Angelica Doctolero

Kung madalas ay mga kawatan ang nanlalamang sa kanilang mga biktima, ibahin niyo ang kidnapper sa kwento na ito na naisahan ng dinakip niyang bata. Ang mautak na biktima, kinantahan ng gospel song ang kidnapper sa loob ng tatlong oras hanggang sa marindi ito sa kaniya at wala nang nagawa kundi palayain siya.

Ang kwento kung paano sinagip ng kaniyang pananampalataya ang bata, eto.

9-anyos pa lang noon si Willie Myrick nang mabiktima ito ng kidnapping habang nasa bakuran siya ng kanilang bahay sa Atlanta.

Katulad sa mga napapanood natin sa pelikula, nagmaneho lang ang kidnapper at dinala kung saan-saan ang bata. Pero si Willie, kakaiba ang naging reaksyon sa panganib na posible niyang kaharapin.

Sa halip kasi na umiyak at mag-panic si Willie, non-stop itong kumanta ng gospel song na ‘Every Praise’ sa loob ng tatlong oras.

Habang kumakanta si Willie, wala ring tigil sa pagmumura ang kidnapper habang pinapatahimik siya. Pero nang hindi siya nito napigilan, wala nang nagawa ang kidnapper kundi palayain ang kaniyang biktima.

Ayon sa ulat, lumaki si Willie sa kaniyang ninang na si Codetta Bateman na palagian siyang isinasama sa simbahan kung saan ito natuto na magbasa at umintindi ng mga teachings sa bible.

Sa murang edad, nakita ni Bateman kung paano na-develop ang pananampalataya ni Willie. Sa katunayan, mas pinipili nito na um-attend sa bible study sessions sa halip na maglaro.

Samantala, bagama’t natakot para sa kaniyang buhay, sinabi ni Willie na ipinaubaya niya na lang ang lahat sa pananampalataya. Pagkalipas nga ng tatlong oras, nanaig pa rin ang paniniwala ng bata at ligtas na nakalabas ng sasakyan.

Ikaw, himala ka na rin bang nakaalis sa mapanganib na sitwasyon o sa lowest point ng buhay mo sa tulong na iyong paniniwala?

Sabi nga nila, iba ang nagagawa ng pera sa isang tao. Maaaring mapaganda nito ang kanilang buhay, o pwede ring ito ang makasira. Katulad na lang ng isang magkasintahan sa Canada na nauwi sa korte nang dahil lang sa pera na napanalunan nila sa lotto. Ang babae kasi, iniwan ang kaniyang boyfriend at itinakbo umano ang premyo kasama ang ibang lalaki.

Pero kanino nga ba talaga dapat mapunta ang pera? Alamin.

Taong 2024 nang bumili ng lottery ticket si Lawrence Campbell mula sa Winnipeg, Canada para pagbigyan at gawin itong birthday gift para sa kaniyang ex-girlfriend na si Krystal Ann Mckay.

Nang hindi inaasahang nanalo ang itinayang ticket, panandaliang nagkaroon ng problema si Lawrence kung paano ice-claim ang premyong 5 million Canadian dollars o mahigit 200 million pesos dahil wala itong valid ID at bank account.

Ang payo ng mga opisyal ng Western Canada Lottery Corporation (WCLC) kay Lawrence, ipakuha na lang ang cash prize sa sinuman na pinagkakatiwalaan nito.

Bilang binili ng lalaki ang ticket para kay Krystal at isa’t kalahating taon na umano silang nasa isang loyal, committed, promising, romantic partnership, pumayag si Lawrence na i-deposit ang pera sa bank account nito.

Pero hindi nagtagal, matapos i-claim ang limpak-limpak na salapi, bigla na lang ghinost ni Krystal si Lawrence at naghain pa ng protection order. Nang magtagpuan siya ng dating nobyo, nakita umano siya nito sa kama kasama ang ibang lalaki.

Samantala, nagsampa na si Lawrence ng kaso laban kay Krystal na siya namang tumanggi sa mga ibinibintang sa kaniya. Bukod sa ex-girlfriend, dawit din ang lottery company sa kaso dahil umano sa palpak na pagbibigay nito ng advice pagdating sa pagce-claim ng premyo.

Sa mga may partner diyan, ganoon na ba kataas ang kumpyansa mo sa partner mo para ipagkatiwala rito ang pera mo kahit na hindi pa kayo kasal?

Ang payo nga ng matatanda sa mga kabataan, ang pag-aasawa ay hindi parang kanin na isusubo at kapag napaso, iluluwa. Pero applicable ba ang kasabihan na ito sa indonesian man na nag-viral matapos magpakasal sa isang rice cooker pero agad ding nakipaghiwalay makalipas lang ng apat na araw dahil limited lang umano ang kaya nitong iluto?

Ang kwento ng napakaigsing married life ng isang tao at ng isang kitchen appliance, eto.

Hindi na bago sa atin ang makarinig ng kwento kung saan nagpapakasal ang isang tao sa mga non-living things katulad ng manika. Pero sa kwentong ito, rice cooker naman ang pinakasalan ng isang lalaki. Para mas palalain pa ang sitwasyon, hiniwalayan niyo ito dahil din sa mismong rason kung bakit niya ito pinakasalan.

Umabot ng halos 10k reactions ang social media post ni Khoirul Anam mula sa Magelang, Java Indonesia nang inanunsyo nito ang pag-iisang dibdib nila ng isang rice cooker kung saan makikita sa mga picture ang magarang kasuotan ng groom at ang veil na suot ng bride.

Bukod sa pagpirma ni Khoirul sa kanilang marriage contract, they also sealed it with a kiss.

Ayon sa caption ng post, nagustuhan ni Khoirul ang pagiging tahimik, masunurin, at ang galing ng rice cooker sa pagluluto.

Pero ang tila matamis na pagsasama ng dalawa, agad ding pumait dahil apat na araw lang ang lumipas matapos ang kasal, nakipaghiwalay lang din si Khoirul dahil umano tanging kanin lang ang kaya nitong iluto.

Pero bago pa kayo mainis sa mabilis na pagbitiw ni Khoirul sa kanilang relasyon, dapat niyong malaman na isa lang entertainment stunt ang ginawa nitong pagpapakasal sa rice cooker.

Ayon sa mga report, kilalang personality si Khoirul sa Indonesia dahil sa paggawa nito ng mga entertaining content. Pero ang kwentong ito ay isang patunay na hindi dapat paniwalaan ang lahat ng nakikita natin sa social media.

Ikaw, may balak ka rin bang magpakasal? Tandaan, siguraduhin muna na desidido ka na at make sure na tao ang pakakasalan mo.

Sinong mag-aakala na isang relasyon ang magkakalamat nang dahil lang sa isang manghuhula? Matapos kasing magpahula ng isang misis mula sa China, agad nitong inakusahan ng panloloko ang kaniyang mister matapos walang pagdadalawang-isip na pinaniwalaan ang sinabi ng manghuhula na nangangaliwa ito.

Kung ano nga ba ang mga sinabi ng manghuhula, eto.

Matatawag ba na tamang hinala ang isang misis kapag inakusahan nito ang kaniyang mister ng panloloko nang dahil lang ito ang lumabas sa reading ng manghuhula?

Sa halagang 500 yuan o mahigit 4,000 pesos, nag-book ang nasabing misis mula sa Wuhu, Anhui Eastern China ng isang session sa manghuhula kung saan sinabi sa kaniya na nagloloko umano ang kaniyang asawa.

Ayon sa manghuhula, bumibisita umano ang kaniyang mister sa mga prostitute at nag-check in sa mga hotel kasama ang iba’t ibang babae.

Si misis, agad na nagpadala sa mga salita ng manghuhula! Kahit na walang pruweba, agad itong nag-akusa na cheater ang kaniyang mister.

Wala nang nagawa ang mister kundi mag-report sa mga pulis para linisin ang kaniyang pangalan matapos itong madumihan nang dahil lang sa isang baseless accusation.

Ayon sa isang pulis, ang dahilan kung bakit hindi man lang nagduda ang misis sa virtual manghuhula ay dahil sa mga sabi-sabi na accurate ang mga reading nito.

Gayunpaman, hindi pa rin malinaw ang dahilan kung bakit nga ba nag-book ng online fortune-telling session ang nasabing misis.

Ikaw, sinong mas paniniwalaan mo? Ang mga taong nakapaligid sayo o ang partner mo? Pero una sa lahat, hindi dapat hahantong sa punto na magpapahula ka dahil ibig sabihin non, wala kang tiwala sa partner mo.

Hindi maitatanggi na kahit saan tayo magpunta, palaging mayroong tao na makakaagaw sa atensyon natin dahil sa angkin nilang kagandahan o kagwapuhan, galing sa pananamit, o sa paraan kung paano dalhin ng isang tao ang kaniyang sarili. Pero para sa noo’y 17-anyos na volleyball player mula sa Kazakhstan, tila isang sumpa ang agaw-atensyon niyang kagandahan.

Ang dahilan kung bakit tila naging sumpa ang ibinigay sa kaniyang biyaya, eto.

Taong 2014 nang maging internet sensation ang volleyball player na si Sabina Altynbekova mula sa Kazakhstan hindi dahil sa galing nito na pumalo ng bola kundi dahil sa angkin nitong ganda na talagang mapapa-second look ka.

Dahil sa agaw-pansin nitong mukha, marami ang nagsasabi na hindi volleyball competition ang pinunta ng fans kundi si Sabina mismo.

Ayon pa nga sa kanilang coach, tila iisa lang ang player sa paningin ng audience.

Dahil nasobrahan na ang atensyon na natatanggap, kalaunan, hindi na naging komportable si Sabina sa mga nangyayari. Aniya, focused siya sa kaniyang career at ito lang ang gusto niyang maging dahilan ng pagsikat niya at wala ng iba pa.

Inamin din nito na nahirapan siya sa paglalaro dahil sa behavior ng mga tao.

Bagama’t sumisikat na si Sabina sa napili niyang propesyon at nakatanggap na rin ng modelling offers, umaasa pa rin ang nanay nito na piliin niya na pumasok sa law school.

Gayunpaman, sa kasalukuyan ay patuloy pa ring namamayagpag si sabina bilang volleyball player at ipiniprisinta ang bansang Kazakhstan.

Ikaw, umabot na rin ba sa punto na dahil sa sobrang habulin mo, nahihirapan ka nang i-handle ang good looks mo?

Hindi maiiwasan na gamitin ng mga estudyante ang TV screen sa loob ng classroom para mag-movie marathon, lalo na kapag walang nakabantay na teacher. Pero sa kaso na ito, isang estudyante ang hindi sinasadyang nag-develop umano ng mental disorder matapos manood ng horror movie sa loob ng eskwelahan. Sa tindi ng pinsala nito sa bata, umabot sa punto na nagsampa ng kaso laban sa school ang mga magulang nito.

Kung ano nga ba ang naging hatol ng korte, eto.

Pinahintulutan ng isang eskwelahan sa Hangzhou, China at ng head teacher nito na gamitin ng isang section ang TV sa kanilang classroom na manood ng pelikula habang nagse-self study mga ito dahil naka-temporary leave ang kanilang teacher nang mangyari ang insidente.

Ayon sa ulat, napagkasunduan ng mga estudyante na manood ng horror movie.

Pero isang gabi pagkatapos manood, nag-iba ang kilos ng estudyante at nagsimulang magpakita ng mga sintomas katulad ng hirap sa pagsasalita at delusions. Mabuti na lang at agad itong ipinatingin ng kaniyang mga magulang at doon na-diagnose ng Acute and Transient Psychotic Disorder.

Ayon sa mga magulang ng isa sa mga estudyante, matindi ang naging epekto ng nasabing pelikula sa bata.

Dahil sa paniniwala na ang movie ang sanhi ng diagnosis ng kanilang anak, nagsampa ng kaso ang mga magulang nito laban sa eskwelahan.

Ang tugon ng pamunuan ng institusyon? Wala umano silang responsibilidad sa kondisyon ng bata at maaaring na-trigger ito ng existing mental problems ng bata.

Gayunpaman, sa kabila ng pagtanggi ng eskwelahan sa responsibilidad, sinabi ng korte na 30% responsible ang mga ito sa kaso at tinawag na kapabayaan ang ginawa nitong pagpayag na manood ng pelikula ang mga estudyante. Pinagbabayad din ito ng mahigit 76,000 pesos na halaga ng insurance.

Ikaw, sino sa palagay mo ang may kasalanan sa kasong ito? Sapat na ba ang kabayaran ng eskwelahan para sa iniwan nitong damage sa estudyante?

Mula sa tradisyonal na pagbabayad ng cash, tuluyan nang in-adopt ng marami ang pagiging cashless dahil sa pagtangkilik sa e-payment options. Pero ngayon, pati ang mga cashier, sa screen na lang din makikita at makakausap, katulad sa ilang restaurant sa New York City kung saan ang sumasalubong sa mga customer ay virtual cashiers all the way from the Philippines.

Kung paano tinanggap ng mga customer ang makabagong konsepto na ito, eto.

Kaniya-kaniyang diskarte ngayon ang mga pilipino para lang maka-survive at makasabay sa ekonomiya. Mayrong mga nagdo-double job, may kumukuha ng mga raket, at mayroong humahanap ng oportunidad sa ibang bansa.

Ngayong digital na ang lahat, hindi na kinakailangan pang mag-abroad ng mga empleyado para maghanap ng mas malawak na career opportunities at mas malaking sweldo dahil pwedeng-pwede na itong makamit kahit nakaharap lang sa screen.

Sa New York City, ilang bagong restaurants na ang nag-a-outsource ng mga virtual cashier mula sa pilipinas kung saan ine-entertain ng mga ito ang mga customer gamit ang video conferencing application.

Sa NYC, $16 ang minimum pay ng mga empleyado kada oras o mahigit 900 pesos. Kung susumahin, mahigit 27,000 pesos ang maaaring kitain kada buwan.

Eto pa, sinabi ng isang virtual cashier sa isang pahayag na kung minsan ay malaki ang ibinibigay na tip ng mga customer, lalo na at hinihikayat ang mga ito na magbigay ng tip na nagkakahalaga ng 18%.

Pero ang bagong concept na ito, tila hindi nagugustuhan ng ilan, kabilang na ang tech entrepreneur na si Brett Goldstein na siyang pumuna rito sa social media.

Aniya, ang pag-outsource ng virtual cashiers ay isang paraan para mag cost-cutting. Bukod pa riyan, sinabi rin nito na posibleng sa mga susunod na buwan ay ai na ang gagawa sa nasabing trabaho.

Gayunpaman, nagustuhan o kinontra man ito ng ilan, malaking tulong pa rin sa mga Pilipinong virtual cashier ang natatanggap nilang mga tip na nagsisilbing karagdagan sa panggastos nila sa araw-araw.

Ikaw, isa ka rin ba sa mga nangangarap na makapag-abroad? Don’t lose hope. Apply lang nang apply at matatanggap mo rin ang job offer na nararapat para sayo.

Katulad sa Pilipinas, paniguradong laganap din ang hindi mapigilang pagkalat ng fake news sa ibang bansa, katulad ng China.

Bilang nangunguna ang bansang ito sa innovations, nag-step up na rin ito para protektahan ang mga lokal mula sa maling impormasyon sa pamamagitan ng isang batas kung saan kailangan munang patunayan ng mga influencer ang kanilang expertise tungkol sa mga seryosong usapin bago gumawa ng video tungkol dito.

Tinanggap nga ba ng mga social media user ang bagong patakaran? Alamin.

Ganap nang isang batas sa China at sinimulang implementahan noong October 25 ang panibagong sistema kung saan nire-require ang mga social media influencer na magkaroon ng degree, training, license, o certification bago sila gumawa ng video tungkol sa mga social issues o mga seryosong usapin katulad ng law, finance, medicine, at education.

Layunin nito na tugunan at pababain ang mga kaso ng misinformation sa social media.

Makikipagtulungan din ang mga Chinese social media platform para maging epektibo ang pagpuksa sa fake news kung saan kialangan munang kumpirmahin ng mga ito ang credentials ng mga influencer.

Tila isa na itong thesis dahil kailangang linawin ng uploaders kung naglalaman ba ng AI-generated materials ang kanilang videos at kung gumamit ba sila ng sources katulad ng research studies.

Bukod pa riyan, ipinagbawal na rin ng Cyberspace Administration of China (CAC) ang pag-aadvertise ng medical products, supplements, at health food para maiwasan ang pagpo-promote ng mga produkto na kunwari ay layuning mag-educate sa publiko.

Gayunpaman, bagama’t maganda ang hangarin ng bagong batas, ilang netizen ang umalma rito dahil posible umano nitong mahadlangan ang pag-e-express ng creativity at malilimitahan ang isa sa mga karapatang pantao na freedom of speech.

Ikaw, papabor ba sayo kung magkakaroon ng kaparehas na batas sa Pilipinas?

Ika nga nila, love knows no age. Kapag tinamaan ka, tinamaan ka. Katulad ng magkasintahan na ito sa Japan na hindi alintana ang kanilang 60-year age gap at proud na proud na ipinagsigawan sa mundo ang pagmamahalan nila na nabuo nang hindi inaasahan.

Kung paano nga ba nagsimula ang love story ng magkasintahan, eto.

Nasa kolehiyo pa ang 23-anyos na Japanese man na si Kofu nang una itong bumisita sa bahay ng 83-anyos na si Aiko na lola ng kaniyang kaklase nang hindi inaasahang ma-love at first sight ito kay Lola Aiko.

Ayon sa ulat, nag-internship si Kofu sa isang creative design company at nalalapit na ang graduation. Habang si Aiko naman ay dalawang beses ikinasal, may dalawang anak, at limang mga apo.

Bagama’t malaki ang agwat ng edad ng dalawa, hindi ito naging hadlang para mahulog din ang loob ni Aiko sa binata, pero ito rin ang mismong dahilan para mahirapan ang dalawa na i-express ang pagmamahal nila para sa isa’t isa.

Mabuti na lang at nag-arrange ng trip to Disneyland ang apo ni Aiko para sa kanilang tatlo. Pero ang apo nito, biglaang nag-back out.

Dahil dito, nabigyan ng pagkakataon si Aiko at Kofu na magkaroon ng alone time. At sa paglubog ng araw, habang nasa happiest place on earth, nakamit din ni Kofu ang kaniyang happiness dahil sa wakas ay nagkaroon din ito ng lakas ng loob na umamin kay Aiko.

Ang pagmamahalan ng dalawa, hindi hinadlangan ng sinuman at todo suporta pa ang kaniya-kaniya nilang mga pamilya. Sa ngayon, nagsasama na ang dalawa at ini-enjoy ang buhay sa piling ng isa’t isa.

Ayon kay Aiko, kahit na nalulungkot siya sa tuwing papasok sa trabaho si Kofu, nae-enjoy niya naman ang pagluluto ng pagkain para rito.

Sa isa namang pahayag, sinabi ni Kofu na hindi pa nila napag-uusapan ang pagpapakasal dahil sa ngayon, kuntento na ito na makasama at makita ang kaniyang girlfriend sa bawat pagsikat at paglubog ng araw.

Ikaw, mayroon ka bang kaparehas na kwento? Kung ganon, pwede mo bang i-share kung paano nagsimula ang love story niyo ng partner mo?

Minsan, hindi rin pala masama na malihis ng landas at mapunta sa ibang direksyon. Kagaya na lang ng isang bata mula sa Minnesota na hindi sinasadyang napaliko sa maling daanan habang nasa fun run at napasali sa mga matatanda. Bagama’t mas bata at mas maigsi ang mga biyas, nagawa nitong talunin ang mga adult runners at nauna pa sa finish line.

Ang dahilan kung bakit nalihis ng direksyon ang bata, eto.

Linggo ng umaga nang magpunta ang noo’y 9-year-old na si Kade Lovell sa isang fun run malapit sa tinitirhan nila sa St. Cloud, Minnesota, U.S.A kasama ang kaniyang nanay at lola para muling lumahok sa isang 5 km race.

Anim na taong gulang pa lang ay aktibo nang sumasali si Kade sa mga fun run kung kaya nahasa na ang resistensya nito na tumakbo nang mabilis sa murang edad.

Sa kalagitnaan ng pagtakbo, nakasalubong ni Kade ang isang staff na sinabihan siya na dumaan sa ibang direksyon ng kalsada. Bagama’t nagtataka, ipinagpatuloy ni Kade ang pagtakbo hanggang sa nagulat na lang ito nang mapahalo siya sa mga adult runners na naka-sign up para sa 10 km run.

Nagsimulang kabahan si Kade dahil sa pag-aakalang naliligaw na siya. Kasabay nito ay unti-unti na rin itong nakaramdam ng pananakit sa katawan dahil hindi inaasahang napahaba at napatagal ang pagtakbo nito.

Pagdating sa finish line ay bumungad kay kade ang nag-aalala niyang nanay kung kaya agad na nagpaliwanag ang bata na hindi niya sinadyang matagalan at mapasama sa 10k run.

Bagama’t naulanan, naligaw, at napagalitan ng nanay, ganon na lang ang gulat ni Kade nang lapitan sila ng isang staff at sinabi na sa lahat ng runners na sumali sa fun run, siya ang pinakaunang nakarating sa finish line.

Ang accidental achievement na ito ni Kade ay isang patunay na nagbunga ang palagian niyang pagtakbo at tatlong araw niyang pagte-training para sa junior olympics.

Ikaw, mayroon ka rin bang achievement na hindi mo inakalang maaabot mo?