Tuluy-tuloy ang paghahanda ng House of Representatives para sa ikalimang State of the Nation Address (SONA) ni Pangulong Ferdinand Marcos Jr. na gaganapin sa Batasang Pambansa Complex.
Bilang pagsunod sa direktiba ni House Speaker Faustino Dy III na gawing mas simple ang pagdaraos ng SONA, hindi na inilatag ang red carpet sa hallway ng North at South Wing Lobby ng Kamara.
Naglagay na rin ng mga security cordon ang mga tauhan ng Kamara, habang nagpapatrolya ang K-9 units at security personnel bilang bahagi ng pinaigting na seguridad. Kasunod ito ng walkthrough na isinagawa noong nakaraang linggo upang matiyak ang kaligtasan ng mga dadalo sa mahalagang aktibidad.
Nagtalaga na rin ang Kamara ng mga designated area para sa mga media outlet na magko-cover sa SONA.
Una nang hiniling ni Speaker Dy sa mga kapwa mambabatas na magsuot na lamang ng dati nang barong at Filipiniana upang makatipid at makiisa sa hamong kinahaharap ng ekonomiya ng bansa.
Samantala, sinabi rin ni House Secretary General Cheloy Garafil na wala nang magagarbong gown o kasuotan sa SONA, taliwas sa naging tradisyon noong mga nakaraang taon. | via Geli Mendez (Patrol 30)
