“Safe travels and happy trip po!”
‘Yan ang naging mensahe ni House Trial Spokesperson Zia Alonto Adiong kay Vice President Sara Duterte kasunod ng pag-alis nito ng bansa sa gitna ng kaniyang paglilitis sa Senate Impeachment Court.
Ayon kay Adiong, umaasa ang prosecution na agad na makababalik ang bise presidente sa Pilipinas.
Paliwanag ni Adiong, kahit pa umalis ng bansa si VP Sara ay wala naman itong epekto sa takbo ng impeachment trial.
Bukod pa dito, nasa kapangyarihan din ng Palasyo ang pag-apruba sa travel authority ng pangalawang pangulo.
Nang matanong naman kung may naririnig ba ang prosekusyon ukol sa posibleng resignation ni VP Sara, sinabi ni House Prosecutor Terry Ridon na wala pa siyang naririnig na ganitong kwento.
Sinabi ni Ridon, nasa mas mahalagang yugto na ng paglilitis ang kaso, lalo’t inaasahan pa na magiging sentro ng mga susunod na pagdinig ang mga tax, bank, at Anti-Money Laundering Council o AMLC records ng bise presidente.
Ito’y matapos payagan ng Senate Impeachment Court ang pagpapalabas ng mga subpoena para sa mga naturang dokumento.
Iginiit ni Ridon, bakit magre-resign gayung papunta pa lamang ang impeachment trial sa “exciting part.”
Punto pa ni Ridon, kung magbibitiw talaga si VP Sara ay dapat na magpatuloy ang paglilitis dahil hindi lamang ang pagtanggal sa kaniya sa posisyon ang pinag-uusapan, kundi ang habambuhay na diskwalipikasyon o hindi paghawak ng anumang posisyon sa gobyerno sakaling mahatulang guilty. | via Geli Mendez (Patrol 30)
