Drew Nacino

Kasalukuyang naka-confine sa Makati City Medical Center si dating senate president Juan Ponce Enrile makaraang tamaan ng COVID-19.

Tatlong araw nang nasa ospital ang 98-anyos na incoming presidential legal counsel matapos ma-diagnose na mayroong mild COVID pero asymptomatic.

Ayon kay Manong Johnny, nagpaalam na siya kay incoming executive secretary Vic Rodriguez na hindi makadadalo sa inagurasyon ni President-elect Bongbong Marcos sa Huwebes.

Sa kanya namang facebook post, pinasaringan ng dating defense minister ang kanyang mga kritiko at kaaway sa pagsasabing hindi pa dapat magdiwang ang mga ito dahil hindi pa siya mamamatay.

Tiniyak ng MMDA na nananatiling “manageable” ang sitwasyon ng daloy ng trapiko sa EDSA-Kamuning service road sa kabila ng isang buwang pagsasara ng flyover, simula noong Sabado, June 25.

Ito, ayon kay MMDA chairman Romando Artes, ay batay sa kanilang initial assessment matapos nilang ma-monitor ang traffic situation sa EDSA southbound.

Mayroon anyang apat na alternatibong rutang itinalaga para sa mga motorista.

Ang mga sasakyang nagmumula sa EDSA Southbound ay maaaring kumanan sa Mother Ignacia Avenue, Panay Avenue, Scout Albano o Scout Borromeo na maaari ring daanan ng mga rider at biker para sa kanilang kaligtasan.

Batay sa vehicle traffic count ng MMDA traffic engineering center noong Mayo, aabot sa 109,000 vehicles per day ang dumaraan sa EDSA-Kamuning, kung saan 57,354 vehicles ang bumabagtas sa flyover habang 51,770 vehicles sa service road.

Taong 1992 nang itayo ang flyover at noon namang 1994 ito ni-retrofit pero dahil sa dami ng dumaraang sasakyan na umaabot sa 140,000 kada araw bago ang COVID-19 pandemic, unti-unting humihina ang naturang istruktura.

Umagos na pababa sa isang barangay sa bayan ng Irosin, Sorsogon ang lahar mula sa bulkang Bulusan matapos ang malakas na pag-ulan sa naturang lugar.

Ayon sa PHIVOLCS, dakong ala-7 ng gabi noong Linggo nagsimulang umagos ang maliit na volume ng lahar sa Calang Creek, barangay Cogon.

Na-detect ito ng seismic at infrasound stations ng PHIVOLCS sa Bulusan volcano network at tumagal ng halos isang oras sa kalagitnaan ng thunderstorm sa lalawigan.

Binalaan naman ng ahensya ang mga residente malapit sa estero na maghanda sa posible pang lahar flow sa oras na muling umulan.

Magugunitang naglabas ng thunderstorm advisory ang PAGASA sa Bicol region noong Linggo ng gabi.

Nananatili sa Alert level 2 ang Bulusan volcano sa kabila ng mga Phreatic Eruptions nito noong June 5 at 12.

Kinalampag ni Senador Win Gatchalian ang LTFRB upang tiyaking mapabibilis na ang pamamahagi ng fuel subsidies sa mga target na benepisyaryo sa public transport sector.

Ito panawagan ni Gatchalian sa gitna ng kanyang isinusulong na ikatlong yugto ng ayuda sa sektor ng pampublikong transportasyon na nalulugmok na sa epekto ng walang puknat na oil price increase.

Ayon kay Gatchalian, chairman ng senate Committee on Energy, maraming PUV drivers na ang tumitigil sa pamamasada at nawalan ng hanapbuhay at ilan sa mga solusyon ang mabilis na pamimigay ng ayuda.

Nais ng senador Gatchalian na ipamahagi na ang ikatlong bahagi ng Pantawid Pasada program na nagkakahalaga ng 3,000 pesos kada buwan para sa susunod na limang buwan.

Ang unang yugto ng fuel subsidy para sa mga driver at operator ng Public Utility Vehicles na dapat sana ay natapos nang ipamigay noong ikalawang linggo ng Mayo ay naantala dahil sa kakulangan ng database ng mga benepisyaryo.—mula sa ula ni Cely Ortega-Bueno (Patrol 19)

Inihahanda na ng MMDA ang kasong isasampa laban sa mga bumugbog sa anim nilang enforcer na nagsasagawa ng clearing operations sa EDSA-Pasay noong linggo ng hapon.

Kinilala ng Pasay City Police ang mga suspek na sina Jose Zabala, Adrian Nidua, Jericho Fabella, Mario Martin, Jimmy Valencia at Eddie Boy Garas.

Ayon kay Pasay City Police chief, Col. Cesar Paday-os, sinubukang pigilan ng MMDA ang mga lalaki na bawiin ang kinumpiskang e-trike na nauwi sa gulo.

Pinaghahanap na ng awtoridad ang mga sangkot sa nasabing insidente.

Sugatan ang dalawang MMDA enforcer makaraang kuyugin ng mga e-trike driver at tambay sa gitna ng clearing operations sa EDSA-pasay.

Sa viral na video ng isang pasahero sa itaas ng MRT-3 Taft station, kita kung paano pinagtulungang gulpihin ang dalawang MMDA enforcers sa tapat ng bagong red building, noong linggo ng hapon.

Nakita ring bumagsak sa kalsada at napahiga ang dalawang enforcer matapos magtamo ng maraming suntok at tadyak sa katawan at ulo.

Sinubukan namang umawat ng isa pang MMDA enforcer na at tulungan ang mga kasamahang nakahandusay pero pinagbalingan ng isa sa mga lalaki at tinangkang hatawin ng pamalo pero nakaiwas.

Agad na dinala sa ospital ang mga sugatang enforcers  makaraang tigilan ng mga kalalakihan ang pambubugbog.

Batay naman sa imbestigasyon ng Pasay City Police, nagsasagawa ng clearing operations ang mga taga-MMDA laban sa mga e-trike driver dahil bawal ang mga ito sa EDSA, na ikinagalit ng mga ito at ng operator.

Inihayag ni Pasay City Police chief, Col. Cesar Paday-os na isinakay umano ng mga taga-MMDA ang isang e-trike sa kanilang truck pero puwersahan itong binabawi ng isang lalaki na nagresulta sa gulo.