Angelica Doctolero

Hinimok ni Health Secretary Teodoro Herbosa ang pamahalaan na alisin na ang COVID-19 State of Public Health Emergency sa bansa.

Ayon sa kalihim, hindi na nagdudulot ng emergency ang COVID-19 dahil maaari na itong magamot katulad nalang ng ibang sakit gaya ng influenza, ubo at trangkaso.

Kumpiyansa si Sec. Herbosa, na mababa ang tiyansa at wala nang nakikkitang krisis o banta sa buhay ang Corona Virus kaya dapat nang tanggalin ang pagpapatupad ng Public Health Emergency Status.

Matatandaang march 2020 o kasagsagan ng pandemya, nang ideklara ni Dating Pangulong Rodrigo Duterte ang State of Public Health Emergency kung saan, sa ilalim ng Proclamation 922, mananatili parin ang implementasyon hangga’t hindi pa binabawi o inaalis ng kasalukuyang Pangulong Ferdinand “Bongbong” Marcos Jr.

Lumagda sina Finance Sec. Benjamin Diokno at World Bank Country Director Ndiamé Diop sa 4 na loan agreements na nagkakahalaga ng $1.14 Billion o P 63.5 – B .

Gagamitin ito sa mga inisyatibo ng gobyerno sa pagpapabilis ng pagbangon ng ekonomiya, pagpapalakas ng climate resilience, pagpapabuti ng kalidad ng edukasyon, at pag-develop sa Agrikultura at Fisheries sector.

$276 – M ang gagamitin sa mga proyekto ng Bureau of Fisheries and Aquatic Resources partikular ang Mindanao Inclusive Agriculture Development Project, at Philippine Fisheries and Coastal Resiliency Project.

Ilalaan naman ang $ 110 – M sa teacher effectiveness and competencies enhancement project ng Department of Education, o ang pagtataguyod ng pantay na access sa de-kalidad na edukasyon sa kindergarten hanggang Grade 6 sa Zamboanga Peninsula, Soccsksargen, at Bangsamoro Autonomous Region in Muslim Mindanao.

$750 – M naman ang magiging budgetary support sa Philippines First Sustainable Recovery Development Policy Loan para sa pangangalaga sa kapaligiran at climate resilience. - sa ulat mula kay Gilbert Perdez (Patrol 13). 

Naniniwala ang 73% ng mga Pilipino sa bansa na may malaking ambag sa lipunan ang mga miyembro ng LGBTQIA+.

Ito’y batay sa pagtataya ng Social Weather Station na isinagawa noong biyernes sa 1,200 indibidwal na edad 18 pataas.

Ayon sa sws, walong porsyento ng mga Pilipino ang hindi sang-ayon ; habang 19 % ang undecided.

Samantala, naitala naman sa kaparehong survey ang 19 % na naniwalang mapagkakatiwalaan ang LGBTQIA+ community; 7% ang hindi sang-ayon; habang 13 naman ang hindi makapagbigay ng opinyon.

43% naman ang naniniwalang babalik sa dati o magiging tuwid ang mga kalalakihan at kababaihan; 34% ang hindi sang-ayon; habang  22% naman ang undecided.

Target ng Philippine National Police na maideklarang “Drug Free” ang mahigit 8,000 barangay sa bansa.

Ayon kay PNP Chief Gen. Benjamin Acorda Jr., kabuuang 8,288 ang nasa impluwensya parin ng iligal na droga habang 76.67 % o katumbas ng 35,356 na mga barangay mula sa kabuuang 42,000 na barangay sa buong bansa ang drug –free na.

Batay sa datos ng PNP, pinakamalaking bilang ng drug-cleared sa bansa ang CALABARZON na nasa 97.06 % ; sinundan ng Cagayan Valley Region na nasa 95.55% ; at Cordillera Region na nasa 95.22 % .

Samantala, nakapagtala naman ng 94.52 % na Drug Clearance Rate ang Eastern Visayas, habang 89.37 % naman ang Central Mindanao.

Ikinatuwa naman ng PNP Chief, ang patuloy na pagsusumikap ng mga kaniyang mga para ipatupad ang Barangay Drug Clearing Program na sinimulan noong pang July 2016 sa ilalim ng Administrasyong Duterte.

Nanindigan ang mga evacuee na nakatira sa labas ng 6km. radius permanent danger zone ng Bulkang Mayon, na hindi sila babalik sa kanilang tirahan at mananatili sila sa evacuation centers.

Ito’y kasunod ng naging direktiba ni Albay Governor Edcel Greco Lagman, sa mga opisyal ng dalawang bayan sa lalawigan  na pauwiin na ang mga lumikas na residente partikular na ang mga bayan ng Sto. Domingo at Guinobatan.

Iginiit ng gobernador na hindi naman naninirahan sa danger zone ng naturang bulkan ang mga evacuee.

Ayon sa mga evacuee, kahit na nasa labas sila ng PDZ, mas gusto nilang manatili sa evacuation center na mas ligtas kumpara sa kinatatayuan ng kanilang bahay.

Bukod pa rito, malayo din ito sa patuloy na pag-aalburoto ng Bulkang Mayon kung saan, posible pang maitala ang ashfall, lava flow, at pyroclastic density.

Nakatakdang maglabas ng El niño advisory ang Philippine Atmospheric, Geophysical And Astronomical Services Administration, sakaling marating ng klima ang “Full Blown” na kondisyon nito.

Ayon kay PAGASA Officer-in-Charge Dr. Esperanza Cayanan, nasa ilalim ng El niño alert ang ahensya, dahil sa inaasahang pagtama ng El niño sa bansa ngayong taon.

Sinabi ni OIC Cayanan, na mararamdaman ang epekto ng El niño kapag hindi na normal ang pag-ulan at posibleng tumaas ang kundisyon nito sa huling quarter ng 2023 at unang quarter ng taong 2024.

Iginiit ng PAGASA na posibleng makaranas ng matinding tag-tuyot ang ilang bahagi ng bansa, habang inaasahan naman ang above normal na pag-ulan  sa kanlurang bahagi ng bansa.

Samantala, nagpaalala naman sa publiko ang PAGASA Weather Bureau, na panatilihing maging alerto at maghanda sa posibleng epekto ng El niño.

Sinimulan na ng Department of Labor and Employment ang profiling para sa emergency employment ng mga residenteng apektado ng patuloy na pag-aalburoto ng Bulkang Mayon sa Albay, Bicol Region.

Ayon sa DOLE, nasa P50-M  halaga ng pondo ang naiturn-over sa mga local government unit na ilalaan para sa mga naapektuhan ng abnormal na aktibidad ng naturang bulkan.

Ang nasabing pondo ay bahagi ng Tulong Panghanapbuhay Sa Ating Disadvantaged/Displaced Workers o TUPAD Program kung saan, ang isang miyembro ng apektadong pamilya ay babayaran ng halos P 11,000 para sa 30 days nilang pagseserbisyo.

Kabilang sa serbisyong alok ng DOLE ang community gardening o pagtatanim ng gulay malapit sa evacuation centers, paglilinis at maintenance ng pansamantalang evacuation centers, maging ang housekeeping at paghahanda ng pagkain.

Mas pinalakas ng Department of Agriculture ang produksiyon ng Agricultural Products sa bansa.

Ito ang inihayag ni Pangulong Ferdinand “Bongbong” Marcos Jr., na ginagawa na ng Da ang ibat-ibang hakbang upang pataasin ang produksiyon na magpapaganda sa ekonomiya ng Pilipinas.

Layunin din nitong mapababa sa abot-kayang halaga ang presyo ng mga local product sa ibat-ibang pamilihan sa Metro Manila.

Ayon kay Pangulong Marcos, dahil sa inflation, napipilitan ang bansa na mag import ng produkto kung saan, nakikipag-ugnayan na siya sa mga opisyal ng DA maging sa mga pribadong sektor para pagtuunan ng pansin ang mga programa ng pamahalaan na magpapalakas sa produksiyon ng mga produkto.

Sa kabila nito, tiniyak ni pbbm, na patuloy na isusulong ng DA, ang agri-fishery practices, pagandahin ang competitiveness ng agri-fishery products, at lalong mapalago ang kita ng mga Pilipinong magsasaka at mangingisda.

Inihihirit sa pamahalaan ng Department of Migrant Workers (DMW) na dagdagan ang sweldo at benepisyo ng mga Filipino nurses sa bansa.

Binigyang diin ng DMW, na ang mababang sahod ang tumutulak sa mga Pinoy Nurses para mapilitang magtrabaho sa ibang bansa.

Kasunod narin ito ng pagpapakita ng interes ng 6 na malalaking bansa na planong mag-hire ng maraming bilang ng mga nurse sa Pilipinas.

Kabilang sa mga bansang nais kumuha ng mga nurse ang United States, Saudi Arabia, Austria, Singapore, Japan at Germany na may magandang benepisyo at malaking sahod na tutugon sa pangangailangan ng mga healthcare workers.

Iginiit ng DMW, na kailangang masolusyonan ang problema ng mga healthcare workers upang mapigilan ang posibleng kakulangan ng mga nurse sa bansa.