakikipag-negosasyon sa COVAX facility para palitan ang mga expiring vaccine.

Sa tansa naman ni National Vaccination Operations Center Head at Health Undersecretary Myrna Cabotaje, halos dalawang milyong doses ng bakuna ang nakatakdang mag-expire sa katapusan ng Hunyo.

Simula Pebrero 28 noong isang taon hanggang nito lamang Hunyo 1, aabot na sa  245,233,560 vaccine doses na ang natanggap ng Pilipinas.

Sa nasabing bilang, nasa 194,172,000 doses ang naipamahagi hanggang nitong Mayo 29.

Tinatayang 69.5 million o 77.3% na ng 90 million eligible population ng bansa ang fully vaccinated.

Dapat mag-hire o kumuha na ng mahusay na abogado si outgoing health secretary Francisco Duque III.

Ito ang payo ni outgoing senate Minority Leader Franklin Drilon makaraang aminin ni Duque na wala siyang pinagsisihan sa naging paggampan niya ng tungkulin.

Ayon kay Drilon, maliwanag sa ilalim ng revised penal code, na si Duque ay principal by indispensable cooperation sa nakitang katiwalian sa paggamit sa pondo ng DOH para ipambili ng pandemic supplies.

Hindi anya makagagawa ng kasong pandarambong ang procurement service ng Department of Budget and Management o PS – DBM kung walang inilipat sa kanila ang DOH na pondong 42 billion pesos.

Iginiit ng senador na ilegal ang pagkakalipat ng nabanggit na pondo sa PS – DBM dahil wala itong kaukulang dokumentasyon.

Nangyari anya ang ilegal na paglilipat ng naturang pondo sa ilalim ng pamumuno ni Duque sa kasagsagan ng COVID-19 pandemic kaya bahagi siya ng sabwatan para makapangloko sa paggamit sa kaban ng bayan.

Una nang nabunyag sa senate blue ribbon committee hearing na ginamit ang naturang halaga sa pagbili ng pandemic supplies sa pharmally na walang sapat na kapital at lumitaw pang overprice ang mga biniling supplies.