Drew Nacino

Nakatakda nang dinggin ng Land Transportation Franchising And Regulatory Board (LTFRB) ngayong araw ang mga petisyon ng mga transport group sa dagdag na minimum fare sa jeep sa gitna ng walang prenong oil price increase.

Marso pa nang ihain ng Pasang Masda, Alliance of Transport Operators and Drivers Association of the Philippines (ALTODAP) at Alliance of Concerned Transport Organizations at 1-Utak sa LTFRB ang petisyon na 5 peso fare increase na magreresulta sa 15 pesos na pasahe kung aaprubahan.

Hiniling naman ng liga ng transportasyon at operators ng Pilipinas ang dagdag sais pesos.

Ayon sa board, inaasahan nilang magsusumite ang mga petitioner ng kailangang supporting evidence para sa kanilang mga petisyon.

Magugunitang binoycot ng LTOP, Pasang Masda, ACTO, ALTODAP at Stop and Go Transport Coalition ang mga naunang hearing para sa mga kahalintulad na petisyon dahil umano sa pagtanggi ng LTFRB na dinggin ang fare hike petitions.

Ikinabahala ni President-elect Bongbong Marcos ang nilalaman ng Senate Committee report na tumutukoy sa mga sangkot sa agricultural smuggling.

Ito ang ibinunyag ni outgoing senate president Vicente “Tito” Sotto III matapos isumite kay Marcos ang nasabing listahan.

Umaasa si Sotto na maaaksyunan ng susunod na Pangulo ang issue ng smuggling dahil siya mismo ang uupo na kalihim ng Department of Agriculture.

Samantala, 17 senador ang lumagda sa naturang committee report ng committee of the whole.

Tinatayang 3,500 katao ang dumalo sa “Salamat PRRD” thanksgiving concert ni Pangulong Rodrigo Duterte sa Quirino Grandstand, sa Maynila.

Hindi napigilan ng malakas na ulan ang mga nanood ng concert na pumunta ng Quirino na nagsilbi ring venue ng miting de avance ni Duterte noong 2016 elections.

Ayon kay Njel De Mesa, event coordinator ng Salamat PRRD, ang nasabing aktibidad ay pasasalamat din ng supporters at fans na tumindig para sa Pangulo sa kabila ng mga batikos.

Dakong ala-7 kagabi nang dumating ang Pangulo sa Grandstand kasama ang ilan pang outgoing at incoming government officials tulad nina senador Bong Go, Imee Marcos at Senator-elect Robin Padilla.

Kabilang naman sa mga nag-tanghal sina Andrew E., Chad Borja, Dulce, Freddie Aguilar, Ice Seguerra, Isay Alvarez, Jed Madela, Jimmy Bondoc, Martin Nievera at Moymoy Palaboy.

Ibinabala ng mga transport group na posible pang mabawasan ang mga bumibyaheng Public Utility Vehicle dahilan upang mahirapan lalo ang mga commuter na makasakay.

Sa gitna ito ng walang prenong pagtaas ng presyo ng mga produktong petrolyo.

Ayon kay Samahan ng mga Transport Operators ng Pilipinas Managing Director Juliet De Jesus, asahan pa sa mga susunod na araw o linggo ang kaunting bilang mga PUV partikular sa Metro Manila.

Ito, anya, ay kung magpapatuloy sa mga susunod na araw ang price increase sa krudo.

Iginiit ni De Jesus na dapat nang ikunsidera ng gobyerno ang suspensyon ng excise tax sa krudo o tanggalin ang value added tax at taripa sa naturang produkto.

Samantala, inihayag naman ni Alliance of Transport Operators and Drivers Association President Melencio “Boy” Vargas na hinihintay na lamang nila ang ikalawang bugso ng fuel subsidies upang makabiyahe ang iba pa nilang miyembro.