Drew Nacino

Mas gusto ni neophyte Senator Robin Padilla na maging miyembro ng Commission on Appointments sa halip na maging bahagi ng Senate Blue Ribbon Committee.

Ito, ayon kay Padilla, ay dahil sa natutunan niya sa loob ng National Bilibid Prison na kumilatis ng mga tao.

Sa tingin pa lang umano ng dating action star sa isang tao ay nalalaman na niya ang karakter o ugali nito.

Iginiit ni Padilla na kahit pa appointees ni incoming President Bongbong Marcos Junior ang isasalang sa CA ay kikilatisin niyang maigi ang kwalipikasyon ng mga ito.

Kung sa tingin umano niya ay hindi angkop sa posisyon ang isang appointee ng pangulo, agad niyang sasabihin bakit hindi ito nababagay sa ibinigay na puwesto.

Bukod sa pagiging miembro ng nasabing komisyon sa senado, target din ni Padilla na maging chairman ng Committee on Constitutional Amendment and Revision of Codes and Laws. —sa ulat ni Cely Ortega-Bueno (Patrol 19)

Isang magandang pagsisimula sa panunungkulan ang walang kinakaharap na balakid.

Ito ang inihayag ni Senator-Elect Jinggoy Estrada makaraang ibasura ng Korte Suprema ang dalawang nalalabing Disqualification Cases laban kay President-Elect Bongbong Marcos.

Iginiit ni Estrada na tama lang ang naging ruling ng Supreme Court dahil imposibleng kontrahin ng 15 mahistrado ang higit 31 milyong Filipino na bumoto sa susunod na pangulo.

Samantala, kumpiyansa naman ang senador na gagawin lahat ni PBBM upang matugunan ang kaliwa’t kanang problema na kinakaharap ng bansa ngayon.

Si Estrada ay kabilang sa mga senador na dadalo sa oath taking ni incoming Marcos sa National Museum sa Maynila, bukas. —sa ulat ni Cely Ortega-Bueno (Patrol 19)

Nananatiling stationary o halos hindi gumagalaw ang bagyong Caloy sa bahagi ng West Philippine Sea.

Huling namataan ng PAGASA ang naturang sama ng panahon sa layong 375 kilometers, kanluran ng Iba, Zambales.

Napanatili nito ang lakas ng hanging aabot sa 45 kilometers per hour at pagbugso na hanggang 55 kilometers per hour.

Inaasahang kikilos ang bagyo pa-Kanluran Hilagang Kanluran hanggang bukas at posibleng lumabas ng Philippine Area of Responsibility sa loob ng 24 oras bago dumiretsong China sa Sabado.

Wala namang itinaas na public storm signal ang PAGASA sa anumang bahagi ng bansa.

Ipinadala na ni Senate President Vicente “Tito” Sotto, III sa Office of the Ombudsman ang kopya ng report ng Committee of the Whole na naglalaman ng mga umano’y sangkot sa smuggling ng agricultural products.

Ayon kay Sotto, nakasaad sa report ang rekomendasyon ng Kumite kung sino ang mga dapat na kasuhan.

Tama anya ang sinabi ni acting Presidential Spokesman Martin Andanar na kasuhan na lang sa Office of the Ombudsman ang mga opisyal ng Department of Agriculture at Bureau of Customs na sangkot sa smuggling o kaya ay protector.

Ito’y upang mabigyan sila ng due process, pagkakataong harapin ang mga nag-aakusa at sagutin ang mga akusasyon laban sa kanila.

Una na nang iginiit ni Senador Koko Pimentel ang moto propio o dapat magkusa ang ombudsman na imbestigahan ang mga umano’y sangkot sa talamak na smuggling ng agricultural products. —sa ulat ni Cely Ortega-Bueno (Patrol 19)

Inalmahan ng Pilipinas ang isinasagawang live-fire drills ng Taiwan sa paligid ng Ligaw o Taiping Island, na bahagi ng Spratly Islands.

Ayon sa Department of Foreign Affairs, iligal ang isinagawang aktibidad ng Taiwan at ginawa lamang nitong komplikado ang sitwasyon sa pinag-aagawang West Philippine Sea.

Ang Ligaw o kilala rin bilang Itu Aba, ay mahalagang bahagi ng Kalayaan Island Group na bahagi naman ng Palawan Province.

Isinagawa ang live-fire drills kahapon at nagpapatuloy ngayong araw.

Kinatigan ng Teachers Dignity Coalition (TDC) ang kautusan ni President-Elect Ferdinand “Bongbong” Marcos Junior na pag-aralan muliang K To 12 Program.

Ayon kay TDC Chairman Benjo Basas, nararapat lamang magkaroon ng assessment upang mabatid ang estado ng edukasyon sa bansa simula nang ipatupad ang K-12.

Hindi naman anya maaaring basta na lamang ipahinto ang naturang programa dahil tiyak na magkakaroon ito ng negatibong epekto sa sektor ng edukasyon.

Tiniyak naman ni Basas na handa silang mga guro na makipag-dayalogo sa bagong administrasyon, partikular kay Vice President-Elect Sara Duterte–Carpio, na susunod na kalihim ng DEPED.

Pinalagan ni Outgoing Navotas City Mayor at Navotas City Lone District Representative-Elect Toby Tiangco ang pagkakadawit niya sa listahan ng mga opisyal ng gobyerno na protektor umano ng agricultural smuggling sa bansa.

Naniniwala si Tiangco na sinadyang kaladkarin ang kanyang pangalan sa report ng Senate Committee of the Whole para hindi niya mahuli ang mga totoong smuggler sa Department of Agriculture (DA).

Ayon sa alkalde, dalawa sa apat na kaso ng smuggling sa buong bansa ang isinampa mismo ng Navotas LGU sa Department of Justice mula noong 2016 hanggang 2021 dahil sa nakitang probable cause o sapat na dahilan para i-akyat ang mga ito sa korte.

Hindi anya katanggap-tanggap na mapabilang sa listahan ng mga government official na protektor umano ng smuggling sa DA para magkaroon ng food crisis sa bansa.

Iginiit ni Tiangco na hindi niya gagamitin ang relasyon niya kina President-Elect Ferdinand ‘Bongbong’ Marcos Junior at Leyte Rep. Martin Romualdez upang makalusot sa walang basehang akusasyon laban sa kanya.

Ang asawa ni Tiangco, na si Michelle Romuáldez-Yap ay pinsang-buo nina Marcos, Romualdez.

Sinelyuhan na ng Department of National Defense (DND) sa 30 billion peso contract sa Hyundai Heavy Industries (HHI) ng South Korea para sa pagbili ng anim na bagong offshore patrol vehicles para sa Philippine Navy.

Nilagdaan nina Defense Secretary Delfin Lorenzana at HHI Vice Chairman and President Sam Hyun ka ang kasunduan sa Camp Aguinaldo noong Lunes.

Sinaksihan ito nina South Korean Ambassador to the Philippines Kim In-Cheol, AFP Chief, Gen. Andres Centino at acting Philippine Navy Chief, Rear Admiral Caesar Bernard Valencia.

Ayon kay DND Spokesman Director Arsenio Andolong, layunin ng proyekto na palakasin ang maritime patrol capabilities ng Philippine Navy, kabilang ang technology transfer, partikular ang human engineering operators at maintenance training.

Pumirma rin ng Service Support Contract para sa pagpapatuloy ng maintenance ng Jose Rizal-Class Frigates ng Navy.